全台灣落大水造成災情个消息
【蘇佑昇／西湖海陸腔】中央氣象局今晡日發布落大水个豪大雨還有豪雨特報，目前因為落大水傳出來个災情个所在有苗栗、台中、彰化這兜所在，這兜所在也有傳出來蔭水還有屙山落泥石个情形。
這滿苗栗南庄鄉東河村今晡日全村停止上班上課1日；苗栗62線0.5公里个所在有石牯跌下來造成道路斷忒，今晡日朝晨也傳出來泰安鄉公所清潔隊个員工駛車仔上班，經過苗栗62線嗄分跌下來个石頭矺著，好在淨有著傷，送醫院之後暫時無問題。
另外，台中市因為落大水，造成市區个幾下隻路面蔭水，大雅區也係幾下隻路段蔭水。彰化縣鹿港鎮市區也有幾下隻道路蔭水，部分蔭水深度有半隻車輪仔恁高，請苗栗、台中、彰化个鄉親出門愛好先兜。
這幾下日落大水 石門水庫水位持續挷高 水庫做得穩定提供到6月底
這幾下日因為鋒面摎全台灣各地帶來大水，水利署北區水資源局今晡日講，石門水庫水位也在持續定定仔挷高當中，按算這波个落水對水情有幫助，石門水庫个貯水率也應該做得回升到百分之40以上，石門水庫个水源也做得穩定提供水源到6月底。
經濟部个水利署北區水資源局个副局長郭耀程今晡日講，這波鋒面從昨晡日到今晡日為止，為石門水庫帶來差毋多50毫米个降雨量，按算會增加水量300萬噸；目前石門水庫个水位係226.85公尺上下，貯水量接近8000萬立方公尺，貯水率係百分之38.8，也按算這擺个鋒面落水之後，石門水庫做得穩定提供水源到6月底，請北部个鄉親毋使愁，毋過大家還係愛省水，分水庫做得永續个維持正常个供水，大家也正做得在平常時毋使驚無水好用。
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
