電視金鐘獎頭一擺分做2日舉辦還係超過時間　李永得講：會持續檢討

【羅盛滿／新竹竹東海陸腔】電視金鐘獎頒獎典禮今年頭一擺分做節目類、戲劇類連續2日舉辦，但係2日个典禮共樣還係超過時間。無黨籍立委黃國書講，當初規劃2日就係愛避免超過時間。文化部長李永得表示，流程係毋係做得還較順序，文化部也會繼續檢討。

李永得今晡日到立法院教育及文化委員會進行業務報告，佢表示，這係電視金鐘獎頭一擺分做2日，增加當多專業技術獎項，分幕後工作人員分大自家看著，明年會繼續分開辦理。

李永得試著今年金鐘獎个表現有80分，原因係有達到一兜仔初步效果，「頭過有兜科學抑係人文節目較無恁容易分大家看著，所以分開辦理，有機會分該兜節目凸顯出來，在紅毯頂也有機會在直播該下表達自己个想法，這部分有價值，試著當值得。」但係佢也強調，有兜流程確實愛持續徵詢意見還過改善。

世界民主運動大會在韶早舉行　蔡總統講：結盟反制威權

總統蔡英文今晡日接見世界民主運動全球大會聯合訪問團，佢講，威權政權透過經濟戰、資訊戰、認知戰這兜方式，圖謀影響民主國家體制个穩定運作；當民主國家共下團結會產生還較強大个結盟力量，正做得有效反制威權政權帶來个各項挑戰。

今年係第11屆「世界民主運動」（World Movement for Democracy, WMD）全球大會，主題係「主導民主未來：為新領域團結發聲」，會從韶早10月25到27三日在台灣舉行。

蔡總統表示，這擺个全球大會係邊境解封之後，在台灣舉行个民主盛會，出席个貴賓來自全球70隻國家、200零儕个民主運動人士，大家聚共下交換寶貴意見。佢相信，透過這擺大會做得繼續推動民主國家个團結合作，分全球民主發展還較堅固實在有力。

「米國國家民主基金會」主席沃拉克（Kenneth Wollack）講，台灣係一隻還算後生个民主政體，台灣也係在40年个戒嚴之後，正轉型民主化；就算台灣對內對外都有盡多挑戰，但係台灣民主嗄無任何倒退、衰亡个意思；事實上，台灣民主毋單淨無衰亡，甚至台灣个民主分台灣个公民還較團結，台灣个民主也確保台灣做得持續繁榮穩定。

｜講客廣播電臺－收聽頻率｜

▹宜蘭 FM102.9

▹北北基高屏 FM105.9

▹桃竹 FM105.7

▹苗中彰投 FM101.5

▹雲嘉南 FM104.3

▹花東 FM106.9

｜網路收聽｜

▹講客廣播電臺官網｜https://pse.is/R8RU8

▹講客廣播電臺APP｜

(Android連結：https://reurl.cc/8GWlXd)

(IOS連結：https://reurl.cc/O1pb59 )