文／張鳳英，家管，戴桃園龍潭（四縣腔）
該一年，𠊎讀國小三年級，天旱盡久無落水，地泥分日頭晒到必離必絲，一寸一寸裂開來。陂塘燥到見底，往日照等雲影个水面，淨伸著裂開來个泥，還有日頭晒過後个日𤊶味。熱𤐰𤐰个日仔異難捱，連頭牲乜企坐毋核。
有一日，吾姆喊𠊎背等第二個老弟，去燥忒个陂塘，將晒在該位个蘿蔔乾收轉來。該原本係一件當平常个事頭，嗄變𠊎一生人最難添放忒个記憶。
該央時，𠊎還吂到燥陂，遠遠就看著兩條水牛在空地項走相逐，塵灰滿天飛飛到滿遍。起先，𠊎還想講佢兜係發肉雄走相逐。吂知佢兜目鬥鬥惡豺豺，角對角鬥起來，歸隻氣氛玄風緊張起來。
阿姆忽然間停下腳步，大聲講「牛相鬥。」牛相鬥盡得人驚，牛相鬥該下牛會像發狂樣，佢兜毋會閃人直直撞等去，麼个都毋驚，麼个都敢撞。
阿姆喊𠊎背好二老弟，遽遽走去叔公屋下囥起來。𠊎毋敢斡頭盡命牯走，走到上氣接毋著下氣，總算走到叔公屋下，這時阿姆乜來到了。佢緊手緊腳將又賁又重个樹門關起來並拴起來，就像係愛將歸個世界个危險，摎佢關在門背。
毋知對哪來个力頭，阿姆兩隻手一下就將𠊎摎老弟共下揇上大眠床，自家乜跈等蹶上來。三個人揇到緪緪跔做一堆，心肝哱哱飆，飆到強強會跳出來。
就在𠊎兜恅著安全了該下，無想著正𥍉下目个時間，打輸該條牛嗄直直舂到叔公屋下來，盡力牯撞門，賁賁个樹門枋並並磅磅，一下仔門就分佢撞開來，直直入到大眠床這間並將前腳摎前半身蹶上大眠床。𠊎盡驚盡驚，像歸隻世界就淨伸著驚定定。
一轉首，毋知係佢力頭用忒，也係天公同情𠊎兜，該頭牛嗄停下來。兩隻前腳踏在大眠床頂，無過向前一步。
另外一條打贏个牛，早就分厥主人擋下來，牽轉屋下去了。危險解除，𠊎等還係當久都毋敢停動，手腳像冰恁冷，心肝還在該哱哱飆。過了有一陣仔，正敢慢慢仔下來，轉到陂塘，去收還吂晒燥个蘿蔔乾，㧡轉屋下。該日像發惡夢樣个場景，已經深深刻在𠊎心肝肚。
一𥍉目七十年過去，燥忒个陂塘早就無在該了，蘿蔔乾个味緒乜淡忒去了，毋過，該條停在大眠床脣該條牛，還係無法在𠊎个記憶裡肚搬走。
華語
那一年，我讀國小三年級，久旱不雨，大地像被烈日反覆烘烤過，一寸寸龜裂開來。池塘乾涸見底，往日映著雲影的水面，只剩下乾硬的泥痕與曝曬後的氣味。熱呼呼的日子真難熬，連牲畜也顯得躁動不安。
有一天，母親要我背著二弟，到乾裂的池塘地，幫忙收回曬在那裡的蘿蔔乾。那原本只是一件再尋常不過的家務，卻成了我此生難以抹去的記憶。
那時候，我還沒到乾旱的池塘，遠遠就看見兩頭水牛在空地上追逐，塵土飛揚。起初，我以為牠們只是玩鬧賽跑。哪知它們怒目相視，角與角正面相抵，整個氣氛驟然緊繃。
母親忽然停下腳步，大聲說「牛相鬥。」牛相鬥是非常可怕的，在相鬥時牛會像發狂樣，它們不會閃避直接闖過去，天不怕地不怕，橫衝直撞。
母親要我立刻背好二弟，趕緊往附近叔公家躲起來。我不敢回頭拼命地跑。跑到上氣不接下氣，總算跑到叔公跑進叔公家，這時母親也已追上來，她迅速關上厚重的木門關好並上栓，彷彿要把整個危險的世界隔在門外。
不知從哪裡來的力氣，母親將我和弟弟一把抱上通鋪，自己也跟著爬上來。我們三人緊緊相擁縮在一起，心臟蹦蹦跳個不停，好像要跳出來似的。
當我們以為安全之際，不料轉眼之間，那鬥敗的那頭牛竟直衝叔公家而來，猛烈撞擊木門，兩三下就將門板撞開，直接進入通鋪並將前腳踏通鋪，我非常害怕，好像整個世界瞬間只剩下恐懼。
一瞬間，不知是牠力氣耗盡，還是天意憐憫，那頭牛竟停住了。兩隻前腳踩在通鋪上，沒有再往前一步。
另一頭勝出的牛，早已被主人制止，牽回家去。危機解除，我們卻久久無法動彈，手腳冰冷，心仍狂跳不止。過了許久，才敢慢慢下來，回到池塘地，收拾尚未完成的蘿蔔乾，挑回家。那天像惡夢的場景，早已在我心裡留下深深的印記。
轉眼七十年過去，乾旱的池塘早已不在，蘿蔔乾的氣味也淡了，但，那頭停在通鋪邊緣的牛，卻始終在記憶深處無法挪去。
