文／李文煥，苗栗縣客家人，國中特教教師，現下戴苗栗（四縣腔）。
過年前，一個做中醫个好朋友送𠊎一副春聯：「蛇草齊榮澤百世，銀花紛舞迎千春。」𠊎相等這副對聯，心肚試著有一息仔疑狐，就問佢這頂項个句仔係對哪抄來个？朋友笑咪咪仔講：「這係𠊎自家愐出來个啦！今年係蛇年，𠊎想講用蛇哥有關係个藥草仔寫入對聯，故所選了白花蛇舌草。這藥草个效果當好，乜有康健長壽个意思，堵好適合拿來迎春納福。」
朋友講著蛇舌草个話題，分𠊎心肝頭怩忸一下，勾起𠊎二十年前个回憶，思緒轉到讀大學个時節，該段同餔娘正熟事个日仔。
因為目珠著病个關係，𠊎挷後到二十六歲正入大學讀書，大學三年生該年，𠊎認識了一個細𠊎兩屆个僑生學妹，雖然兩儕年紀差了九歲，毋過十分合線（註1）異有話講，見擺共下就講到毋會煞。該學期尾天時當寒，𠊎有一息仔寒著毋鬆爽，毋過還係堅持在圖書館个資源教室讀書。學妹知著以後，有一日佢神神秘秘交分𠊎一隻暖杯（註2），笑嘻嘻个講：「摎這啉忒，保證你跈等好起來。」
𠊎接過杯仔，黏時有一息仔面紅——這係佢用過个杯仔呢！撙開來看，裡肚係豬肝色个茶水，帶等淡淡个青草香。𠊎疑狐个問：「這係麼个？」佢爽快个講：「莫囉嗦，啉落去就好！這係白花蛇舌草泡个茶，逐擺𠊎係講寒著，吾姆就會泡這分𠊎食，跈等就見效喔！這係吾姆䟓䟓分𠊎對吉隆坡帶過來个，𠊎乜單淨有這一細罐仔定定，當寶貴个呢！」
該下，𠊎个心分一股暖流包圍，就像感覺著厥姆遠遠个關心，乜對佢溫柔个話語裡肚，感受到淰淰个關愛。運命就係恁樣奇妙，月老个紅線，竟然係這杯蛇舌草茶牽成个。當𠊎啉落該帶等青草清香摎烏糖甜味个茶時，毋單止身體漸漸仔鬆爽起來，心肚乜激起一圈圈甜甜个水紋。
聽講老頭擺有一儕人，佢輒輒會做好事，見擺堵著落難个動物，定著會行兼去救助，尤其係救分人捉著个蛇去放生。毋知仰般？佢嗄著著「肺爛」，身體也病到緊來緊殗弱（註3），尋了當多醫生都醫毋好。有一日，總算請著一隻有名个先生來看，頭下碼這先生乜愐毋出用麼个藥方，下後佢發夢一個著白衫个仙女，摎佢講用田脣開白花个細草仔做藥仔。睡醒以後，佢在田脣尋著了夢肚看著个細草仔，就賭造化同佢炙分病人食，結果正經摎病醫好了。這隻藥草仔就恁樣傳下來，分人安到「白花蛇舌草」，乜有一種「善有善報」个象徵。
時光流轉，一𥍉目，相隔該一杯蛇舌草茶，既經過忒二十零年了。舊年年下仔，丈人哀來台灣遶尞，還䟓䟓為𠊎這寶貝婿郎，帶來一大包蛇舌草精。看等這包坐飛機過來个等路，心肝肚有淰淰个燒暖，這毋單淨係退火解毒个藥草仔定定，裡背還裝等丈人哀對婿郎深深个痛惜。在這乍暖還寒个暗晡頭，𠊎兜等一杯燒燒个蛇舌草茶，想著這奇妙个緣份，前世𠊎定著乜有做當多好事，今生正會有恁美好个姻緣，有恁和挼个家庭。
（註1）合線：gabˋxien，指一種人際關係的和諧與契合，近似投緣、合得來。
（註2）暖杯：nonˊbiˊ，這是名詞，指的是保溫杯。
（註3）殗弱：ngiem ngiog，虛弱、衰弱，形容身體極度不適。
華語
過年前，一位從事中醫的好朋友送我一副春聯：「蛇草齊榮澤百世，銀花紛舞迎千春。」我仔細端詳這副對聯，心裡產生了一絲疑惑，便問他這句話是從哪裡抄來的？朋友笑盈盈地說：「這是我自己想出來的！今年是蛇年，我想用與蛇有關的藥草入聯，所以選擇了白花蛇舌草。這種藥草的功效很好，也寓意健康長壽，正適合用來迎春納福。
朋友談起蛇舌草時，我的心頭微微一顫，勾起二十年前的回憶，思緒回到大學時期，那段與妻子相識的歲月。
因為眼疾的關係，我直到二十六歲才進入大學就讀。大學三年級時，我認識了一位小我兩屆的僑生學妹，雖然我們年齡相差九歲，但卻非常投緣，總有說不完的話，每次見面都聊到捨不得停下來。那年冬天，我有點感冒身體不適，但仍然堅持在圖書館的資源教室讀書。學妹得知後，有一天神神秘秘地遞給我一個保溫杯，笑盈盈地說：「把這個喝了，保證你很快就好起來。」
我接過杯子，臉頓時微微發燙——這是她用過的杯子呢！打開杯蓋，裡面是深褐色的液體，散發著淡淡的青草香。我疑惑地問：「這是什麼？」她爽快地說：「別囉嗦，喝下去就對了！這是白花蛇舌草泡的茶，每次我感冒，我媽咪就會泡這個給我喝，很快就見效！這是我媽咪讓我從吉隆坡帶過來的，我只有這麼一小罐，珍貴得很呢！」
那一刻，一股暖流湧上心頭，彷彿感受到她母親遠方的關愛，也從她溫柔的話語裡體會到濃濃的關心。命運就是這麼奇妙，月老的紅線，竟然是這杯蛇舌草茶牽起的。當我喝下這杯帶著青草清香與黑糖甜味的茶時，不僅身體逐漸舒暢，心裡也泛起一圈圈甜蜜的漣漪。
傳說古時候有一個人，他常常會做好事，每次遇到落難的動物，一定會上前去救助，尤其是救下被人抓到的蛇去放生。不知道為何？他竟然得了「肺癕」，身體也病的越來越虛弱，找了很多醫生都醫不好。有一天，總算請到一位有名的醫生來看，起初這位醫生也想不出用什麼藥方，後來他夢見一位穿白衣的仙女，告訴他用田邊開白花的細小草藥來做藥。睡醒以後，他在田邊找到了夢裡看見的細草，就碰運氣把它煎給病人服用，結果真的把病治好了。這種藥草就這樣流傳下來，被人叫做「白花蛇舌草」，也有一種「善有善報」的象徵。
時光飛逝，轉眼間，距離那一杯蛇舌草茶，已經過了二十多年了。去年年底，岳母來台灣遊玩，還特地為我這個寶貝女婿，帶來一大包蛇舌草精。看著這包搭飛機過來的禮物，心裡充滿暖意，這不單單只是退火解毒的藥草而已，裡面還裝著岳母對女婿深深的疼愛。在這乍暖還寒的夜晚，我端著一杯熱熱的蛇舌草茶，想著這奇妙的緣分，前世我一定也做了很多好事，今生才會有這麼美好的姻緣，有這麼和樂的家庭。
