文／李文煥。苗栗縣客家人，國中特教教師，現下戴苗栗（四縣腔）
暗晡夜个月光特別圓，𠊎定定仔蹶來五樓坪頂，望等光華華个月光。手項拿等一粒綠豆膨，輕輕仔咬一口，該綠豆仁个香氣黏時舂入腦隔，思緒像係拉轉做細人仔該下。綠豆膨係吾家鄉特別个月餅，知總个人來到苗栗遶尞，定著會帶兩盒轉去食。這綠豆膨形仔盡生趣，中央留一隻窟分焙熟个內餡凸出來，看起來像人个肚臍，故所有人喊佢「肚臍餅」。另一種較細粒个，看起來像人个乳頭，毋知哪久嗄分人喊做「乳頭餅」。
記得還細个時節，吾屋下生活條件無異好，故所灶下乜無現代个烤箱同微波爐。毋過阿姆个手路當好，見擺就像撮把戲共樣，輒輒變出十分餳人个食雜。有一年八月半進前，阿姆頭一擺試做綠豆膨，佢一儕人在灶下無閒洎杈，亼麵糰、攪蕃薯粉、炒綠豆仁，逐粒綠豆膨都包等阿姆淰淰个愛。過無異久，阿姆摎緊出煙个綠豆膨對火爐兜出來，𠊎四姊妹目珠眼金金仔緊相，口涎水險險就會對嘴角跌下來。𫣆兜煞煞圍過去，該係𠊎第一擺食著綠豆膨，白雪雪个外皮像月光，金那那仔个料頭像卵黃，綠豆仁个甜味在嘴空肚化開，該種好食到耐毋得个味緒，到今還係𠊎心肚深深个念想。
兩個在外背讀大學个倈仔妹仔提早轉來團圓過中秋節，拜六暗晡雖然落一息仔雨毛仔，毋過微風柔柔仔吹過來，涼爽个屋簷下，顛倒適合來焙肉。看等四隻細人仔圍在火爐脣，隻隻都開容笑面盡歡喜，佢兜焙肉、打嘴鼓，兄弟姊妹互相分享在學校个生趣事，不時發出一陣陣笑聲。這幕圍等火爐个情景仰恁「火燒豬頭–熟面」，就像𠊎還細个時節，四姊妹圍等火爐等綠豆膨共樣！這和挼个天倫之樂，正經係用錢買毋著个幸福感受。
在這央時，𠊎心肝頭嗄怩忸一下，四隻細不仔（註）隻隻都會同𠊎平高了，毋多知仔佢兜會飛出這隻竇了！將來各各會有自家个生活同頭路，轉屋个機會定著緊來緊少。𠊎目珠眶有一息仔溼潤，心肚愐：「樹大杈椏，子大分家。這係當自然个事，毋管人生仰般變化，珍惜每一個當下，珍惜每一個共下，恁樣就好了！」
𠊎咬下第二口綠豆膨，幼幼个綠豆沙在嘴肚散開，雖然這毋係阿姆做个綠豆膨，但係這家鄉个味緒還係勾惹出𠊎童年个記憶。該種簡單个幸福，親像就在眼前，又像已經走到當遠。這綠豆膨毋單淨係家鄉个味緒，乜係阿姆个味緒，𠊎一生人都毋會添放忒！
（註）細不仔se bud leˋ：華語的近似詞是小不點、小蘿蔔頭，作者家裡常用這詞來代稱小孩。
華語
今晚的月亮特別圓，我慢慢的走上五樓露台，望著光華華的月亮。手上拿著一顆綠豆膨，輕輕的咬一口，那綠豆仁的香氣瞬間衝入腦海，思緒像是拉回童年時光。綠豆膨是我家鄉特別的月餅，熟知的人來到苗栗遊玩，一定會帶兩盒回去品嘗。這綠豆膨形狀很有趣，中央留一個洞給烤熟的內餡凸出來，看起來像人的肚臍，所以有人叫它「肚臍餅」。另一種較小顆的，看起來像人的乳頭，不知何時卻被人喊做「乳頭餅」。
記得還小的時候，我的家裡生活條件不是很好，因此廚房也沒有現代的烤箱與微波爐。然而媽媽的手藝非常好，每回就像變魔術一樣，時常變出十分誘人的食物。有一年中秋節之前，媽媽頭一回試做綠豆膨，他一個人在廚房忙得不可開交，揉麵團、攪蕃薯粉、炒綠豆仁，每顆綠豆膨都包著媽媽滿滿的愛。過沒多久，媽媽把一直冒煙的綠豆膨從火爐端出來，我們四姊妹眼珠睜著一直看，口水險險就會從嘴角掉下來。我們敢緊圍過去，那是我第一次吃到綠豆膨，白白的外皮像月亮，金黃的內餡像蛋黃，綠豆仁的甜味在嘴巴裡化開，那種好吃到受不了的味道，至今仍是我心裡深深的念想。
兩個在外頭讀大學的兒女提早回來團圓過中秋節，星期六晚上雖然下著毛毛雨，不過微風柔柔的吹過來，涼爽的屋簷下，反倒適合來烤肉。看著四個小孩圍在火爐旁，個各都笑容滿面十分開心，他們烤肉、聊天，兄弟姊妹互相分享在學校的趣事，三不五時發出一陣陣笑聲。這幕圍著火爐的情景怎那麼「火燒豬頭–熟面」，就像我還小的時候，四姊妹圍著火爐等綠豆膨一般！這祥和的天倫之樂，真的無法用錢衡量的。
在這時候，我心頭卻抽搐了一下，四個小不點各各都快和我差不多高了，不多時他們會飛出這巢！將來各各會有自己的生活與工作，回家的機會肯定與來愈少。我眼眶有一點溼潤，心裡想：「樹大杈椏，子大分家。這是很自然的事，不管人生怎麼變化，珍惜每一個當下，珍惜每一個相聚，那樣就足以！」
我咬下第二口綠豆膨，細細的綠豆沙在嘴裡散開，雖然這不是媽媽做的綠豆膨，但是這家鄉的味道還是勾起我童年的記憶。那種簡單的幸福，像似就在眼前，又像已經離開很遠。這綠豆膨不僅僅是家鄉的味道，也是媽媽的味道，我一輩子都不會忘懷！
