文／謝宜庭，桃園客家人（四縣腔）
還細時節，食飽夜，阿姆輒輒會渡𠊎去阿伯屋下過家尞，總愛經過一大片竹林，長長个細路分又高又大支个竹仔蔭等，一息仔月華就照毋著，暗摸胥疏當得人驚。逐擺𠊎總愛揪等阿姆个衫尾，目珠眨等，定定仔跈阿姆行過這條路，緊行還愛緊問：「過忒吂？還愛幾久？」阿姆總係講：「有麼个好驚？恁無膽！」𠊎應佢：「𠊎驚這位烏咚咚仔，會有鬼仔舂出來捉𠊎啦。」阿姆聽著就頓腳摎𠊎講：「鬼仔都係人變成个，驚麼个？」阿姆講得著，毋過逐擺𠊎還係感覺竹林這條細路盡得人畏，係風一吹啊過來，𠊎就試著係妖魔鬼怪在該伸手摸𠊎啦～阿姆哀喔！
毋多知仔恁多年過去了，暗晡頭係一儕人行過大樹下該烏疏滴溚个人行道，共樣會緊行緊發痴驚，𠊎乜毋知自家仰恁無膽。還記得妹仔出世該下，屋下人早早就去新店烏來河壩脣拈一粒又圓又靚、形投像鵝卵恁大个石牯，在妹仔出世第三朝，洗身个時節同石牯放落浴盆肚，過用手摎厥頭那頂挲挲啊、胸脯拍三下講：「膽膽大，做婆做太。」這就安到「做膽」。係希望細人仔个膽做得像石牯恁樣硬程、做事情有膽量，乜有祝福同盼望細人仔平安長大成人个意義。有人係在嬰兒仔出世第三朝做膽，乜有人連續洗一隻月，洗好正摎石牯放入細人仔睡等个眠床底下。係講後背過有老弟、老妹出世，又本本拿這粒圓石牯來分佢兜做膽，代表兄弟姊妹「共心」。該圓圓、靚靚个石牯陪等幼皮白肉、恁得人惜个嬰兒仔共下洗身，實在異生趣。𠊎輒輒愐，係毋係𠊎正出世該下無做膽，正會恁無膽啊？
有一擺𠊎看著一個有關罕見病症細人仔个報導，佢个阿姆用堅定个聲音講：「細人仔著病，定著歸屋下人都心焦馬亂、心神毋定，假使爺哀自家乜驚怯怯仔，該細人仔感受著，斯會還較驚哦。故所大人愛冷靜，細人仔个心就會定疊。」這篇報導分𠊎試著當感心，𠊎決定自家摎自家做膽，輒輒在心肝肚提醒、要求自家，係堵著事情愛像伯公生鬚樣仔──毋會緊張，乜毋使驚，煞猛去解決佢就好。在細人仔面頭前定著愛冷靜、莫慌張，定定仔摎佢兜講發生麼个事情，共下討論仰般處理就好。初下碼𠊎堵著問題該下，𠊎係講”毋驚”可能係「三兩人講四斤話──膨風。」毋過，一擺、兩擺、三擺，漸漸仔𠊎正經緊來緊勇敢、較毋會慌慌張張了。老古人言講：「做事有決心，鐵棍磨成針。」一息仔就毋會差。
牽等細人仔細細合幼幼个手向前行，一路里來，為著細人仔做得平平安安、快快樂樂个成長，𠊎試著𠊎應該愛煞猛打拚、學習摎成長。有細人仔陪等𠊎共下行，親像較有力頭摎勇氣向前行，正經變做一個還較勇敢、還較好个人了，因爭𠊎知，𠊎勇敢，佢兜正做得快樂生活；𠊎勇敢，佢兜正做得安心長大！
華語
小時候，吃完晚飯，媽媽常常會帶著我去伯父家玩，總是經過一大片竹林，長長的小路被又高又大的竹子遮著，完全照不到一點月光，烏漆墨黑的很讓人害怕。每次我總要牽著媽媽的衣角，閉著眼睛，慢慢地跟著媽媽走過這條路，邊走還要邊問：「走過了嗎？還要多久？」媽媽總是說：「有什麼好怕的？這麼膽小！」我回媽媽說：「我怕這裡黑漆漆的，會有鬼衝出來捉我啦。」媽媽聽到就停下腳步跟我說：「鬼也是人變成的啊，怕什麼？」媽媽說的對，但是每次我還是感覺竹林這條小路讓人好畏懼，只要有一陣風吹過來，我就會覺得是妖魔鬼怪伸出手在摸我啦～我的媽啊！
不知不覺許多年過去了，晚上如果一個人走在黑漆漆的大樹下人行道，我一樣會越走越害怕，也不知道自己怎麼會這麼膽小。還記得女兒剛出生那時，家人早早就去新店烏來河邊挑一顆又圓又漂亮、形狀像鵝蛋那麼大顆的石頭，在女兒出生第三天洗澡的時候，將石頭放進浴盆裡，再用手摸摸她的頭頂、在胸脯拍三下說：「不用怕不用怕，膽子大一點，健康長壽到做阿婆、曾祖母。」這就叫「做膽」。是希望小孩子的膽子可以像石頭那樣堅韌、以後做事有膽量，也有祝福以及盼望小孩平安長大成人的意義。有人是在小嬰兒出生的第三日做膽，也有人是連續洗一個月的，洗好才將石頭放到小孩子睡覺的床底下。如果說後面還有弟弟、妹妹出生，就還是會拿這顆圓石頭來幫他們做膽，代表兄弟姊妹「同心」。那顆圓圓又漂亮的石頭陪著細皮嫩肉、可愛又得人疼的小嬰兒一起洗澡，實在很有趣。我常常想，是不是我出生的時候沒有「做膽」，才會這麼膽小？
有一次看到一個有關患罕見疾病孩子的報導，他的媽媽用堅定的聲音說：「孩子生病，全家人一定都心亂如麻、心神不定，如果爸媽自己也表現出很恐懼的樣子，那孩子感受到這種恐懼，是會更害怕的。所以大人要冷靜，孩子的心就會安定下來。」這篇報導讓我覺得很感動，我決定自己幫自己「做膽」，不時就在心裡提醒並要求自己，遇到事情要從容不迫、不慌不忙，更無須害怕，努力去解決問題就好。在孩子面前一定要冷靜、不慌張，慢慢地跟他們解釋發生了什麼事情，一起討論如何處理就好。一開始遇到問題如果我說”不怕”可能是在吹牛，不過，一次、兩次、三次，漸漸的，我真的是越來越有勇氣、比較不會慌慌張張了。俗話說：「做事有決心，鐵杵磨成針。」一點都沒錯。
牽著孩子小小又嫩嫩的手向前走，一直以來，為了讓小孩可以平平安安、快快樂樂的成長，我覺得我應該要拼命努力、學習跟成長。有孩子陪著我一起走，好像更有力量及勇氣向前行，也實實在在的變成一個更勇敢、更好的人了。因為我知道，唯有我勇敢，他們才可以快樂生活；我勇敢，他們才能安心長大！
