客委會楊長鎮主委毋盼得30年个客家地下電台戰友徐智俊（阿俊哥） 佢表示「阿俊係捱心肝肚个主持一哥」
【羅盛滿／新竹竹東海陸腔】今晡日係資深金鐘媒體人、同時乜係客家公共傳播基金會前總經理，同時乜係講客廣播電臺个臺長徐智俊（阿俊哥）个告別式，客家委員會主任委員楊長鎮率領客委會副主委周江杰、范佐銘這兜客委會个長官，前往新北市立殯儀館明善廳，頒發旌揚狀還過二等客家事務專業獎章分阿俊哥。
客家公共傳播基金會个董事長陳邦畛，乜率領全體員工前往哀悼致意，還過安排阿俊哥生前最沙鼻个「金鐘講客號」到現場，送阿俊哥最尾一程；今晡日上晝个告別式，一大早就有當多愛送阿俊哥最尾一程个親朋好友到現場，客委會主委楊長鎮愐起摎阿俊哥將近30年个情誼，佢乜當毋盼得个講：「阿俊係捱心肝肚个客家主持一哥！」
續下來來聽楊長鎮主委現場个致詞：
捱摎阿俊哥熟事兩三十年，該時節佢做學生仔參加這兜本土文化个運動，大學个客家社團，所以早早佢兜辦營隊个時節，捱就摎佢這兜熟事。
後來到寶島客家電台，該時節還係地下電台个時節，捱也到寶島客家電台主持節目，佢也在該參與這地下電台个運動，佢該時節來講，後生人恁勇敢來參與个較少，佢就非常个特別，可見講佢對這個客家語言文化感情十分深。
平常摁俚接觸，像佢這隻年歲个人，講話講講咧不知不覺又會講華語，阿俊非常特別，就講佢一定頭到尾，不管愛表達麼个，佢當少用著華語，佢做得完整表達，所以講厥个客話，可以講係超出這隻年齡階層个能力。
從這兜細節就可以看出佢个堅持，還做節目了呢，盡多客家个公共活動，因為佢个才藝个關係，大家會請佢去做節目个主持人，佢做得用活潑个客話，但是有現代个感情主持活動，帶動全場个熱度，增加這表演者个效果。
所以以這個客家活動主持人來講，男主持人佢應該算一哥，非常个活潑。這個重點就講佢自家內心深處，對客家个感情自然个表達，算非常个自然。
還佢在傳播工作者上，非常个投入，佢也算係較早用客話个節目，來探討現代个後生人个情感，佢也拿過金鐘獎。
這恁多年來捱看等佢成長，所以其實佢已經有得過這個客家个專業獎章──三等專業獎章，這個已經係早早就對佢有所肯定。
因為第一擺接獎章就係三等，一直就有想講照規定，佢原來个時間以後，做得頒發二等獎章，捱無想著頒發二等獎章，就佢已經離開了摁俚大家咧。
捱相信所有從事客家語言文化，不管台灣南北，大家熟事个阿俊，佢該个形象，佢該種對客家語言文化个熱情，該種非常誠意个認同，應該大家會永久記得佢。
捱相信抑係講，佢个生長過程也帶動盡多還較後生个一代，講客家後生人，所以捱也看著盡多个客家後生，喊佢阿俊大哥，有從佢身上學習著當多。
捱試著捱本人也共樣，看著佢个堅持，也分捱盡大个力量。捱愛感謝佢，在這隻過程个當中，摁俚從事客家工作个朋友，大家互相个包容、扶持，互相个鼓勵。
大家做得共下行恁久，這係大家有緣，捱也正經感謝佢。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
