烏克蘭國會感謝世界支持　難忘台灣從開戰起勢一路相挺

【羅盛滿／新竹竹東海陸腔】烏克蘭國會今晡日透過社群平台發文，承蒙大自家從俄羅斯2月底開始攻擊以來、全世界對烏克蘭个支持，其中包括距離當遠个台灣。台灣民眾先前還在台北進行假死抗議活動，展現「大家都係烏克蘭人」來支持烏克蘭。在台北个抗議活動過程當中，放送頭播出像係俄羅斯空襲、還過炮彈大嫲牯聲个攻擊聲響，抗議民眾伏在地泥下詐死，表達佢兜對俄羅斯侵略行為个抗議，還過寫等「TAIWAN　STANDS　WITH　UKRAINE　烏克蘭加油」个布條。烏克蘭國會表示，烏克蘭人持續為前途奮鬥，還過對全世界个支持充滿感謝。

參加旅行團愛先注好3門預防射　12歲到18歲愛先注好2門射

中央流行疫情指揮中心先前宣布，4月22起勢、參加旅行團必須愛先注忒3門COVID-19預防射正做得，觀光局个局長張錫聰、摎旅行業還過旅宿業溝通，包含必須完成第3門注射个對象、還吂注第3門射个旅客愛仰般處理、特定團體个認定、還過解約問題這兜。觀光局表示，參加團體旅遊个旅客、還過旅行社个工作人員，都必須完成第3門射个接種，12歲到18歲个旅客愛注忒2門射、正做得參加旅行團。18歲以上還吂注追加劑（就係還吂注第3門射），毋過已經滿第2門間隔期（12隻禮拜）个旅客，請煞煞在出團以前，注好第3門射。但係已經注忒兩門射，毋過「吂滿」間隔期（12隻禮拜）个人，出示注忒2門射个證明斯做得參加。另外，有醫師開立證明，做毋得注射「所有」疫苗个人，請旅客提供參加旅行團、前一日抑係當日个「快篩」陰性證明，斯做得參加。

浣熊摎大隻个山狗太（綠鬣蜥）這兜　有8,480種動物做毋得進口台灣　對源頭管制外來種

為着防範外來入侵種生物影響本土生態環境，對源頭加強外來生物輸入管理，在110年邀集漁業署、海洋委員會海洋保育署這兜單位，盤點評估高入侵風險外來種動物清單。林務局指出，經過幾下擺摎專家學者、還過相關團體召開會議，國際貿易局預告管制輸入浣熊摎大隻个山狗太（綠鬣蜥）這兜，一共約8,480種動物，公告生效過後，會做毋得再過因為商業目的申請輸入到國內，對源頭管控外來種入侵。

｜講客廣播電臺－收聽頻率｜

▹宜蘭 FM102.9

▹北北基高屏 FM105.9

▹桃竹 FM105.7

▹苗中彰投 FM101.5

▹雲嘉南 FM104.3

▹花東 FM106.9

｜網路收聽｜

▹講客廣播電臺官網｜https://pse.is/R8RU8

▹講客廣播電臺APP｜

(Android連結：https://reurl.cc/8GWlXd)

(IOS連結：https://reurl.cc/O1pb59 )