文／梁愛珠，客家語支援教師（腔頭：四縣腔）
家鄉逐年過年前後，一定會轉去公廳祭拜阿公婆，𠊎兜戴台南，考慮著年會到了人多車多，交通可能會較尖車，就選擇提早去祠堂，就算堵著冷咻咻个天時，共樣照計畫行，赴時間坐高鐵去桃園新屋个公廳，到了公廳摎事先準備好个牲儀放到神桌點香祭拜，簡單儀式過後，堵好有閒著，𠊎遽遽行去附近个傳統市場，逛市場一旦𠊎就盡好，尤其係逛客家莊个市場，該位有當多傳統美食，毋論係米食、青菜、水果、魚仔摎肉…‥等，都鼻得著在地个味緒。
𠊎從細在客家莊大，看著地泥頂擺攤个青菜、水果、米食，該兜東西感覺恁熟事又親切，黏時腦筋就倒轉去頭擺童年个時光，每年寒天个青菜有蘿蔔仔、玻璃菜、蒜仔、芹菜、韭菜；無想著現下面前出現有滷鹹菜同晒燥个蘿蔔乾，這兩樣菜係𠊎日日夜夜思念个好味緒。今晡日堵著佢兜，心肝肚个快樂同幸福無法度表達。
在巷仔肚還看著有菜包、艾仔粄、粄圓、紅粄、發粄、米篩目，還有其它各式各樣个粄，暢到耐毋得个𠊎當想愛全部買轉去，包尾，𠊎買了菜包、艾仔粄各六粒，萋頭金黃个鹹菜三斤、蘿蔔乾兩斤，這兜菜摎粄仔看起來係異普通个食材，仰般會分𠊎恁暢快呢？因為人生个盡多回憶就同食材有密切个關聯。尤其係滷鹹菜同晒蘿蔔乾个事頭，就自然想起頭擺童年衰過个生活，在寒天一頭頭个大菜滷等粗鹽放入醃缸肚兩隻腳盡躪，該凍瘡凴著鹽會痛到喊阿姆哀！晒蘿蔔乾共樣艱苦，打早摎醃缸滷等粗鹽个蘿蔔仔又鹹又濕抔出來在禾埕晒，臨暗仔遽遽收轉來過入醃缸，日日夜夜反覆个事，一直愛等到晒燥為止，會流出自然个清香味緒。
𠊎買著三斤酸菜同兩斤蘿蔔乾該下，𠊎同伯姆講：做得減兜仔價數無？佢答：「無辦法，這兜東西要花當多時間耗時耗力，該蘿蔔仔愛要五十斤正晒有一斤蘿蔔乾。」𠊎應：「𠊎知！𠊎知！這兜事頭，𠊎童年該央時就知了。」心肝頭一陣軟下來，哪敢過減價呢？
愛轉屋下个路頭，心肚有一種歡喜同滿足，菜共樣恁好食，耕田个婦人家共樣樸實，𠊎還係有初心，隔恁多年个時間，在耳順之年還尋得著這種傳統个鹹菜摎菜脯，該暗晡煎一盤菜脯卵，食起來脆脆咬起來錫錫滾響，過煮一碗公自然風味酸甘酸甘个三層肉鹹菜湯，再配一粒有淰淰蘿蔔絲料仔个菜包，食夜享受人間个好味緒，感受著十分幸福。
華語
家鄉每逢過年前後宗祠都必須敬祖祭拜，我們旅居台南考量年關近交通的擁擠，便選擇提早去祖堂，即使遇冷冽天候，還是必須趕搭高鐵前往桃園新屋祖堂，到達目的把事先已準備好的三牲禮供桌點香膜拜，簡單儀式後，我趁這空檔時即刻奔向傳統市場去逛逛，逛市場一向是我所好，尤其是到客家莊的市場，那裡有數不盡的傳統美食，無論是米食、青菜、蔬果魚肉各類…‥等等，都聞得到在地美食得氣息。
我從小在客家莊成長，見到擺在地攤的蔬果青菜米食，盡是那麼熟悉親切，時光可以瞬間倒轉到童年之景象，熟悉冬天的青菜有：蘿蔔、高麗菜、青蒜、芹菜、韭菜，最不可思議的是眼前出現醃漬的酸菜以及曬乾的蘿蔔乾，這兩樣菜是我日有所思渴望的美味佳餚。今天遇到它們心中實在難以言喻充滿興奮與幸福。
在巷道看到有菜包、艾草粄、粄圓、紅粄、發糕、米篩目還有其他琳瑯滿目的粄，心中澎湃驚喜不已渴望通通全部買回家，最終，我買了菜包、艾草粄各六顆，漂亮金黃的酸菜三斤、蘿蔔乾兩斤，這些看來微不足道的食材怎麼會讓我心中如此暢快呢？因為人生許多的回憶多和食物緊緊扣住，尤其那醃酸菜及曬蘿蔔乾的工作，自然而然勾起童年辛酸的生活。在冬天，一顆顆芥菜裹著粗鹽，兩腳用力在木桶或甕缸踏踏，那個凍瘡碰到鹽會痛到叫媽媽。曬蘿蔔更是耗時耗力，一早從醃缸取出又濕又鹹的蘿蔔撒在廣場曝曬，傍晚日落西山快快收回再次放入醃缸經數日夜反覆工作，直至乾燥為止，會溢出天然清香味。
當我向地攤阿桑買了三斤酸菜和兩斤的蘿蔔乾曾要求可否減點價金，她說不行，這些要花很多時間與體力，而且蘿蔔乾要五十斤的生蘿蔔才能曬成一斤乾蘿蔔，我答：「我懂！我懂！這些活在我童年期就知道了」此時我心軟更不捨殺價了。」
回程歸途中內心有一種歡喜與滿足，菜依舊美味、農婦依然樸實、我仍懷初心。隔了這麼久遠時間，在耳順年之際還可以回味傳統的酸菜與蘿蔔乾；當晚煎了一盤蘿蔔乾蛋，品嘗起來清脆又爽口，彈牙聲唧唧價價響，風味絕佳，煮了令人垂涎已久酸中帶甜，自然風味清香酸菜五花肉湯，再配上一粒飽滿蘿蔔絲餡料客家菜包，晚餐享受著人間美味，幸福無比。
