文／黃靖騰，苗栗縣客家人（四縣腔）
𠊎細細个時節，戴在鄉下，屋面前就係一大片田坵。風吹過來个時節，空氣肚總係帶等淡淡个青草香。該時，𠊎常常看著幾隻土狗仔在田脣打彳亍，臨暗仔還會緊走逐夕陽。𠊎對佢兜特別有好感，總係想愛摎佢兜共下搞，毋過阿姆驚毋衛生，頭下碼不准𠊎畜狗仔。包尾佢看𠊎一直唉唉唧唧想愛畜狗仔，正勉強同意帶轉一隻黃狗仔，安到「細虎仔」。
細虎仔逐日黏在𠊎脣頭，像分蝦公夾黏著樣仔。對𠊎揹等書包讀小學開始，一路陪到𠊎出莊讀大學。佢個性當活跳，成時堵著生份个狗仔會細聲吠，大了以後還會摎別个狗仔相咬，身項輒輒帶等一息仔幼傷。毋過佢在屋下人面前表現得當馴，總係拂等尾迎接𠊎放學轉屋。但係狗仔个壽命無異長，𠊎大學還吂卒業，細虎仔就消忒咧。該一駁仔𠊎心肚十分孤栖，輒輒想起佢在脣項舂上舂下个情景，也想著佢陪𠊎長大个該兜日仔。
下後，屋下又畜了一隻黃狗仔，名仔安到「布丁」。布丁看起來摎細虎仔有兜仔相像，尤其係該身金那那仔个毛，三不二時會分𠊎想起頭擺。毋過佢个性體溫和異多，毋多會去惹是非，單淨當好咬隔壁鄰舍个鞋同晾在外背个衫褲定定，仰般教都教毋乖，𠊎高不將同佢綯在屋門口。就算係恁仔，布丁同𠊎還係十分親，逐擺看著𠊎都係當暢。該央時𠊎正知，狗仔對人个「忠」係生成个，就算成時仔會做毋著糟搣人，其實可能單淨係表達自家个需求同好奇定定，毋係挑事愛搣衰人。
包尾𠊎去外地讀書、做事，租个屋仔毋分人畜寵物，故所當久無同狗仔接觸咧！有一日，朋友帶𠊎去參加心輔犬个體驗活動，𠊎正重新拈轉頭擺該種對狗仔个親切感。現場个教練示範仰般用正面強化个方式摎狗仔互動，分兜仔零嗒、做兜仔細手勢，分佢兜一步一步仔了解：「跈等你行無危險，還有好食有好啉。」原來對毋熟事个狗仔，一開始毋好忒熱情行兼，也毋好大聲喝咄，愛先分佢兜知𫣆係安全个。
這兜心輔犬本旦都係流浪狗仔，一開始對人當有戒心，毋過在不斷个友善互動摎餵佢兜後，背尾竟然會主動行兼來，用鼻公凴大家个手，目珠肚開始帶等信任。看等佢兜个轉變，𠊎實在當驚喜，也忽然想著，畜細虎仔同布丁該時節，其實𠊎無要領好好去教，單淨係照感覺去畜定定，錯過了盡多做得更加了解佢兜个機會。這擺个體驗分𠊎愐著，狗仔對人類个愛摎忠心係無條件个，若係𫣆俚做得對佢兜較用心，定著分佢兜過著更加暢快个生活。
華語
我小時候住在鄉下，家門前是一大片田地。風吹過來的時候，空氣裡總帶著淡淡的青草香。那時候，我常常看著幾隻土狗在田邊閒晃，傍晚還會追著夕陽奔跑。我對牠們特別喜歡，總想要和牠們一起玩，但媽媽擔心不衛生，開始不准我養狗。最後她看到我一直嚷嚷著想養狗，才勉強同意帶回一隻黃狗，取名叫「小虎」。
小虎每天都黏在我身邊，像被大花咸豐草黏住一樣。從我背著書包上小學開始，一路陪伴我到離家上大學。牠個性非常活潑，經常對陌生狗低聲吠叫，長大後甚至會和其他狗打架，身上常常帶著小傷口。不過牠在家人面前非常溫馴，總是搖著尾巴迎接我放學回家。但狗的壽命不長，我大學還沒畢業，小虎就去世了。那段時間我心裡特別孤單，總是回想起牠在身邊跑跳的模樣，也想著那些一起長大的日子。
後來，家裡又養了一隻黃狗，取名叫「布丁」。布丁看起來和小虎有點像，特別是那身金黃色的毛，常常讓我想起小虎。但布丁性格溫和許多，很少惹麻煩，只是特別愛咬鄰居的鞋子和曬在外面的衣服，怎麼教都學不乖，我只能常常拉著牠坐在門口。但即使這樣，布丁還是很親人，每次看到我都特別開心。那時候我才真正明白，狗狗對人的忠誠是天生的，即使偶爾調皮搗蛋，也只是單純在表達需求和好奇心，並不是故意要搗亂。
後來我去外地讀書、工作，租的房子不允許養寵物，所以很久沒和狗狗接觸了。有一天，朋友帶我去參加輔助犬的體驗活動，我才重新找回對狗狗的那份親切感。現場的教練示範如何用正向強化的方式和狗互動，比如發小零食、做簡單手勢，讓牠們一步步理解：「跟著我走沒有危險，還有好吃好喝的。」原來，對不熟悉的狗狗，一開始不能太熱情撲上去，也不能大聲斥責，要先讓牠們知道我們是安全的。
這些輔助犬原本都是流浪狗，一開始對人非常警戒，但經過不斷的友善互動和餵食，最後竟然會主動靠近，用鼻子輕輕碰人的手，眼神中慢慢帶著信任。看到牠們的轉變，我既驚喜又感慨，忽然想到，當初養小虎和布丁時，我其實沒有好好學習怎麼教牠們，只是憑感覺去養，錯過了更多了解牠們的機會。這次體驗讓我深刻明白，狗狗對人的愛和忠誠是無條件的，只要我們願意多用心一些，一定能讓牠們過上更快樂、更安心的生活
