文／賴文英，國立中央大學客家語文暨社會科學學系兼任副教授（四縣腔）

正經期望做得成立全客語學區个「台灣客語大學」。

台灣現下雖然有三所客家學院，但係客語推動个成效還係當有距離，故所希望做得成立全客語學區个「台灣客語大學」，師生摎行政人員在學校當中，都愛用沉浸式客語為主要个教學語言摎溝通語言，包含下課後都愛用客語，相信用久了，就會自然講客了。教職人員係毋用客語就做毋得繼續聘用，但係為著提升客語客家教學研究个層次，兼任先生做得彈性。對學校个沉浸式客語做起，漸漸仔擴散到周邊个客家社區，抑係講請社區居民成為「台灣客語大學」个社工、課助，同時設立專班分中長年者來修課，寒暑假辦理客語知識性營隊……，種種，總講，復振客語、保存客語為本个客家文化資產為第一優先。

下背做得成立个學系（包含所），除忒第七點，列出優先順序个大概方向：

1. 客家語文教育學系，以語言、教育、教學為主體，做得用六腔分做六組。

2. 客家餐飲學系，也做得設立客家美食實習个餐廳，四年生來實習，分外背鼻香來个人客，聽得著淰淰靚靚个客話。

3. 客家觀光產業學系，除忒美食，重點放在有特色个客家產業个推廣。四年生來實習，結合在地社區特色來推廣做起。

4. 客家文化資產學系，重點放在客家文化資產个保存摎研究。

5. 客家科技發展學系，在人工智慧（AI）當發展个現下摎未來，結合科技來設計客語个數位教學，還過客語機械人等等个發明。

6. 客家傳播學系，包含電台廣播、電視電影戲劇个傳播等等。

7. 客家文化圖書館，有文物館、圖書館个結合，營造有咖啡香、擂茶香、膨風茶香个圖書館特色。做得由客家文化資產學系个師生來運作，咖啡香、擂茶香、膨風茶香就由餐飲學系四年生个學生仔共同來實習。

另外過有能力，再過附帶設立客語幼稚園、中小學等等。

雖然，成立一隻大學，又愛聘請會講客个專業師資斯無恁該，係講無法度一下仔都成立，一項一項慢慢仔做起，總係做得做出用客話為主體个台灣客家文化特色个大學，這也係國際上个第一間客語大學。

希望恁樣个建議、恁樣个聲音做得得著當多人个支持，還過分政府有關單位个重視摎正式个規劃。

華語

真心期盼能夠成立全客語學區的「台灣客語大學」。

台灣目前雖然具有三所客家學院，但是客語推動的成效還是有很大的落差，在此希望可以成立全客語學區的「台灣客語大學」，師生與行政人員在學校當中，都要用沉浸式客語為主要的教學語言與溝通語言，包含下課之後都要說客語，相信說慣了，就自然會講客了。教職人員若不用客語就不得續聘，但是為了提升客語客家教學研究的層次，兼任教師可以彈性。從學校的沉浸式客語做起，漸漸擴散到周邊的客家社區，抑或是請社區居民成為「台灣客語大學」的社工、課助，同時設立專班予中長年者來修課，寒暑假辦理客語知識性營隊……，種種，總之，復振客語、保存客語為本的客家文化資產為第一優先。

以下成立的學系（包含所），除了第七點，優先順序的大概方向，可以如下：

1. 客家語文教育學系，以語言、教育、教學為主體，以六腔分做六組。

2. 客家餐飲學系，也可以設立客家美食實習的餐廳，四年級生來實習，讓校外聞香而來的客人，聽得到濃濃特色的客家話。

3. 客家觀光產業學系，除了美食，重點放在有特色的客家產業推廣。四年級生來實習，結合在地社區特色來推廣做起。

4. 客家文化資產學系，重點放在客家文化資產的保存與研究。

5. 客家科技發展學系，在人工智慧（AI）當道的現在與未來，結合科技來設計客語的數位教學，以及客語機械人等等的發明。

6. 客家傳播學系，包含電台廣播、電視電影戲劇的傳播等等。

7. 客家文化圖書館，有文物館、圖書館的結合，營造有咖啡香、擂茶香、東方美人茶香的圖書館特色。可以由客家文化資產學系的師生來運作，咖啡香、擂茶香、膨風茶香就由餐飲學系四年級生的學生共同來實習。

另外若有餘力，再附設客語幼稚園、中小學等等。

雖然，成立一所大學，又要聘請會說客語專業的師資，實不容易。若是無法一次性都到位，總能一樣一樣慢慢的做起，總是能夠做出用客語為主體的台灣客家文化特色的大學，這也是國際上的第一間客語大學。

希望這樣的建議、這樣的聲音可以得到許多人的支持，以及予政府有關單位的重視與正式的規劃。