文／宋彩苮，楊梅伯公岡客人，國小教師，客語薪傳師（四縣腔）
吾姑丈今年九十了，吾婆就佢這一個婿郎定，吾婆降了幾下個妹仔，毋過細細仔就喪忒，就淨伸這個妹仔，有影係吾公吾婆个心肝命袋。老頭擺个細妹人，總係愛嫁人，正毋會分隔壁鄰舍有恁多麼个話屎仔好講，吾姑七後生八後生就嫁分吾姑丈，生養兩對子女，兩儕共心煞猛打拚，子女各各成家立業有自家个家庭。到今，阿太就做幾下面了，兩老仔，公不離婆，秤不離砣，感情當好。
這兩年，吾姑丈逐暗晡毋睡目，一、二樓行啊上行啊下，還擎等枴棍仔緊行緊敲壁，屋下人驚佢跌倒，透夜仔跈上跈下。歇在兩隔壁个人乜分佢吵到無結無煞，睡毋落覺，一暗晡總愛搣幾下齣，直直到臨天光正較恬靜。無就七早八早，企在店亭下，對愛去上班抑係過路个人大嫲牯聲唱等佢細人時節个歌仔，尤其係日本歌桃太郎，唱到當正板，就算無人同佢搭手，佢也唱到歡喜靂天。
有幾下擺，吾姑丈打早就自家打門出去，毋知出去幾久了，吾姑早朝煮好，正想愛兜分佢食，嗄一哪仔尋無人，遽遽出去尋，歸路仔問有人看著無？乜拜託里長放送𢯭尋人，係有看著拜託趕緊通知里長，係再過無尋著就愛去報警察了。打幫有警察𢯭手，正尋轉來。包尾，警察仔係見去巡查，有看著佢就會跈等同佢載轉屋，還交代屋下人愛掌緪兜仔，驚怕出去外背危險。
吾姑分吾姑丈搣到企坐毋得，吾姑丈在屋下，愛人一工人掌等，顛倒吾姑嗄分佢絆著，做一項麼个就䌈手䌈腳；兩公婆感情恁好，吾姑乜毋盼得同吾姑丈送去養老院，放佢一儕人恁孤栖，看毋著屋下人恁衰過，這實在也難為吾姑了。
就恁樣，隔壁鄰舍緊來緊多人會唱 「摸摸塔多桑」，吾姑丈乜輒常坐等毋使錢又威風凜凜仔个警察車轉來。愁不在然係愁，看著吾姑丈平安轉到屋下，吾姑同倈仔心臼三儕又乜開容笑面。
跈等高齡社會个來到，逐隻家庭都會堵著這問題。
老人家在哪？老人，家在哪？ 這問題，麼人知得。
華語
我姑丈今年九十高齡了，我奶奶就這一個女婿而已，我奶奶曾生有好多個女兒，不過在年幼時就都夭折了，只剩這個女兒，姑姑真可謂是掌上明珠。早期的女孩要嫁人結婚才不會惹來街頭鄰居的閒話，我姑姑很早就嫁給姑丈，兩個人努力打拚，生育了兩男兩女，子女各各都成家立業，現在都有好幾個曾孫了，老夫妻感情甚好.
這兩年, 我姑丈夜晚都不睡覺，一樓二樓走來走去，邊走還拿著枴杖敲牆壁，家里人怕他跌倒，在旁邊跟上跟下，住隔壁的鄰居也被吵到無法入睡, 一個晚上總是上演好幾次相同的戲碼，直到快天亮才安靜。不然就是一大早就站在騎樓，對著上班上學的人，扯開嗓門大聲唱歌，尤其是日本歌曲桃太郎，唱得有模有樣，即使沒人拍手，他也是歡天喜地的唱著。
好幾次的清晨，姑丈自己開門出去，也不知道出去多久了，姑姑煮好早餐要拿給他吃時，反而到處找不著他, 就趕緊到外頭找，一路上逢人就問，也請里長協助廣播，若有看到拜託趕快通知里長，再找不著就報警了。好在有警察的幫忙，才找回來。最後，有好多次警察巡邏時，一發現姑丈在外面，就把姑丈載回家，叮囑家裡成員要把姑丈看緊些，以免跑到外面發生危險。
姑姑給姑丈搞得不得安寧，姑丈在家裡要有專人看管照顧，結果就是姑姑哪都不能去，啥事也做不了。姑姑姑丈兩夫妻感情很好，姑姑也捨不得送姑丈去養老院，讓他一個人孤零零的，見不著家裡的人，真是可憐。這實在也很為難姑姑。
就這樣，越來越多的鄰居會唱「摸摸塔多桑」，姑丈也常常坐著免費又威風凜凜的警車回來，雖說又急又氣，但看到姑丈平安到家，姑姑和兒子媳婦三人也才露出笑容。
隨著高齡社會的到來，每個家庭都會遇到相同的問題。
長輩在哪？老人，家在哪？這問題，沒人能給解答。
