阿姆个多重宇宙得著奧斯卡oscar大獎最佳影片 做盡拿著7隻大獎
【蘇佑昇／西湖海陸腔】阿姆个多重宇宙（媽的多重宇宙「Everything Everywhere All at Once」）這隻演員大部分係華人个影片，今晡日在第95屆奧斯卡大獎，得著最大獎-最佳影片，也做盡拿著最佳導演、最佳女主角、最佳男配角、最佳女配角、最佳原創劇本、最佳剪輯這兜7隻大獎。這乜係奧斯卡大獎第一擺有兩儕亞洲演員全部拿著大獎个肯定紀錄，這兩儕優秀个演員分別係楊紫瓊還有關繼威，分別拿著最佳女主角還有最佳男配角獎。
彭佳慧全新客語專輯《𠊎在客廳發个夢》 得著美國muse裝幀設計銀獎
好消息！金曲獎歌手彭佳慧第一擺推出客語專輯《𠊎在客廳發个夢》，一推出就得著美國「muse設計大獎－裝幀設計銀獎」个肯定，彭佳慧在第一隻時間，就暢到在自家个面書摎大家分享這隻好消息，也感謝國際設計大獎MUSE對這張專輯个肯定。其中，為著這張專輯寫了將近一半詞曲个金曲歌王羅文裕，也暢到摎《客新聞》講，當歡喜這張專輯个設計團隊「就曰設計」做得順利拿著大獎，雖然設計團隊个成員聽毋識客語，毋過還係在對音樂還有歌詞个認識之後，透過豐富个想像力，摎創意實體化，正做得分大家看著彭佳慧這張客語專輯个美好，羅文裕也請大家一定愛買這張專輯，感受一下得著國際設計大獎muse肯定个客語專輯《𠊎在客廳發个夢》！
經典賽澳洲8比3
打贏捷克拿著8強賽資格 韓國無法度晉級
世界野球經典賽預賽B組，在日本東京巨卵（東京巨蛋）舉辦，這擺澳洲隊係小聯盟選手組成个團隊，實力當強，所以今晡日澳洲隊成功以8比3，打贏捷克隊，這乜係澳洲隊第一擺在經典賽進入複賽，也代表韓國隊確定無法度晉級，韓國提前輸忒全部比賽了。目前經典賽預賽B組个比賽，澳洲隊摎日本隊這兩隊確定做得進入前八強个比賽。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
歡迎大家下載講客廣播電臺APP，共下講客Let’s fly
