文／劉淑娟，客語支援教師，新竹縣芎林紙寮饒平人，這下戴新竹市
母親節，又會到來咧。
𠊎手機傳來阿妗仔个訊息，問講：「今年，母親節愛幾時過？當日做好無？」𠊎䀴著訊息，心肝頭怩忸一下。「母親節」，正經係分人為難个日仔。
𠊎脣頭有兩个阿姆：降𠊎个阿姆，還有家娘。家娘雖然無講，心肝肚緊望子兒世細做得轉齊。毋過，這下个後生人，大體在外鄉食頭路、讀書，轉一輪，所費重，時間又逼。𠊎理解，也無力。毋敢講出嘴，驚分人講𠊎愛「情緒勒索」，還較驚𠊎个期待變做佢兜个壓力。
家娘若係䀴著孫仔無轉齊，目汁叭叭跌。𠊎乜知，後生人有佢兜个為難。順得哥來逆得嫂，實在難做人。逐年到這个時節，毋單淨愛哀奶家娘，還愛無閒洎杈準備飯菜。食飯个時節，歸屋人歡喜靂天，有講有笑；食飽飯嗄儕儕詐毋知閃俐俐，𠊎䀴著桌頂，狼離狼犁，心肝拶拶，真無奈。
妹仔有閒，斯會挷縫轉來陪𠊎過母親節，𠊎心肝肚異歡喜。毋過該日，妹仔無法度轉來。𠊎心肝肚早斯有按算，今年摎又會往年共樣。該日，𠊎定著又愛打早跋跆起來，在灶下𫟧上𫟧下煠飯、炣菜；食飽晝，還愛撿揫。等做得敨下氣、歇下睏个時節，定著又會䀴著阿妗仔歸屋人嘻嘻哈哈摎家娘慶祝母親節个畫面。𠊎正想著，喔！𠊎乜係阿姆啊！𠊎心肝肚除忒淰淰个孤栖，乜有深深个無奈，還有多少仔心疾。
𠊎自細分爺哀教到當馴：「愛知做、知人我、知上知下。」做新婦个𠊎，知家娘望孫仔轉來；做阿姆个𠊎，乜係頭望望仔啊。毋過這下个後生人愛讀書、上班、轉一輪，愛盤車幾下輪車，愛宕幾多時間啊。
這幾年都係恁樣，𠊎總係無法度轉去摎阿姆共下過母親節，斯做得打電話講：「阿姆，母親節快樂。」外家个阿姆總係笑笑仔應：「你有轉來个日仔，斯係生日、母親節咧，無閒毋斯䟓工轉啦！」
𠊎聽著，心肝捺捺仔疾。係啊，「爺娘想子長江水，子想爺娘擔竿長。」這下，𠊎真正體會著阿姆个心情，真重啊。「降子毋知娘辛苦，降女正曉謝娘恩。」𠊎，總算知咧。
華語
母親節，又要到了。
我的手機傳來小嬸的訊息，問我：「今年母親節要什麼時候過？那天安排好了嗎？」我看著訊息，心裡一陣怩忸。母親節，對我來說，其實是讓人為難的一天。
我有兩位母親，一位是自己的媽媽，還有一位是婆婆。婆婆雖然沒說什麼，心裡卻總盼著子孫們能團圓。但現在的年輕人，大多在外地工作、讀書，要回來一趟，不但花費高，時間也很趕。我理解，也無可奈何。不敢多說，怕人說我「情緒勒索」，更怕自己的期待變成他們的壓力。
家娘如果看到孫子沒回來，眼淚就會撲簌撲簌地流下來。我也知道，年輕人有他們的為難。做人真的好為難。每年到了這個時節，不只要安慰婆婆，還要忙著準備飯菜。吃飯的時候，家裡熱鬧又歡樂，大家有說有笑；但飯後，大家各自散去，假裝沒事一樣，看到桌上亂七八糟，只留下我一個人在廚房收拾。心裡滿是鬱結，真是無奈。
妹兒如果有空，會抽空回來陪我過母親節，我自然很高興。但偏偏那天，她總是沒辦法回來。其實我心裡早就有準備，今年大概又會跟往年一樣。到了當天，我一定又得早早起床，在廚房裡忙進忙出，煮飯、炒菜。中午吃過飯後，還得收拾。等到能稍微喘口氣、休息片刻時，腦海裡又會浮現小嬸那一家人，熱熱鬧鬧陪著婆婆過母親節的畫面。就在那一刻，我忽然想著——喔！我不也是母親嗎？那一瞬間，我的心格外孤單，有著深深的無奈，也夾雜著一點點心痛。
從小我就被教導做人要懂事、體貼、知道分寸。做媳婦的我，明白家娘盼著孫子回家的心情；做母親的我，也一樣盼著自己的孩子啊。然而，現在的年輕人要讀書、要上班，回來一趟，不只得轉好幾趟車，還要花上不少時間。
這幾年一直都是這樣，我始終沒能回娘家陪媽媽過母親節，只能打電話跟她說：「阿姆，母親節快樂。」娘家的媽媽總是笑著回我：「你有回來的那一天，就是生日、母親節啦，沒空就別特地趕回來了！」
聽著她這麼說，我的心裡好痛。「爺娘想子長江水，子想爺娘擔竿長。」此刻，我真正體會到做母親的心情，是多麼沉重。「降子毋知娘辛苦，降女正曉謝娘恩。」我，總算明白了。
