澎湖龍門後灣拚沙壩 再過利用海上廢棄物變身藝術品
【羅盛滿／新竹竹東海陸腔】交通部觀光局澎湖國家風景區管理處響應「向海致敬」个政策，今晡日在龍門後灣舉行拚沙壩活動，所拈著个海上漂流廢棄物，再過利用變成地景藝術作品。
澎湖管理處舉辦「向海致敬」个龍門後灣拚沙壩活動，包括有湖西鄉公所、龍門社區還過中華民國旅行商業同業公會全國聯合會這兜單位，一共100零儕人用行動響應拚沙壩活動，在2點鐘之內，拚咧將近900公斤个海上漂流廢棄物摎垃圾，分後灣沙壩恢復淨俐个樣仔。
澎湖管理處表示，逐年在東北季風吹起个時節加上海潮流向，龍門後灣沙壩都會堆當多來自海上各種个漂流廢棄物，好得在村長洪瑞達摎社區居民輒常自家拚沙壩个𢯭手之下，分沙壩保持淨俐，成為一隻觀光景點，餳遊客去看。
澎湖管理處講，今晡日龍門後灣拚沙壩所拈著个海上漂流廢棄物，會分類再過利用，還過做成地景藝術作品，7月會在澎湖海廢地景藝術節展出。
111年國道平常日交通量係歷年最高 超過疫情前水準
高速公路局統計，這3年來，因為COVID-19疫情影響，舊年國道平均平常日交通量已經超過疫情前个水準。
高速公路局今晡日發布新聞稿表示，109年受著COVID-19疫情影響，國道交通量跈等疫情有所變化，經過ETC大數據資料統計分析，108年還吂受著疫情影響，國道年平均平常日交通量係87百萬延車公里，111年平均平常日交通量係90百萬延車公里已經超過疫情前个水準，還過係歷年來最高，另外例假放尞日國道交通量疫情前後都係平均100百萬延車公里。
「延車公里」係統計國道交通量單位，就係摎所有車輛所駛个里程全部加起來得著个數字。
高速公路局表示，國道平常日主要係通勤旅遊為主，車流集中在朝晨摎暗晡个上、下班尖峰時段，部分都會區路段已經超過道路容量，國道都會區路段在朝晨摎臨暗仔个期間難免會塞車，疫情漸漸仔較緩兜仔个情況之下，建議通勤个鄉親做得多加選擇坐大眾公共運輸，閃開國道塞車，省兜仔通勤个時間。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
