文／王湘仁，粄食文化工作者、客語薪傳師，龍潭客人，這下戴湖口（四縣腔）
二月二十一世界母語日正過忒，這係一隻保護世界項所有母語个日仔，提醒大家母語个重要，還過愛保護語言摎文化个多樣性。台灣在世界母語日邊仔，當多單位乜會辦保護母語个活動，舊年桃園市立圖書館圖書館研發「自圓奇說」桌頂遊戲，今年二月到三月乜辦了幾下場「自圓奇說」體驗教學活動，分大人細子去搞遊戲講母語，𠊎乜參加了其中一場在楊梅紅梅圖書館辦个客語場，教大家人仰般搞這桌頂遊戲。
「自圓奇說」摎各種「動作」還過無共樣个「地點」印在紙牌項，搞个時節加上主詞，大人細子就講得出「主詞＋地點＋動作」簡單个句子，因為地點摎動作有當多，毋單淨做得熟事這句个句型，還做得學著當多無共樣个名詞摎動作。做客語教學摎講客話繪本故事這幾年个時間，𠊎試著愛分細人仔摎客話講出來其實無恁該，「自圓奇說」母語桌頂遊戲个設計就會分細人仔有當多機會講客，係當好个互動遊戲。
該係詞彙毋曉講愛仰結煞？毋使愁！「自圓奇說」逐張牌頂背都有QRCode，用手機仔掃這QRCode就聽得著這兜詞彙愛仰般講了，故所全無曉得講客話个人共樣做得搞，透過這遊戲學講客，輕鬆學習毋使有壓力，自然達著推廣母語个目的。
摎大家紹介遊戲个由來同規則過後，就分各組試搞，看係毋係逐儕人都了解規則了，等大家全了解規則過後，就正式開始進行遊戲，遊戲个過程無論大人細子全搞到當入文，笑聲摎講客聲在教室肚全無停，活動時間按算係一點鐘，就在𠊎宣布時間伸五分鐘个時節，有細人仔講：「時間仰過到恁遽？還吂搞過願！」𠊎全無胚著這遊戲會恁受著歡迎，細人仔搞到毋盼得煞，好得主辦單位有送一隻家庭一副「自圓奇說」帶轉去搞，佢兜正甘願摎紙牌收起來。
課程結束以前，𠊎緊發牌緊摎參加个家長打嘴鼓，原來佢兜除忒楊梅本地人，有對中壢、湖口來个，最遠个係對苗栗頭份來个兩子阿婆，實在當有心，還有一個小學五年生个同學，雖然正讀五年級，毋過佢考著客語認證中級了，厥姐婆講佢對客話當有興趣，這下當在該準備考客語認證中高級，聽著這𠊎當歡喜，原來還有恁多有心个人，試著客話復興還係有兜仔希望。
這擺「自圓奇說」活動，桃園市立圖書館總共在楊梅、龍岡、中壢摎龍潭个四隻分館辦五場客語个活動，因為今年主辦單位乜研發了福佬話版本个「自圓奇說」桌頂遊戲，故所續等三月半過後，就愛辦福佬話「自圓奇說」个場次，正經愛摎桃園市立圖書館搭手，對台灣个母語恁用心推廣，希望大家有機會乜做得去搞看啊哦。
華語
二月二十一日的世界母語日才剛剛過完，這是一個保護世界上所有母語的日子，提醒大家母語的重要，以及要保護語言和文化的多樣性。台灣在世界母語日前後，許多單位也會辦保護母語的活動，去年桃園市立圖書館圖書館研發「自圓奇說」桌遊，今年二月到三月也辦了好幾場「自圓奇說」體驗教學活動，讓大人小孩玩遊戲說母語，我也參加了其中一場在楊梅紅梅圖書館舉辦的客語場次，教大家怎麼玩這款桌遊。
「自圓奇說」把各種「動作」和不同的「地點」印在紙牌上，進行遊戲時加上主詞，大人小孩就可說出「主詞＋地點＋動作」簡單的句子，因為地點和動作有很多，不僅可以熟悉這句的句型，還可以學習很多不一樣的名詞和動作。從事客語教學和說客語繪本故事這幾年的時間，我覺得要讓小孩把客語講出來其實沒那麼容易，「自圓奇說」母語桌遊的設計就會讓孩子有非常多機會講客語，是很好的互動遊戲。
如果詞彙不知道怎麼講怎麼辦？不用擔心！「自圓奇說」每一張牌上都印有QRCode，用手機掃QRCode就聽得到這些詞彙要怎麼說了，所以完全不會講客語的人同樣能玩，透過這桌遊學講客話，輕鬆學習不用有壓力，自然達到推廣母語的目的。
向大家介紹遊戲的由來和規則過後，就讓各組試玩，看是不是每一位都了解規則了，等大家都了解規則之後，就正式開始進行遊戲，遊戲的過程無論大人小孩都玩得很投入，笑聲和講客語的聲音在教室中此起彼落，活動時間預計是一小時，就在我宣布時間剩五分鐘的時候，有小孩說：「時間怎麼過得那麼快？還沒玩過癮耶！」我完全沒有料到這桌遊會如此受歡迎，小孩子玩到捨不得結束，還好主辦單位有送一個家庭一副「自圓奇說」帶回去玩，他們才甘願把紙牌收起來。
課程結束以前，我邊發牌邊和參加的家長聊聊天，原來除了楊梅在地人，有從中壢、湖口來的，最遠的是從苗栗頭份來的祖孫倆，實在非常有心，還有一位小學五年級的同學，雖然才唸五年級，不過他已經考過客語認證中級了，他的外婆說他對客語很有興趣，現在正在準備考客語認證中高級，聽到這裡我很開心，原來還有那麼多有心人，覺得客語復興還是有一絲希望的。
這次「自圓奇說」活動，桃園市立圖書館總共在楊梅、龍岡、中壢摎龍潭的四個分館舉辦五場客語的活動，因為今年主辦單位也研發了閩南話版本的「自圓奇說」桌遊，所以接下來三月中過後要辦閩南話「自圓奇說」場次，真的要給桃園市立圖書館拍拍手，對台灣的母語那麼用心推廣，希望大家有機會也可以去玩玩看喔。
