法國民眾大罷工反對年金改革 超過一百萬儕人上街路抗議
【羅盛滿／新竹竹東海陸腔】法國跨產業工會昨晡日發動全國罷工遊行，至少112萬儕人參與。巴黎現場分大自家尖到包山塞海，現場示威个人講，無反對改革，但係不應該單淨尋勞工出水；另外受訪民眾講，支持罷工，就算對生活毋利便乜會忍耐。
法國從1995年總統席哈克（Jacques Chirac）起勢，都識試過解決退休制度个背債風險；總統馬克宏（Emmanuel Macron）2017年當選以來，乜識試過幾下擺愛推動退休制度个改革來避免年金破產。
法國總理柏納（Elisabeth Borne）在正月初10發表政府退休制度改革計畫綱要，主要包括：全民法定退休年齡從現下个62歲挷後到64歲；為著領取完整退休金嗄摎繳納分攤額增加到43年份个時程提前；終止國營企業摎公務人員个退休「特殊制」。
法國有當多个民眾不滿馬克宏政府个退休年金制度改革，8大工會昨晡日大串連摎罷工，還過在各隻城市示威遊行。內政部指出，昨晡日歸隻法國一共有112萬儕人上街路抗議；工會表示有超過200萬儕人參與。
法國總工會（CGT）表示，改革並毋合理，「還有其他个開源方式。佢兜需要另外一種改革，比論講摎企業徵稅、增收資本獲益稅、銀行利息摎上市股票這兜稅金」。
法國「特殊制」（régimes spéciaux）具有當久个歷史，工會認為特殊制个存在有佢个意義：「有兜行業做得提早退休，係因為勞碌程度（pénibilité）無共樣，政府嗄愛取消，造成情況緊來緊艱難。」
巴黎示威个氣氛大體和平，跨產業參與个人理性表達訴求，毋過在遊行个路項當中還過臨暗仔到民族廣場該時，有發生幾下擺警察摎民眾个衝突。巴黎警察局表示，這擺遊行活動捉起來將近40儕人。
在西班牙訪問个馬克宏總統昨晡日承諾，政府會堅持決定還過負責任个推動退休制度改革，「同時帶等尊重摎對話精神」。
根據法國媒體報導，8大工會在昨晡暗會議過後同意，續等在正月31會過一擺上街路，繼續抗議政府退休制度个改革。（中央社）
民主剛果貶船事故 至少145儕人失蹤可能都已經罹難
當局今晡日表示，一輛超載貨物摎動物个輪船日前在非洲剛果民主共和國（民主剛果）西北部个盧隆加河（Lulonga River）沒水，至少145儕个乘客失蹤，可能全部个人已經罹難。
根據美聯社報導，官員還講，這擺船難大概有55儕人生還。
發生事故个輪船在正月17暗晡頭正愛駛向鄰國剛果共和國，嗄在巴桑庫蘇鎮（Basankusu）附近貶船。
當地公民社會團體个領袖表示，至少有145儕無人知佢兜个下落。佢認為超載係輪船沒水个原因，但係當地民眾除了坐船之外、無麼个其他个交通選項。
舊年10月，剛果河（Congo River）在民主剛果赤道省（Equateur）河段乜有40零儕在共樣相像个情況之下過身。（中央社）
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
歡迎討論或留言給我們: