文／温威程，高中生，彰化縣溪州鄉客家人，感謝李怡蘋先生指導寫作（四縣腔）
全國客家日，來源係還𠊎母語運動。母校成功國小西畔分校舊年12月28日舉辦「共下來西畔尞」个活動，看著大家共下來到這，無論係既經畢業个學生還係外地个人客抑係細人仔，「客語傳統文化生活學院」个存在乜係盡有意義，客家精神愛大家共下來傳承。
行在小學上課个路項，像轉到還細个時節。總講時間無情，逐擺轉來學校，都試著時間過到盡遽，看著該時个樹秧仔，這下生到盡高大了。
還𠊎母語運動係在36年前（1988年），客家人行到街路項抗議，希望做得開放客家語个廣播同電視節目。該時，有人擎等國父孫中山个相片，佢戴等嘴揞仔，頂背打一個大叉，大家人訴求講:「明明係客家人，仰仔做毋得講自家个母語？」2022年起勢，客委會同逐年12月28還𠊎母語運動這日定為「全國客家日」。
2024年12月28日，吾个母校舉辦活動——「共下來西畔尞」慶祝全國客家日，邀請著彭雅玲導演，帶等細人仔表演舞台劇，安到「伯公開party」內容係呼籲客語个重要，毋單淨係一種交流方式，乜有一種盡特別个意義，若係客語毋見忒，客家人乜會跈等消失。最尾一幕，𠊎兜摎葉仔對地泥項慢慢仔擎到頭那頂高，象徵𫣆俚後生人會繼續傳承客語，分客語做得像樹秧仔共樣，緊來緊壯旺。
活動還邀請著好日樂團摎歌手米莎。聽米莎演唱个《一百陣風》，看著大家都當歡喜、熱情，自家都試著身為客家人係當沙鼻个事情！毋單淨以上个節目，還有邀請著台中个李怡蘋先生來到分校，在大樹下講古。聽講啊，細人仔雖然毋會講客家話，毋過還係當認真聽等先生講故事，分𠊎試著客語漸漸影響大家，無論大細老嫩，客語傳承个路項，漸漸仔分大家知得。
活動結束該下，客語分𠊎愐著毋單淨係跈等時代个腳步，還較多个係，同細人仔共下表演，看著佢兜歡喜个笑容，就分𠊎想愛傳承客話个心更加有動力。老古人言：「寧賣祖宗田，不忘祖宗言；寧賣祖宗坑，不忘祖宗聲。」客語就像水，若係無水好啉，就代表客家毋見忒了，故所，愛𫣆俚後生人共下打造一個「𠊎講客」个時代！
華語
全國客家日，起源於還我母語運動。母校成功國小西畔分校去年12月28日舉辦「共下來西畔尞」活動，看到大家一起來到此地，不論是已經畢業的學生還是外地的客人抑是小朋友，「客語傳統文化生活學院」的存在也甚之重要，客語的傳承要靠大家一同努力。
走在國小上學的路上，彷彿回到還是小孩的時候。常說時間無情，每次回來，都覺得光陰似箭，看到當時樹苗，現在已經長到繁枝綠葉。
還我母語運動是在36年前（1988年），客家人走上街頭抗議，希望可以開放客家語的廣播與電視節目。當時，有人舉著國父孫中山的相片，戴著口罩，打上一個大叉，大家的訴求是：「明明是客家人，為什麼不能說自己的語言？」2022年開始，客委會將每年12月28日還我母語運動這天訂為「全國客家日」。
2024年12月28日，我的母校舉辦活動——「共下來西畔尞」。慶祝全國客家日，邀請到彭雅玲導演，帶著小朋友們表演舞台劇，名叫——「伯公開party」內容的意涵是客語的重要，不僅僅是一種交流方式，也有一種特別的意義，若是客語消失，客家人也會跟著消失。最後一幕，我們將葉仔從地板緩慢舉到頭頂，象徵著我們這一代年輕人，會繼續將客語傳承下去，讓客語如同樹苗般，越來越茁壯。
還邀請到好日樂團及客家歌手米莎。聽著米莎的《一百陣風》，看到大家都很愉悅、熱情，身為客家人的自己都覺得很驕傲！不只以上節目，還有邀請到台中來的李怡蘋老師到分校，在大樹下講古。聽說，小朋友雖然不會客家話，不過還是非常認真聽著老師說故事，讓我意識客語漸漸影響著大家，不論童叟，客語正走在路上，漸漸地受大家所知。
活動結束，客語讓我反思不只是走在時代上，更多的是，與小朋友一同演出，看到他們快樂的笑容，就讓我想要傳承客語的心更加有動力。諺語說：「寧賣祖宗田，不忘祖宗言；寧賣祖宗坑，不忘祖宗聲。」客語如水，若無水可以喝，就代表客家的消失，所以，需要我們年輕人一起打造一個「我講客」的時代！
