文／黃筱婷，竹東客家人，這下戴竹東鎮（腔頭：海陸腔）
賽夏族在新竹縣摎苗栗縣个山項，交通無麼个方便；因為戴个地區無共樣，賽夏族有分「北賽夏」摎「南賽夏」兩隻部落。北賽夏在五峰鵝公髻山个山項，該就近大部分係泰雅族个傳統打獵領域；南賽夏斯係在苗栗个向天湖該片，該就近大部分斯係𠊎兜客家族群了，所以正長透有人講：「賽夏族係分漢人影響當多个原住民族群。」
矮靈祭係賽夏族最重要个一隻祭典；在當久當久以前，矮人識用心个教導賽夏族人耕種摎紡織這兜當要緊个生活技術，毋過，矮人當好撩弄賽夏族个細妹仔，賽夏族人試著矮人長年透天恁樣對待自家个族人，認為這係一種盡得人惱个行為。
有一擺，賽夏族人共下斬忒矮人逐擺轉屋定著愛經過个大樹，當多矮人毋堵好就跌落崩崗過身了。還在世个矮人火著了，就咒賽夏族人，分佢兜耕種个農作物無法度收成，而且還過有盡多个災害；賽夏族人當驚會造成大災難，佢兜為著愛安慰發閼个矮靈，賽夏族兩年就會舉辦一擺个祭典，這斯係矮靈祭个原由。
愛舉辦矮靈祭个時節，北賽夏摎南賽夏个長老，會先在南庄个河壩脣共下參詳舉行矮靈祭个時間；矮靈祭大體在秋天个收成季節來舉行，兩年一擺較細个祭典，十年一擺係大祭典；在大祭典當中正會出現罕得看著个「祭旗仔」。
在三日个矮靈祭典肚，分做「迎靈」、「娛靈」摎「送靈」，無論係哪隻祭典儀式，全做得看著賽夏族人對矮靈虔誠敬重个用心；矮靈祭當莊重嚴肅，渡𠊎行到祭典場所个賽夏族朋友摎𠊎講：「舉行祭典以前，族人愛共下認真練習合唱十五首祭典个歌謠，還過在舉行祭典个時節絕對做毋得亂講話，還較做毋得做壞事情，無定著會分矮靈處罰。」
𠊎行到祭典場所該下，看著在中央个賽夏族人著等傳統个紅色甲仔，細徠人个肩頭擎等半天高个旗仔，旗仔中央寫等家族个姓；有兜細妹人揹等傳統樂器，在該搖擺身體該下會出現有規律、有節奏个聲。
賽夏族人還會邀請人客啉自家做个酒，乜盡歡迎大家共下來跳舞，歸隻祭典嶄蠻莊重，看得著賽夏族人對自家文化有重要个使命，𠊎誠心希望矮靈祭做得傳下去。
華語：
賽夏族居住在新竹縣與苗栗縣交界的高山地區，交通並沒有很方便；因為居住地區不一樣的關係，賽夏族有「北賽夏」與「南賽夏」兩個聚落。北賽夏居住在五峰鵝公髻山區，附近多為泰雅族的傳統狩獵領地；南賽夏則是居住在苗栗的向天湖那邊，附近大部分就是我們客家族群了，所以才經常有人說：「賽夏族是被漢人影響最多的原住民族群。」
矮靈祭是賽夏族最重要的一個祭典；在很久很久以前，矮人曾經用心地教導賽夏族人農耕與織布這些很重要的生活技術，不過，矮人很喜歡調戲賽夏族的婦女，賽夏族人覺得矮人長時間這樣對待自己的族人，認為這是一種相當討人厭的行為。
有一次，賽夏族人合力砍下矮人每次回家一定要經過的大樹，許多矮人不小心就掉落懸崖下而去世了。還活著的矮人生氣了，就對賽夏族施以詛咒，讓他們耕作的農作物沒辦法收成，災害不斷；賽夏族人很害怕會造成大災難，他們為了要安慰憤怒的矮靈，賽夏族兩年就會舉辦一次的祭典，這便是矮靈祭的由來。
要舉辦矮靈祭的時候，北賽夏與南賽夏的長者，會先在南庄的河畔一起商量舉行矮靈祭的時間；矮靈祭約略在秋天的收成季節舉辦，兩年是一小祭，十年是一大祭；在十年的大祭中才會出現難得看見的「祭旗」。
在三天的矮靈祭典中，分為「迎靈」、「娛靈」及「送靈」，無論是哪個祭典儀式，都可以看到賽夏族人對矮靈虔誠尊敬的用心；矮靈祭極其嚴肅莊重，帶領我走到祭典場所的賽夏族友人和我說：「舉行祭典前，族人要一起認真練習演唱十五首祭典的歌謠，還有在舉行祭典期間不可以亂講話，更不可以做壞事，不然一定會被矮靈處罰。」
我走到祭典場所時，看到中央的賽夏族人穿著傳統的紅色背心，男性的肩膀上扛著高大的旗子，旗子中央書寫家族的姓氏；有的女性則是背著傳統樂器，在搖擺身體時會發出規律的節奏聲響。
賽夏族人還會宴請客人喝自家釀製的酒，也很歡迎大家一起來跳舞，整個祭典相當莊重，可以看到賽夏族人對待自我文化有重要的使命，我誠心希望矮靈祭可以綿延下去。
歡迎討論或留言給我們: