日本講：北韓發射洲際彈道飛彈 可能落在專屬經濟區
【羅盛滿／新竹竹東海陸腔】日本防衛省（斯像𠊎兜个國防部）表示，北韓今晡日上晝發射个彈道飛彈在11點20分（斯係台灣時間上晝10點20分）左右可能已經落在日本北海道个渡島大島外海，該隻地區係日本專屬經濟區。
日本防衛省表示，北韓今晡日上晝10點14分（斯係台灣時間9點14分）左右從朝鮮半島西岸附近向東方發射一枚洲際彈道飛彈（ICBM）。
北韓連續2日試射 南韓初步推測係洲際彈道飛彈
南韓軍方今晡日表示，北韓發射至少一枚彈道飛彈，係2日以來第2擺試射，初步推測係一枚洲際彈道飛彈（ICBM）。
根據路透通訊社報導，南韓个合同參謀本部通報北韓發射飛彈。
有一個南韓國防官員摎法國新聞社講，佢兜推測北韓今晡日發射一枚洲際彈道飛彈，但係無提供還較多个細節。
北韓昨晡日發射一枚彈道飛彈，同時警告假使米國摎米國个同盟國家在區域擴大嚇阻行動，北韓續等會採取「還較激烈个軍事回應」，還過講華府「在進行續下來定著會後悔个賭徼」。
北韓今年飛彈試射次數創下紀錄，聯合國安全理事會个決議禁止北韓這種行為，已經針對北韓个飛彈摎核子武器計畫實施制裁。
南韓摎米國最近舉行軍事演習个時節，北韓乜向海竇肚發射幾下百枚个砲彈。日本參與咧部分演習。
米國星巴克員工大規模罷工 超過一百間門市進行紅杯仔起義
連鎖咖啡業者星巴克（Starbucks）个米國員工今晡日在幾下隻已經加入工會个地點展開罷工，推算影響超過100間門市，抗議公司在協商工會契約方面个做法。
這一場由星巴克工會（Starbucks Workers United）帶頭个一日罷工行動分大自家安到「紅杯仔起義」（Red Cup Rebellion），堵堵好堵著星巴克推出熱門活動，人客買特定商品做得拿著做得重複使用个杯仔，毋過員工發个毋係星巴克品牌个杯仔，係紅色个工會杯仔。
星巴克員工在冷颼颼个天時在紐約時報廣場（Times Square）附近抗議，高呼口號摎手擎星巴克工會个標語。星巴克工會代表歸隻米國各地將近7000儕員工。
星巴克工會聲明表示，這擺行動係「回應星巴克打擊工會个策略摎拒絕協商个態度」，還過講員工想愛有無受著恐嚇威脅个組織工會个權利。
星巴克工會針對俸祿摎缺少一致時間表這部分表達關切，「除非星巴克坐在談判桌，表示善意協商一份公平个契約，若無、𠊎兜做得料想這種罷工抗議个行動會再過出現」。
星巴克工會到今代表超過260隻地點，係星巴克在北美管理差毋多1萬200間門市个一細部分。
星巴克管理階層分人指控恐嚇，還過拖時間毋展開集體協議个談判工作。根據星巴克工會个講法，全國勞工關係局（National Labor Relations Board）已經對星巴克提出幾下十件申訴。
除了星巴克之外，有緊來緊多間公司乜開始發起工會運動，包括蘋果公司（Apple）、零售摎戶外休閒服務公司REI、奇波雷墨西哥燒烤公司（Chipotle Mexican Grill Inc.）還過喬氏連鎖超市（Trader Joe’s）。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
（Android連結：https://reurl.cc/8GWlXd）
（IOS連結：https://reurl.cc/O1pb59）
歡迎討論或留言給我們: