文／林淳華，戴豐原、係學老人，中央大學客家學院博士後研究（大埔腔）
𠊎雖然毋係客人，因致吾工作同興趣愛學客話，客語高級認證今年第一擺舉行，𠊎有參加測驗，考撇了後，當多個客語字詞漸漸毋記得，毋過，有三件事情毋會毋記得。
第一件事情，在準備認證過程中，長在查教育部臺灣客家語常用辭典，乜讀客語能力認證參考詞彙，有兜詞彙這擺斯知仰脣用字，親像「掩磡」，係講「掩蓋事跡」，長在用抽象个事情，毋係講具體个東西，親像「交關」，係講關照別人个生理，「膏嗟」係柔性遊說別人。掩磡、交關、膏嗟个學老話乜共款，𠊎長在用，毋會寫，堵好參考詞彙有寫出來，總算知曉仰脣寫，雖然取厥聲，毋過，有定錨个作用，下次擺準講尋著較素絲个文字，乜使得改撇。
第二件事情，𠊎參加閱讀、書寫測驗時，正手片考生係細阿妹，遽遽早十分鐘斯寫撇，思考邏輯當慶，𠊎看著佢寫撇，斯趕緊寫撇，𠊎乜知著隔壁鄰舍後生教師乜去考認證，看著恁多後生人考高級認證，證明後生人願意來學客家話，「莫忘祖宗言」，客語正經斯還有救咧！
第三件事情，𠊎在考場看著一個斷撇手巴掌个監考先生，看佢斷一隻手掌乜願意行出來服務吾等，再困難个考試，吾等乜愛煞猛完成佢。這斷掌先生分𠊎愐著，斷掌先生無法度救轉厥手，毋過，認證測驗考毋過，明年還有，測驗過再艱苦，還係無像斷掌个痛苦。因為這擺測驗，吾等同斷掌先生相堵，互相學習。
毋管測驗成績係高抑係低，𠊎對這擺認證考試學著當多語詞文字个寫法，因為先有語言，正有文字，這係當正常个事情，毋過先用文字紀錄語言，乜係盡重要个事情。還有，看著後生考生，心肝肚愐著客語還有救。斷掌先生个成長過程，毋知分人誚㸐幾多擺，恁呢艱苦，佢斯行過來，這滿一屑屑困難个題目，根本無法度同厥艱苦比較，所以，題目難、時間無罅，斯愛想解決个辦法，毋係輒輒怪怨先生題目出忒難，係斯像菜籃㧡水，無採工。
華語：刻骨銘心的事情
我雖然不是客家人，但是因為工作和個人興趣喜歡學客家話，我參加了今年第一次舉行的客語高級認證測驗，考完之後，很多客家字詞都漸漸忘記，但是，有三件事情刻骨銘心。
第一件事情，在準備認證過程中，常常在查閱教育部台灣客家語常用辭典，也讀客語能力認證的參考詞彙，透過這次準備測驗，才知道詞彙的用字，像「掩磡」，是說「掩蓋事跡」，通常指抽象的事情，不是講具象的東西。又如「交關」，是講關照別人的生意，「膏嗟」是柔性遊說別人接受。掩磡、交關、膏嗟的閩南語也同樣發音，我常常用，但是不會寫，剛好參考詞彙寫出來，終於知道是這樣寫。雖然取音，不過有定錨的作用，下次如果遇到更適合的文字，也可以修正。
第二件事情，我參加閱讀、書寫測驗時，右邊的考生是年輕女孩，測驗時間到的前十分鐘就寫完，思考邏輯強，我看她寫完，也趕緊寫完。我也知道大樓隔壁鄰居的年輕女老師也去考認證，看著那麼多年輕人去考高級認證，證明年輕人願意學客語，「莫忘祖宗言」，客語真的還有救啦！
第三件事情，我在考場看到一位斷掉手掌的監考老師，看他斷了一隻手掌也願意走出來服務我們，再困難的考試，我們也要認真完成它。我也想到，斷掌老師沒有辦法救回他的手，但是，認證考試考不過，明年還有，測驗再困難，也不如斷掌老師的痛苦。因為這次的測驗，我們和斷掌老師可以相遇，互相學習。
不管測驗成績是高？還是低？我在這次認證學到很多詞語的文字寫法，因為先有語言才有文字，是正常的事情，不過，先用文字記錄語言，也是非常重要的事情。還有，看到年輕老師來參加認證測驗，心想客語還有救。斷掌先生的成長過程，不知道受盡多少冷嘲熱諷，這樣辛苦，他都走過來了，測驗的這一點點困難的題目，根本無法和他的辛苦相比，所以，題目難、時間不夠，要想解決的辦法，不是一直怪老師出題太難，如同客家話：「菜籃㧡水—無採工」。
歡迎討論或留言給我們: