文／李文煥，苗栗縣客家人，國中特教教師，現下戴苗栗（四縣腔）。
今年係蛇年，想來尋兜仔摎「蛇」有關个故事，希望增加教學時个趣味，堵好看著一隻古當生趣。「頭擺頭擺有一條蛇哥，毋堵好趖入去木匠仔个屋下，在爬過暗摸摸仔个壁角該央時，肚底嗄分橫在地泥頂个鋸仔割著。蛇哥恅著係分鋸仔攻擊，佢試著當譴，斡頭對鋸仔呷過去，吂知搣到歸嘴仔血流血著。痛到耐毋得个蛇哥還較起惡，黏時歸條蛇身纏上去，盡命牯想愛縮死鋸仔。結果，蛇哥因為流血昶多消忒了，其實從頭到尾鋸仔就無攻擊蛇哥，蛇哥根本就係自家搣死自家个啦！」
這隻蛇哥个故事，分𠊎想著發生在吾叔伯老妹个冤枉事。叔伯老妹阿燕仔嫁到台中大肚山項，兩公婆雖然差十二歲，毋過十分相愛。阿燕仔係護理師，阿榮整一間板金工廠。結婚以後，為著照顧兩個細孲仔，阿燕仔辭忒頭路在屋下做兜仔手事，全心照顧家庭，雖然生活毋係當好過，還係有平凡个幸福。
但係，隨等台灣大環境个變化，阿榮个工廠生理緊來緊差，肩頭个壓力乜緊來緊重。為了排解心肚个煩惱，佢開始借酒消愁。過年期間，佢毋想出門，也毋帶細人仔行春，因為佢想著踏出家門就會增加開銷。年初一暗晡頭，阿燕仔在灶下無閒洎汊，準備張分歸家人食夜。因爭手項个事頭當多，進度比往擺有較慢一息仔，阿榮在廳下等食，心情十分煩躁。
無想著在該央時，阿榮堵好睞著阿燕仔一片煮食，一片劃手機仔，笑咪咪仔毋知同麼儕講話？佢膦火當著，行兼去喝問：「妳摎麼儕在該講話，恁暢正得？」無等阿燕仔解釋，阿榮搶過手機仔，看著係阿燕仔同國中男同學个對話，佢譴著面色壢青火屎燦天。酒精上腦分佢失忒理智，恅著餔娘定著對佢不忠，竟然發狂抨阿燕仔。阿燕仔目汁濫泔揞等面大噭：「佢單淨係吾个老同學定定，過年時節相借問一下仔，恁樣做毋得喺？」毋過，該央時阿榮譴到目珠起赤沙，根本聽毋入任何个解釋。
年初二，阿榮醉酒清醒了後，看著阿燕仔面項个烏青，心肚十分後悔同艱苦，無想著一時起番性，嗄造成恁得人驚个結果。唉！這好好个婚姻嗄必縫無法補！阿榮跪下來同餔娘會失禮，毋過阿燕仔還係絕心轉妹家。包尾，好恬恬个兩公婆離婚了，正經分人試著當打爽。
蛇哥摎阿榮个故事，像一面鏡仔，照出情緒失控个危險。蛇哥因為一時个發譴，嗄送忒自家个命；阿榮因為一時个發狂，嗄錯過了最愛个人。新个一年，𫣆俚愛時刻提醒自家，做人做事定著愛「一步棋，想三步」。千萬莫像蛇哥摎阿榮共樣，因為一時个發性，造成無法救轉个遺憾。
華語
今年是蛇年，想來找一些和「蛇」有關的故事，希望增加教學時的趣味，恰好看到一個故事很有趣。」從前從前有一條蛇不小心爬進木匠的家，在黑暗的角落裡，牠的肚子被地上的鋸子割傷了。蛇以為是鋸子攻擊牠，憤怒地回頭咬鋸子，結果嘴裡流了很多血。痛苦的蛇更加生氣，纏繞著鋸子想要勒死牠。最後，蛇因為失血過多而死。事實上，鋸子從頭到尾都沒有攻擊蛇，蛇完全是自己害死自己的。」
這個蛇的故事讓我想起堂妹阿燕的委屈。阿燕嫁到了台中大肚山上，兩夫妻雖然相差十二歲，但非常相愛。阿燕是護理師，阿榮經營一家板金工廠。結婚後，為了照顧兩個孩子，阿燕辭去了工作，在家做些手工，全心全意照顧家庭。雖然生活不算富裕，但也過著平凡的幸福日子。
然而，隨著台灣大環境的變化，阿榮的工廠生意越來越差，肩上的壓力也越來越重。為了排解心中的煩悶，他開始借酒消愁。過年期間，他不想出門，也不帶孩子出去玩，因為他覺得那會增加開銷。大年初一晚上，阿燕在廚房忙著準備晚餐。因為事情很多，她比平時慢了一些。阿榮在客廳等得不耐煩，心情煩躁。
沒想到在那時，阿榮恰好喵到阿燕一邊煮食，一邊滑手機，笑咪咪的不知和誰講話？他努火中燒，行前去喝問：「妳和誰在那講話，這麼的開心？」不等阿燕解釋，阿榮搶過手機，看見是阿燕和國中男同學个對話，他生氣到臉色鐵青、怒火四賤。酒精上腦讓他失掉理智，以為妻子一定是對他不忠，竟然發狂毆打阿燕。阿燕滿眼淚水摀著臉大哭：「他只是我的老同學而已，大過年的互相問候一下，那樣也不行嗎？」然而，當時的阿榮氣到眼珠通紅，根本聽不進任何的解釋。
大年初二，阿榮酒醒之後，看見阿燕臉上的瘀青，心裡十分後悔和難過，沒想到一時起性子，卻造成那麼恐怖的結果。唉！這好好的婚姻卻產生列縫無法補！阿榮跪下來向妻子道歉，然而阿燕還是絕心回娘家。 最後，好端端的兩夫妻離婚了，真的是另人婉惜。
蛇和阿榮的故事就像一面鏡子，反映出情緒失控的危險。蛇因為一時的憤怒而喪命，阿榮因為一時的衝動而失去了最愛的人。新的一年，我們應該時刻提醒自己，做人做事要「三思而後行」。千萬不要像蛇和阿榮一樣，因為一時的衝動而造成無法挽回的遺憾
