文／洪俊傑（過庄尋尞腔：四縣、海陸、河婆腔混用）
今年8月个時節，𠊎同2儕朋友共下去印尼山口洋、馬來西亞古晉旅行，山口洋、古晉這兩隻位所，都在婆羅洲，這座島盡生趣，一共有3隻國家共下在這位生活。婆羅洲又分做上、下兩析地方，上片析對左手片開始係東馬來西亞砂拉越州（Sarawak）、首府古晉；向右係汶萊（Brunei）、首府斯里巴卡旺市（Bandar Seri Begawan）；右上析係沙巴（Sabah）、首府亞庇（Kota Kinabalu）；下片析係印尼，也安做加里曼丹（Kalimantan），其中个山口洋市（Singkawang）、坤甸（Pontianak）就係出名个印尼客家城市。
𠊎等這擺个行程，係對古晉入印尼山口洋，從台北先飛到西馬吉隆坡，再轉國內線飛到東馬古晉，打幫印尼朋友个𢯭手，早先安排好車伕，載𠊎等去印尼山口洋；古晉去山口洋个車程，差毋多係272公里（台北到嘉義），這段路程全無高速公路、淨有平面道路、山路，車程時間大約事愛花5點鐘，沿途中還做得看到盡多印尼鄉親採收棕櫚同一大片个棕櫚樹園；加上這係「跨國」行程，半路還愛經過邊境海關（馬來西亞畢阿越Biawak、印尼Aruk）查驗，同海關說明旅遊目的、行程以後，無麽問題就順利通關了，講實在「盡少會有台灣人曉恁仔安排旅行路線。」𠊎等3儕係帶等「尋跡南洋客家」个心情，來到這地方，盡心去探究印尼客家生活。
山口洋這地方，係印尼客家華人最多个城市，佢等客家源頭係來自中國河婆客，口音有兜接近海陸腔，用台灣客話同在地鄉親用客家話無問題，因為地理環境所爭，有兜詞彙、詞意就無恁該理解。在山口洋行尞个期間，有5日恁久，埠頭（註1）項全都看得著人賣粄，紅粄、鹹粄、甜粄等等，同粄攤頭家交關也做得直接講客，在這期間還堵著印尼國慶遶境、七月半搶施孤（註2）還有在地个「跳童」，做一擺看揫這十分難得个節目！
愛歸古晉前一日，山口洋車伕在電話中，用客家話同𠊎等講：「韶早臨天光5點去飯店載你兜，做得無？」
朋友問：「做麼愛恁早？」
車伕應講：「因為6點愛順路接人客，去古晉看病。」
無聽毋著，「對印尼山口洋去馬來西亞古晉看病！」這條路愛花5點鐘！
印尼朋友講，這種个醫療行程，對在地人來講，無麼見奇怪，係山口洋个日常。
準準5點一到，計程車就來吔。行李疊好以後，就出發去古晉。計程車係7人座，車仔裡背既經有愛去古晉个2儕人客，行了一段路後，其中1个人就用華語問𠊎等：「你們是台灣人嗎？」
𠊎同2位朋友就應講：「係。」
𠊎等5儕人就開始打嘴鼓，講到尾，原來佢等兩儕係來印尼做「全球客家串流計畫」。佢等兩儕也係在印尼盡有歷史个客庄「百富院（Sungai Duri）」做客家老山歌个研究，恁堵好堵著相同在客家圈工作个𠊎等3儕，一路上就互相分享客家个淵源，在車仔項、飯廳，𠊎等都共下行動，毋過，到古晉了後，𠊎等就分開了。
人講出國旅遊，最重要个係體驗在地个文化，還有在異鄉堵著共鄉人个特殊情感，這段車程只有短短5點鐘，毋過𠊎等把握在最短時間，同自家最好个故事、資源做一擺交流。毋知未來係毋係有機會相見，但這係𠊎第一擺出國，堵著个難忘回憶。
（註1）埠頭（河婆客語：puˋ theu）：偎海个市鎮、鄉野間个商業地區。
（註2）搶施孤（河婆客語：chiongˇ shiˋ ku）：山口洋中元普渡祭儀，「施」：普渡施捨、「孤」：無祀孤魂。施食、撫慰無祀孤魂。鄉親在祭典結束後，入到供品區搶食，形成「搶孤」。
華語
今年8月，我和2位朋友一起去印尼山口洋、馬來西亞古晉旅遊，山口洋、古晉這兩個地方，位處婆羅洲，這座島很有趣，一共有3個國家共同在這裡生活。婆羅洲又分成上、下半部兩個地區，上半從左手邊開始市東馬來西亞砂拉越州（Sarawak）、首府古晉；往右是汶萊（Brunei）、首府斯里巴卡旺市（Bandar Seri Begawan）；右上方則是沙巴（Sabah）、首府亞匹（Api）；下半部是印尼，也稱作加里曼丹（Kalimantan），其中的山口洋市（Singkawang）、坤甸（Pontianak）就是出名的印尼客家城市。
我們這次的行程，是從古晉去印尼山口洋，從台北先飛到西馬吉隆坡，再轉國內線飛到東馬古晉，幸好有印尼朋友幫忙，先行安排好司機，載我們去印尼山口洋；古晉去山口洋个車程，大約是272公里（約台北到嘉義），由於這段路程沒有高速公路、只有平面道路、山路，車程要5個小時，沿途還可以看到很多當地的居民在採收棕櫚及一大片的棕櫚樹園；因為這是「跨國」行程，中途還要經過邊境海關（馬來西亞畢阿越Biawak、印尼Aruk）查驗，跟海關說明旅遊目的、行程以後，沒什麼問題就順利通關了，講實在話「極少會有台灣人曉恁呢安排旅遊路線。」我們3人是帶著「尋跡南洋客家」的心情，來到這地方，盡情地探究印尼客家生活。
山口洋這地方，是印尼客家華人最多的城市，他們的客家源頭是來自中國河婆客，口音有點相似海陸腔，用台灣客語和在地鄉親用客家話基本上沒有問題，但因為地理環境因素，有些詞彙、詞意就沒這麼容易理解。在山口洋旅遊的期間，有5天這麼長，街上全都看得到人家賣粄，紅粄、鹹粄、甜粄等等，跟粄攤老闆買賣也可以直接講客語，這期間還遇到印尼國慶遊行、七月半搶孤還有在地的「跳童」，做一次看盡這十分難得的節目！
要回古晉前一天，山口洋司機在電話中，用客家話跟我們說：「明天清晨5點去飯店載你們，可以嗎？」
朋友問：「為什麼要這麼早？」
司機回應：「因為6點要順路接乘客，去古晉看病。」
沒聽錯，「從印尼山口洋去馬來西亞古晉看病！」這段路要花5點鐘呢！
印尼朋友說，這種醫療行程，對在地人來講，不是什麼大驚小怪，這就是山口洋的日常。
5點準時一到，計程車就來了。行李疊好以後，就出發去古晉。計程車是7人座，車裡已經前往古晉的2位乘客，行駛了一段路後，其中1個人就用華語問我們：「你們是台灣人嗎？」
我和2位朋友就講「是。」
我們5人就開始聊天，講到最後，原來他們是來印尼做「全球客家串流計畫」。在印尼很有歷史的客庄「百富院（Sungai Duri）」做客家老山歌研究，這麼剛好遇到同樣在客家圈工作的我們3人，一路上就互相分享客家的淵源，在車上、路邊小吃，我們都一起行動，不過，到古晉了後，我們就各自分開了。
出國旅遊，最重要得是體驗在地文化，還有在異鄉遇到同鄉人的特殊情感，這段車程只有短短5小時，但我們把握在最短時間，將自己最好的故事、資源做一次交流，不知未來是不是還有機會相見，但這係我第一次出國，遇到的難忘回憶。
