文／魏翊泰，現下戴竹東，寫此篇時為國立竹東高中高三生，李文煥老師指導，四縣腔
順等彎彎斡斡个山路行入深山裡肚，有一隻分山林包等个莊頭，該位歇等有兩百零儕个大家庭，逐日做種茶、耕田个農事，莊項个人打早出門做事，斷烏正轉屋歇睏，這種生活雖然講盡無閒，毋過乜十分實疊。逐日下晝貨車會翻過大山仔來到莊頭口，𢯭手村民運送茶米下山，這逐日看等貨車摎一籃籃个茶米送出山林，就係十六歲个小陽最期待看着个光景。從書本裡肚看着都市个鬧熱，廣播肚項聽着異多吂識聽過个事物，小陽總係試著當好奇，故所一個細細个夢想就在厥心肝肚定定仔必目、綻筍，「亻厓想做一個教書先生。」
「就這兜，麻煩你等哩唷。」小陽个阿姆對等司機講，司機頷頷頭那，定定仔駛等貨車出了山林，看等緊駛緊遠个貨車，小陽細細聲仔講等：「實在還想出去外背个城市生活。」小陽个阿姆聽着了這句話，斡頭挲挲仔小陽个頭那講：「既然你有想愛做个事，就應當煞猛去實現，你毋係想做先生乜？」小陽密密緊頷頭，阿姆笑微微仔講：「天下無分人白食个當晝，有了夢想就愛腳踏實地打拚去做，故所你也愛更加煞猛正做得。」第二日小陽來到學校，看等該兜睡到牽覺个同學，雖然因爭一天光就𢯭手屋下做田事，這下乜係目睡睡仔，毋過佢還係盡命牯同睡魔鬥爭，盡力聽入先生講个內容。
「毋使恁煞猛讀書，反正下二擺大漢了乜係在田裡肚做事定定，書頂項个知識根本用毋着。」小林摎小陽講。
小陽轉屋下過後摎阿姆講了這件事，阿姆看等堵好在个食飯个小陽，笑等講：「現代人無辦法一生人活在田肚，人毋係機器，亻恩俚愛有好奇心，想去探求，想去得着自家想愛个東西，現下摘茶做得換着个錢乜變少了，未來做農事無定著有法度畜得贏歸家人，故所……人落尾定著愛出去。」阿姆看等會落山个日頭晟等小陽个側面，笑等揇佢，「無定佢係亻恩屋下个第一個先生。」小陽个阿姆愐，未來定著做得看着小陽企在講台頂个樣仔。
兩年後，小陽斷真考着了師範學院。愛出莊該日，佢企在了莊頭个路口，所有鄉親都來送佢，「阿姆，亻厓愛去了。」小陽目珠含等目汁，當毋盼得看等阿姆，阿姆笑絲絲搭搭厥肩頭講：「你既經拿着你夢想个入場券了，還有麼个好噭？還見笑哦！摎這兜目汁留等！未來還有過較多值得你噭个事情呢！」小陽抿等嘴恬恬頷頭，拂手同屋家下人講佢愛出發了，在出莊前，小陽盡後問阿姆：「阿姆，若夢想又係麼个呢？」阿姆單淨笑笑仔，講：「亻厓个夢想就係好好照顧你到長大啊！」小陽坐上貨車，同司機共下下山，阿姆看等貨車緊行緊遠，眼角掣兩下仔，玄風像黃豆仔恁大粒个目汁對面頰跌下來，佢看等遠遠个日頭落西，心想：「愛向夢想直前行啊！亻厓乜會繼續煞猛打拚。」載等夢想个貨車定定仔駛出山林，向城市駛去。
華語
順著彎彎曲曲的山路走進深山裡，有一個被山林圍著的村莊，那裡住著有二百多人的大家庭，每天從事著種茶、耕田的農事，村裡的人一大早出門做事，傍晚才回家休息，這種生活雖然說是很忙碌，但也十分充實。每天下午貨車會翻過大山來到村莊口，幫忙村民運送茶葉下山，這每天看著貨車把一籃籃的茶葉送出山林，就是十六歲的小陽最期待看到的風景。從書籍裡面看到都市的熱鬧，廣播裡面聽到很多不曾聽過的事物，小陽總是心生好奇，所以一個小小的夢想就在他的心頭慢慢的裂開、發芽，「我想成為一位教師。」
「就這些，麻煩你們了喲。」小陽的媽媽對著司機說，司機點點頭，慢慢的開著貨車出了山林，看著愈開愈遠的貨車，小陽小小聲說著：「實在很想出去外面的都市生活。」小陽的媽媽聽到了這句話，轉頭摸摸小陽的頭說：「既然你有想要做的事，就應該努力去實現，你不是想當老師嗎？」小陽的頭點個不停，媽媽笑咪咪的說：「天下沒有被人白吃的午餐，有了夢想就要腳踏實地打拚去做，所以你也要更加努力才行。」第二天小陽來到學校，看著那些睡到打呼的同學，雖然因為天亮就幫忙家裡做田事，現在也是很想睡覺，不過他還是拚命與睡魔鬥爭，盡力聽進老師說的內容。
「不用那麼努力拚命讀書，反正以後長大了也是在田裡面做事而已，書上的知識根本用不着。」小林向小陽說。
小陽回家後向媽媽說了這件事，媽媽看著剛好正在吃飯的小陽，笑著說：「現代人是沒辦法一輩子活在田裡的，人不是機器，我們要有好奇心，想去探索，想去得到自己想要的東西，現在採茶能夠換到的錢也變少了，未來務農事是不一定能養活一家人的，所以……人最後一定就是要出去的。」媽媽看著夕陽照射著小陽的側臉，笑著把他抱進懷中，「說不定他會是我們家第一個老師。」小陽的媽媽想，未來必定能夠看到小陽站在講台上面的樣子。
兩年後，小陽真的考上了師範學院。那天，當他站在了村莊的路口，所有村民都來為他送行，「媽媽，我要離開了。」小陽眼眶含著淚水，很捨不得看著媽媽，媽媽笑嘻嘻拍拍他的肩說：「你已經拿到了你夢想的入場券，還有什麼好哭的？很丟臉哦！把這些眼淚留著吧！未來還有更多值得你哭的事情呢！」小陽抿著嘴唇靜靜的點頭，搖手向家裡人道別，在離去之前，小陽最後向媽媽問：「媽媽，你的夢想又是什麼呢？」媽媽只是笑笑，說：「我的夢想就是好好照顧你到長大啊！」小陽坐上貨車，與司機一同下山，媽媽看著貨車漸漸仔離去，眼角顫抖兩下，馬上如黃豆般大顆的淚水從臉頰滑下來，他看著遠遠的斜陽，心想：「向著夢想勇往直前！我也會繼續努力打拚。」載著夢想的貨車慢慢的駛出山林，向著城市駛去。
