文／李文煥。苗栗縣客家人，國中特教教師，現下戴苗栗（四縣腔）
這一駁仔，逐禮拜三愛坐巴士入大湖教學，新竹客運5656會順等台六線駛，沿路个光景十分靚，有彎彎斡斡个路；有層層疊疊个山；還有一隻又一隻个窿。在路過彼岸吊橋時，車肚播音放送「法雲寺到了」，對正手析个車窗看出去，做得看著遠遠个觀音山，山頂有一間百年歷史个「法雲寺」。
講著法雲寺，𠊎回想起逐擺來這遶尞，定著會先湊老妹共下去看會講「阿彌陀佛」个鸚哥，有一擺𠊎四姊妹在看鸚哥个時節，堵著一個後生齋姑在飼鳥仔，該齋姑看𠊎四姊妹當得人惜，就講古分𠊎兜聽，該古也毋知敢係有影个？毋過𠊎到今還記得，今晡日就換𠊎來講古分大家聽。
有一日臨暗仔，一個四十零歲个男仔人，偷偷撂撂个趖入大雄寶殿，佢行到香油錢箱仔脣項。目珠向四周圍巡幾下轉，確定已經無信眾在這片，佛寺个師父乜做下去食夜了，佢黏時摎包袱仔鋪到地泥項，輕手輕腳摎錢箱仔倒覆在包袱仔項，裡肚輪(lin)出當多銀角仔，佢當煞手兩下半就摎該兜銀角仔用包袱仔做下款起來。
其實，在門口个暗影下，妙然師父同厥徒弟堵好行過，佢兩儕看到清清楚楚。細齋姑仔喊：「師父，有人在該偷錢！」師父細聲應：「莫出聲，莫嚇著佢。」細齋姑仔當緊張講：「𫣆應當愛去摎佢抓起來正係……」毋過，妙然師父嗄講：「毋使。」細齋姑仔問：「師父，做麼个無愛捉佢呢？佢偷了𫣆俚个錢，佢係賊仔呢！」
師父解釋：「佢毋係賊仔，因為該兜錢毋係𫣆俚个，還過你有看著該男仔人在該做麼个無？」細齋姑仔狐疑个問：「該仰般毋係𫣆俚个錢呢？」師父接等講：「該兜錢係信眾捐个，這下堵好有人需要，摎佢拿去用，仰做得講係偷𫣆俚个錢。你看該男仔人包袱仔款好以後，還跪在佛前雙手合十，嘴項細細聲緊念，佢若係賊仔，錢偷到手了仰般毋遽走，故所佢定著毋係賊仔。」
第二日臨暗仔，該男仔人又無聲無說來到佛寺，趕該兜師父去食堂个時節，煞煞舂到錢箱仔頭前，又過一擺拿走香油錢。這擺，又恁堵好分細齋姑仔同厥師父看現現。細齋姑仔見著，譴到蹦跳講：「師父，佢定著係賊仔啦！佢又偷走了𫣆俚个錢！」師父講：「有人奉獻錢銀，有人取用錢銀，上天安排錢愛分佢用，仰般講係偷錢？昨晡日佢拿走一部分，今晡日無罅又拿了一部分，世間事自有因果，佢仰會係賊仔？」細齋姑仔心肚當閼，毋過佢毋敢發譴，還係無奈何看等香油錢分該男仔人拿去。
年視年，一𥍉目過忒三冬，該隻偷錢个男仔人又來佛寺。這擺佢毋係臨暗仔來，係在光華華仔个日時頭來。佢慢慢仔行到錢箱仔頭前，在隨身个包袱仔裡肚，拿出一大疊紙票，跈等塞入香油錢箱仔。細齋姑仔看著愐毋解，行兼去問該男仔人：「施主，該係歸疊仔錢，你仰般恁捨得？」男仔人面繃紅，當敗勢講：「三年前，𠊎因為做生理失敗，又堵著阿姆發病仔當當愛用錢。唉！𠊎一時想無路行，就趖來這偷香油錢，雖然連兩日偷來个錢無幾多，毋過堵堵好分𠊎度過難關，𠊎在拿走香油錢个時節有跪等發願，係講有一日𠊎賺著錢了，定著愛加倍來還願。」
細齋姑仔摎這事情同妙然師父講，師父笑微微仔應：「人總會有落難个時節，𫣆俚分人一條生路，佢兜總會行出困境。香油錢係信眾个善捐，這下毋單淨渡人難關定定，包尾又加倍回轉，這就係善个循環！」
華語
這一陣子，每個禮拜三要坐巴士進大湖教學，新竹客運5656會順著台六線開，沿路的風景十分美，有蜿蜒迴轉的路；有層層疊疊的山；還有一個又一個的山洞。在路過彼岸吊橋時，車裡播音放送「法雲寺到了」，從右手邊的車窗看出去，能夠看到遠遠的觀音山，山頂有一間百年歷史个「法雲寺」。
講著法雲寺，我回想起每次來這遊玩，一定會先邀妹妹一起去看會說「阿彌陀佛」的鸚鵡，有一次我四兄妹在看鸚鵡的時候，遇到一個年輕尼姑在餵鳥，那尼姑看我四兄妹很惹人愛，就講故事給我們聽，那故事也不知是否真的？不過我至今還記得，今天就換我來講故事給大家聽。
有一天傍晚，一個四十多歲的男人，偷偷摸摸的滑進大雄寶殿，他走到香油錢箱旁。眼睛向四周圍巡幾轉，確定已經沒有信眾在這邊，佛寺的師父也都去吃晚餐了，他馬上把包袱鋪到地上，輕手輕腳把錢箱倒置在包袱上，裡面滾出很多錢幣，他手腳很快兩三下就把那些錢幣用包袱全部包起來。
其實，在門口的暗影下，妙然師父和他的徒弟剛好行過，他們兩看得清清楚楚。小尼姑喊：「師父，有人在那偷錢！」師父小聲應：「別出聲，別嚇著他。」小尼姑很緊張說：「我們應該要去把他抓起來才是……」不過，妙然師父卻說：「不必。」小尼姑問：「師父，為什麼不捉他呢？他偷了我們的錢，他是賊呢！」
師父解釋：「他不是賊，因為那些錢不是我們的，還有你有看到那男人在那做什麼嗎？」小尼姑狐疑的問：「那為何不是我們的錢呢？」師父接著說：「那些錢是信眾捐的，現在剛好有人需要，就把他拿去用，怎做得講是偷我們的錢。你看那男人包袱包好以後，還跪在佛前雙手合十，嘴上小小聲直念，他若是賊，錢偷到手了怎麼不快跑，所以他一定不是賊。」
第二日傍晚，那男人又無聲無息來到佛寺，趁那些師父去食堂的時候，趕緊衝到錢箱前面，又一次拿走香油錢。這次，又很巧被小尼姑和他的師父看見。小尼姑見著，氣急敗壞講：「師父，他一定是賊啦！他又偷走了我們的錢！」師父講：「有人奉獻錢銀，有人取用錢銀，上天安排錢要給他用，怎麼說是偷錢？昨天他拿走一部分，今天不夠又拿了一部分，世間事自有因果，他怎會是賊？」小尼姑心肚很鬱悶，不過他不敢生氣，還是無奈的看著香油錢被那男人拿去。
一年又一年，一眨眼過了三年，那個偷錢的男人又來佛寺。這次他不是傍晚來，是在明晃晃的白天來。他慢慢地走到錢箱面前，在隨身的包袱裡，拿出一大疊紙鈔，馬上塞進香油錢箱。小尼姑看到百思不解，行前去問那男人：「施主，那是整疊錢，你怎會那麼捨得？」男人臉很紅，很不好意思的講：「三年前，我因為做生意失敗，又遇著媽媽生病很需要用錢。唉！我一時走投無路，就摸來這偷香油錢，雖然連兩日偷來的錢不多，不過剛好讓我度過了難關，我在拿走香油錢的時候有跪著發願，若是有一天我賺到錢了，一定要加倍來還願。」
小尼姑把這事向妙然師父說，師父笑咪咪仔應：「人總會有困難的時候，我們給人一條生路，他們總會走出困境。香油錢是信眾的善捐，這下不只渡人難關而已，最後又加倍返回，這就是善的循環！」
