文／曾馨儀，苗栗造橋客家人，北科附工客語文支援教師，這下歇桃園市桃園區（四縣腔）
當多人想愛體驗農村个生活，在郊區有土地个人，會將無耕種个土地，整理一角一角仔个「開心農場」。贌分人來做「試耕農」。體驗種菜、種花、種藥草，乜有人將果子園个水果樹，一頭一頭仔開放分人認養，到時就做得體驗自家摘果子个趣味。有兜人勞動體力無法度勝任了，跈等用恁樣个方式來增加收入，園仔也毋會荒忒。
農村个人「北漂南漂」去都市尋頭路生活，都市个人就想去鄉下做「試耕農」，歇農舍放鬆樂線，遠離紛亂个城市。都市个細人仔，連蒔田割禾就毋識看過，頭腦精鑽个生理人，避暑會有農村生活體驗營，專門安排學生仔去田項體驗割禾蒔田。細人仔皮嫩腳幼，看著濫膏泥地，腳就毋敢踏落去，在脣項比比企。有兜較大膽个就敢落田去捋禾紮，感覺趣趣仔，分穀毛禾葉虐著噦噦滾，緊喊癢緊喊毋敢。恁樣个體驗學生仔一擺就驚著哩喲！
想自家種菜个，贌一角地來做「試耕農」，吂識種過就恅著異生趣。改菜箱、委菜仁仔、淋水，拚歸晝邊仔，手軟腳犁、𤸁凹凹仔。
還愛逐日去巡一下，看著菜仁仔暴芽，菜秧仔一皮葉、二皮三皮葉，逐日看緊生緊大，心肚當歡喜，過無幾久，就有菜好摘哩。總係「人會，天會斷」堵著落大雨，菜分水打壞忒，第二日又出日頭，摎菜曬到綿忒。無閒洎杈做到兩頭空，辛苦个心血全無忒哩，道嘆種菜難，就毋敢再喊菜價貴了。過後，還係選擇去「熊大農場」搞，想要種麼个，就種麼个，雞鴨、果子水產項項有，自由又好搞。
𠊎乜好做一個耕花草个「試耕農」，在屋下个陽台項，無異大个地方。種一列黃金虎尾蘭，葉仔形體盡靚，朝晨个日頭絲，箭到黃金虎尾蘭葉面項。金黃金黃个彩光加上葉邊脣乜係淡黃色，有醹有淡个色目，有光摎影相映，該「靚」用水墨就難書寫出來。也有多肉花草摎開紅色「蕾絲花邊」个沙漠玫瑰，還有會分人醉心个嬌客睡蓮花。
在陽台頂，雖然正半日照个環境，佢兜當增志，逐年熱天就會開出餳人高雅个靚花。清風柔柔仔吹過來，飄送「暹羅茉莉」蓮花个香氣，餳𠊎譜出詩篇，記錄花開花落个生命光彩。
華語
現在很多的人喜歡體驗農村个生活，在郊區有土地的人，會將沒有耕種的土地，整理一塊一塊的「開心農場」。租給人來當「試耕農」。體驗種菜、種花、種藥草，也有人將果園的水果樹，一顆一顆開放讓人來認養，到時就可以體驗自己採摘水果的樂趣。有些人勞動體力無法支撐了，也會用這樣的方法來增加收入，田園也不會荒廢。
農村的人「北漂南漂」到都市工作生活，都市的人想去鄉下當「試耕農」享受悠閒農耕，遠離塵囂。都市的孩子，連插秧割稻就不曾看過，頭腦靈通的生意人，寒暑假都會有農村生活體驗營，專門安排學生去田裡體驗割稻插秧。小孩子細皮嫩肉，看到爛泥巴地，腳也不敢踩進去，而在旁邊排排站。有些比較大膽的，就敢下田抱起稻穀串，感覺很有趣，讓稻穀毛刺到哇哇叫，一邊喊癢一邊喊不玩了。這樣的體驗學生們一次就受驚嚇了！
想要自己體驗種菜，會想租一塊地來種看看，不曾種過菜會覺得很有趣。翻地、撒種子、澆水，忙了半天，手腳酸軟、疲憊不堪。
每天還要去菜園看一下，看到種子發芽，菜葉一片、二片三片，每天越長越大，心裡非常高興，過沒多久，就有菜可以採摘了。總是「人算不如天算」遇到下大雨時，菜被雨水淋壞了，第二天又出太陽，把菜曬爛了。忙忙碌碌的白做工，辛苦心血全沒了，哀嘆種菜好難，就不敢抱怨菜價貴了。以後，還是選擇去「熊大農場」玩，想要種什麼，就種什麼，雞鴨、水果海產每一樣都有，輕鬆又好玩。
我喜歡當種花花草草的「試耕農」，在家裡的陽台上，不大的地方。種一列黃金虎尾蘭，葉子的型態很美，早上的陽光，灑到黃金虎尾蘭的葉面上。金黃色的彩光加上葉邊的鵝黃色，有濃有淡的光與影相映，那份「美」用筆墨也難以形容。還有多肉植物與開紅色「蕾絲花邊」的沙漠玫瑰，以及讓人心醉的睡蓮嬌客。
在陽台上，雖然只有半日照，植物們鬥志高昂，每一年夏天都會開出迷人高雅的花。微風輕柔的吹著，飄送「暹羅茉莉」睡蓮的香氣，讓我能譜出詩篇，記錄著花開花落的生命光采。
