文／林苡嘉，花蓮客家人，有原住民身分，現於桃園讀大學（四縣腔）
這幾日跈等學校个原住民學生資源中心共下去台東都蘭部落，體驗台東阿美族个傳統生活。雖然講𠊎兜係去阿美族个部落，毋過𠊎這個客家系个學生仔還係在這五日个行程當中尋著一息仔客家个味緒。
第一日進行部落導覽，部落个阿哥帶等𠊎兜去部落裡肚，摎𠊎兜紹介部落个人文、風景。阿哥先摎𠊎兜講都蘭部落有各種信仰，除忒大家輒常看著个原住民信仰比論講基督教、天主教以外，乜有道教、佛教信仰个祭祀中心。講忒信仰文化過後，共條路行下去就來到部落八卦中心——雜貨店，雜貨店裡肚最特別个就係該位有賣「siraw」，「siraw」就係醢，有豬肉醢、魚卵醢，還過其他个，部落个族人都講「siraw」當好食，毋過因為「siraw」都係一罐一罐賣个，又當鹹，愛傍飯食，𠊎戴在學校宿舍無恁方便食，就無買。
續下來𠊎兜跈等阿哥繼續行，行啊行仔，阿哥在路脣看著枸薑，就停下來摎𠊎兜講有當多地方會用著枸薑，講著做得拿來包食个東西，阿哥突然講一句，該客家人也會用枸薑來包東西，佢一下無想著麼个東西，𠊎就在邊脣緊想𠊎等客家人哪位會用到枸薑。𠊎還吂想著，佢想著咧，佢就講：「啊！客家人會用月桃葉來墊草仔粿！」一聽著這句話，𠊎突然間毋知愛講麼个，因為客家人確實會用枸薑來墊艾粄，毋過客家人毋會講「草仔粿」，𠊎兜會講「艾粄」，故所一聽著「草仔粿」个時節，𠊎斯呆咧一下，但係做得在原住民部落聽著摎客家有關个東西，𠊎還係試著當歡喜。
除忒「艾粄」以外，在最尾一個暗晡有晚會，晚會有放音樂，大部分係原住民个音樂，毋過聽啊聽吔，斯聽著一首客家歌曲！係神棍樂團个〈九號公路〉，本旦想講係𠊎聽毋著了，結果認真聽咧一下，正經係客家歌！
講了恁多，其實𠊎除忒係客家人以外，乜係原住民，可能係因為𠊎平常時都在該做摎客家有關个事情，故所大家都毋知𠊎也係原住民，毋過這擺在都蘭部落正經有轉屋个感覺，除忒原住民文化以外，無想著還會出現客家文化，都分𠊎試著當親切。
華語
這幾天跟著學校原住民學生資源中心一起去台東都蘭部落，體驗台東阿美族的傳統生活。雖然我們是去阿美族部落，但是我這個客家系的學生還是在這五天的行程當中找到一些客家的味道。
第一天是部落導覽，部落的哥哥帶著我們去部落裡，跟我們介紹部落的人文、風景。哥哥先跟我們說都蘭部落有各種信仰，除了大家平常看到的原住民信仰例如基督教、天主教以外，也有道教、佛教信仰的祭祀中心。講完信仰文化之後，同一條路走下去就來到部落的八卦中心——雜貨店，雜貨店裡最特別的就是有賣「siraw」，「siraw」就是醃過的肉，有豬肉、魚卵，以及其他，部落的族人都說「siraw」很好吃，不過因為「siraw」都是一罐一罐賣的，又很鹹，要配飯吃，我住在學校不太方便吃，就沒買。
接下來我們跟著哥哥繼續走，走著走著，哥哥在路邊看到了月桃樹，就停下來跟我們講有很多地方會用到月桃，講到可以拿來包食物，哥哥突然說了一句，客家人也會用月桃來包東西，但他一下想不到包什麼東西，我就在旁邊開始想我們客家人什麼時候會用到月桃。我還沒想到，他想到了，他就說：「啊！客家人會用月桃來墊草仔粿！」一聽到這句話，我突然不知道要說什麼，因為客家人確實會用月桃來墊艾粄，但是客家人不會講「草仔粿」，我們會講「艾粄」，所以一聽到「草仔粿」的時候，我愣了一下，不過能夠在原住民部落聽到跟客家有關的東西，我還是覺得很開心。
除了「艾粄」以外，在最後一天晚上有晚會，晚會有放音樂，大部分是原住民音樂，不過聽著聽著，卻聽到了一首客家歌曲！是神棍樂團的〈九號公路〉，本來想說是不是我聽錯了，結果認真聽了一下，真的是客家歌！
說了這麼多，其實我除了是客家人以外，也是原住民，可能是因為我平常都在做跟客家有關的事情，所以大家都不知道我也是原住民，不過這次在都蘭部落真的有回家的感覺，除了原住民文化以外，沒想到還出現客家文化，都讓我覺得很親切。
