文／田淑芬，台南市客語支援教師，新竹竹北人，這下戴台南市（海陸腔）

從細戴在莊下，生活環境都當單純，慢慢大咧，有去外地讀書个機會，正發現世界恁大，生活變做較多采多姿，認識無共樣个人。高中畢業，考着台中个學校，該量時係𠊎第一擺離開屋下恁遠，逐項都愛自家來，無屋下人陪，心肝肚感覺當孤栖，因為人生地毋熟，前幾隻月見擺打公用電話轉屋下，聽着阿姆个聲，目汁斯溚溚跌，無講兩句話斯愛煞煞摎電話切忒，無愛分阿姆聽着𠊎在該噭，斯驚佢會愁慮放毋落心。

正去台中頭兩、三隻月，逐禮拜放尞日坐火車轉新竹，收假又毋盼得轉學校，逐擺都坐尾枋車，𠊎心肝肚想一定愛尋一件事來做，正毋會逐日想東想西。過後斯想去參加社團，𠊎摎同學先去學校最大个社團「康輔社」看下，看着阿哥阿姊展出十八般个招式煞猛唱跳，儕儕都當活潑，當斯文个𠊎兜嗄嚇到毋敢停動，社團活動還吂結束，𠊎兩儕斯偷偷瀉走，驚怕分阿哥阿姊喊轉去。過後，又去「心輔社」，社團个人儕儕看起來當親切，大家聽別儕个煩惱，乜會分享自家个意見，恬恬聽人講話正經較適合𠊎，阿哥阿姊當照顧新生，分𠊎兜安全感，感覺生份个新環境有一群人了解你，會分擔你个愁慮，漸漸仔，𠊎會摎社團个同學打嘴鼓、共下食飯、出去唱歌、打球、遼山花等等，平時除忒讀書外，可能係有伴咧，感覺心肝窟安定自在。

社團肚共隊有一個細倈仔，佢看起來身體已砸磳，係好運動个人，大部份時間佢都當恬靜，恬恬聽其他人講話，當少看佢分享自家个事情，下後正聽阿姊講佢係無考着理想个大學，想愛休學重考，阿姊斯渡佢來這社團緊勸話佢，希望佢留下來繼續讀書。恁堵好厥教室斯在𠊎教室隔壁，斯恁樣，𠊎兜當輒常去社團，慢慢仔斯較認識咧！佢當單純，毋過當貼心，當會照顧同學；佢當恬靜，毋過人緣已好，當多朋友當好湊佢去打球；佢乜當省儉、老實，時常毋盼得使錢買好个東西來食。

慢慢仔，𠊎有機會斯想愛在厥教室前行過，無事情乜䟓工經過斯想愛看佢一面，有麼个好食个斯想摎佢分享，有麼个生趣个事乜想愛講分佢聽，斯恁樣，𠊎戀愛咧…一見着面就會面紅紅燒燒，心肝乜緊嗶哱跳，正經堵着講話，舌嫲又打結講毋出來，該份純真、淡淡个感情分人感覺心肝肚撓撓，𠊎永遠記得牽着手分對方掣着个感覺；共下坐在操場看五月天个該場演唱會；該暗晡在大肚山看夜景个浪漫，摎著个人共下，目珠肚、心肝肚全係淰淰个愛意。

頭擺識聽阿姆講佢摎阿爸係媒人講親結婚个，細个時節試著哪有可能啊？！毋認識、無見過面个兩儕人斯講親後就結公婆咧！𠊎个時代摎爺哀無共樣，毋過，現下時代乜摎𠊎个無共樣咧，這下後生人當好談「速食愛情」，毋過𠊎還係試着愛情愛對做朋友開始，互相了解對方，兩儕人對事情个看法，做事个處理方式，對用錢、未來个想法、觀念等都愛爭無幾多正做得，無下二擺微毛末節个細事情都有可能分兩儕人相吵泌背，祝福天下眷屬都係有情人，有情人都做得成眷屬。

華語

從小住在鄉下，生活環境都很單純，慢慢長大了，有去外地讀書的機會，才發現世界很大，生活變得較多采多姿，能認識不同的人。高中畢業，考到台中的學校，那時是我第一次離家這麼遠，每件事都得自己打理，沒家人陪，心裡感覺很孤單，因為人生地不熟，前幾個月每次打共用電話回家，聽到媽媽的聲音，眼淚就一直掉，沒講二句話就趕緊要把電話掛掉，不讓媽媽聽到我在哭，就怕她會擔心放心不下。

剛去台中的前兩、三個月，每週放假我會坐火車回新竹，收假又捨不得回學校，每次都坐末班車，我心裡想一定要找一件事來做，才不會每天胡思亂想。後來就想去參加社團，我和同學先去學校最大的社團「康輔社」看看，看到學長姊使出十八般武藝賣力唱跳，每個人都很活潑，很秀氣的我們卻嚇到不敢亂動，社團活動還沒結束，我們兩個就偷偷溜走，生怕被學長姊叫回去。之後，又去「心輔社」，社團的人看起來都很親切，大家聽別人的煩惱，也會分享自己的意見，靜靜聽人講話真的比較適合我，學長姊很照顧新生，給我們安全感，感覺陌生的新環境有一群人了解你，會分擔你的憂愁，漸漸的，我會和社團的同學聊天、一起吃飯、出去唱歌、打球、旅行等等，平時除了讀書外，可能是有伴了，感覺心裡安定自在。

社團內同隊有一個男生，他看起來身體蠻高大，是喜歡運動的人，大部份時間他都很安靜，靜靜聽其他人講話，很少看他分享自己的事情，後來才聽學姊講他是沒考到理想的大學，想要休學重考，學姊就帶他來這個社團並勸他，希望他能留下來繼續讀書。這麼剛好他的教室就在我的教室隔壁，就這樣，我們都很常去社團，慢慢的有比較認識了！他很單純，不過很貼心，很會照顧同學；他很安靜，不過人緣很好，很多朋友都喜歡找他去打球；他也很節儉、老實，時常捨不得花錢買好吃的東西來吃。

漸漸的，我有機會就想在他的教室前走過，沒事情也要特地經過，就想要看他一面，有什麼好吃的也想和他分享，有什麼有趣的事也想要講給他聽，就這樣，我戀愛了…一見到面就會臉紅紅熱熱的，心臟也一直蹦蹦跳，真的見到面講話，舌頭又打結講不出來，那份純真、淡淡的感情給人感覺心裡癢癢的，我永遠都記得牽到手給對方電到的感覺；一起坐在操場上看五月天的那場演唱會；那一晚在大肚山看夜景的浪漫，和對的人在一起，眼裡、心裡全是滿滿的愛意。

以前曾聽媽媽說她和阿爸是媒人講親結婚的，小時候聽到感覺不可思議？！不認識、沒見過面的兩個人，說媒後就結婚了！我的時代和爸媽不一樣，過，現在時代也和我的不一樣了，現在年輕人很喜歡談「速食愛情」，不過我還是覺得愛情要從做朋友開始，互相了解對方，兩人對事情的看法，做事的處理方式，對用錢、未來的想法、觀念等都要相差不多才行，不然之後雞毛蒜皮的小事情都可能鬧翻天，祝福天下眷屬都是有情人，有情人都能成眷屬。