文／王德兆，新竹竹東客家人，退休人士（海陸腔）
現下人當重視休閒活動，這下个休閒活動當多，像路走、箭自行車、蹶山、唱歌仔、跳舞、打球仔、看書、聽音樂等等；有兜人還會出國遶尞（註1），滿哪仔（註2）看風景，翕當多相片放在網路項，下二擺（註3）做得回憶自家識去到哪位尞，乜做得分享分親戚朋友、同學來欣賞。
𠊎个休閒活動當多，戶外活動有蹶山、路走、箭自行車。頭過去蹶山係滿哪仔都去蹶，聽著麼人（註4）講愛蹶哪位斯跈等去蹶，𠊎專門好去蹶一日來回个中級山，像李棟山、馬那邦山、虎山這兜；愛在外背歇夜个𠊎較無愛，愛在荒郊野外便所、洗身、睡目，𠊎毋慣。背尾（註5）係有人湊，斯大體（註6）去蹶飛鳳山摎尖石馬胎步道，四儕到八儕共下蹶，半日來回，該位有樹仔遮蔭抵涼毋會晒著日頭，蹶上、蹶下都有出汗斯試著有運動著，在山頂還做得食茶、啉咖啡、食點心、看風景，當熱个天坐在該位，風吹啊過來，該斯還涼爽哪！
係箭自行車𠊎大體係對竹東河濱公園个自行車道騎去南寮，來回有四十零公里，差毋多愛兩點零鐘來騎，這條路算平个，中間成時會有兜上下崎个位所，毋過毋係當嶇，算已好騎。有一句話係恁樣講个「有女莫嫁大山背，上崎堵嘴，下崎堵背」，意思係講大山背崎當嶇，𠊎聽人講大山背係有箭自行車个人一定會去个位所，所以𠊎乜想愛去箭看看啊！
第一擺去騎个時節，𠊎對竹東出發，跈等河濱公園騎往上到榮民醫院脣頭（註7）个細路斡上竹東大橋騎到橫山，在便利商店斡正片騎到橫山街路開始斯小可上崎，騎到橫豐產業道路斯開始上大崎，𠊎毋知愛配速硬箭，騎到萬瑞森林公園牌樓時，心臟強強（註8）像形（註9）會停忒樣，𠊎煞煞（註10）停下來歇睏（註11），看一下時錶𠊎个心跳一分鐘跳到180下，該斯會悿（註12）死！背尾朋友摎𠊎講箭自行車摎路走共樣定著（註13）愛配速，做毋得一開始斯拚昶遽，係無到尾當遽會無力。
係無去外背（註14）尞，𠊎在屋下斯會唱歌仔、畫圖。𠊎見拜三暗晡去上畫圖課；見拜一暗晡去合唱團唱歌仔，所以成時（註15）在屋下愛練唱歌；成時愛練畫圖。看著自家畫个圖緊（註16）來緊靚，試著盡有成就感；聽著自家歌仔緊唱緊好聽，乜有共樣（註17）个感覺。
有一條山歌係恁樣（註18）唱：「有閒時節唱山歌，人生毋使超過勞，貧窮富貴命中定，身體健康快樂多。」這條山歌係講人个命運係注定个，毋過𠊎毋係完全相信命運个人，𠊎試著人生還係愛煞猛（註19）做頭路（註20），但係這下个時代確實摎頭過也無共樣了，除了煞猛做頭路以外，乜愛有適當个休閒活動來做平衡，人生个路正會行到久、行到長。
（註1）遶尞（lauˋ liau+）：遊玩
（註2）滿哪仔（manˋ nai+ er）：到處
（註3）下二擺（ha+ ngi+ baiˊ）：下一次
（註4）麼人（maˊ ngin）：誰、什麼人
（註5）背尾（boiˇ muiˋ）：後來
（註6）大體（tai+ tiˊ）：大部分
（註7）脣頭（shun teu）：旁邊
（註8）強強（kiong kiong）：差一點
（註9）像形（ciongˇ ngin）：好像
（註10）煞煞（sad sad）：趕快
（註11）歇睏（hied kunˇ）：休息
（註12）悿（tiamˊ）：非常疲累
（註13）定著（tin+ chogˋ）：一定
（註14）外背（ngoi+ boiˇ）：外面
（註15）成時（shang shi）：有時候
（註16）緊…緊…（ginˊ…ginˊ…）：越…越…
（註17）共樣（kiung+ rhong+）：一樣
（註18）恁樣（an ngiong）：這樣
（註19）煞猛（sad mangˋ）：努力、勤奮
（註20）做頭路（teu lu+）：做工作、經營事業
華語
現在的人很重視休閒活動，現在的休閒活動有很多種，像路跑、騎自行車、爬山、唱歌、跳舞、打球、看書、聽音樂等等；有些人還會出國旅遊，到處看風景，拍很多照片放在網路上，下一次可以回憶自己曾經去過那裡遊玩，也可以分享給親朋好友、同學來欣賞。
我的休閒活動很多，戶外活動有爬山、路跑、騎自行車。以前去爬山是到處都去爬，聽到誰說要去那裡爬山就跟著去爬，我喜歡去爬一日來回的中級山，像李棟山、馬那邦山、虎山這些；要在外面過夜的我比較不喜歡，要在荒郊野外上廁所、洗澡、睡覺，我不習慣。後來有人找我去爬山，就大部分去爬飛鳳山和尖石馬胎步道，四個人到八個人一起爬，半天來回，那裡有樹可以遮蔭不會曬到太陽，上山、下山都會出汗就感覺到有運動，在山頂還可以喝茶、喝咖啡、吃點心、看風景，很熱的天坐在那裏，風吹過來，就感覺好涼爽啊!
如果是騎自行車，我大部分是從竹東河濱公園的自行車道騎去南寮，來回有四十多公里，差不多要兩個多小時來騎，這條路算平的，中間有時候會有些上下坡的地方，不過不是很陡，可以說是蠻好騎的。有一句話是這麼說的「有女莫嫁大山背，上坡會碰到嘴，下坡會碰到背」，意思是說大山背的坡非常陡，我聽人說大山背是有騎自行車的人一定會去騎的地方，所以我也要去騎看看。
第一次去騎的時候，我從竹東出發，跟著河濱公園往上騎到榮民醫院旁邊的小路轉上竹東大橋騎到橫山，在便利商店右轉騎到橫山街上就開始稍微上坡了，騎到橫豐產業道路就開始上大坡，我不知道要配速硬騎，騎到萬瑞森林公園牌樓時，心臟差一點就像要停掉一樣，我趕快停下來休息，看一下手錶我的心跳一分鐘跳到180下，那真的會累死！後來朋友跟我說騎自行車跟路跑一樣一定要配速，不可以一開始就騎太快，不然很快就會沒力。
如果沒有到外面玩，我在家裡就會唱歌、畫圖。我每周三晚上上畫畫課；每周一晚上去合唱團唱歌，所以有時候在家裡要練習唱歌；有時候要練習畫圖。看到自己畫的圖越畫越美，感覺蠻有成就感的；聽到自己的歌聲越唱越好聽，也有一樣的感覺。
有一條山歌是這樣唱的：空閒時候唱山歌，人生不必太過勞，貧窮富貴命中定，身體健康快樂多，這條山歌是說人的命運是注定的，不過我不是完全相信命運个人，我覺得人生還是要努力工作，但是現在的時代確實跟以前不一樣了，除了努力工作之外，也要有適當的休閒活動來做平衡，人生的路才會走得久、走得長。
