文／邱秀坊，高中、國中、幼兒園客語先生摎客語薪傳師，屏東客家人，這下歇板橋（南四縣腔）
八月中旬轉妹家。朝晨六點半，阿姆用手𢱤等助行器在自家个庭院散步。熱天个庭院，有玫瑰、三角梅、大紅花相爭泌背開到蓋鬧，空氣中乜飄等桂花、七里香摎樹蘭花个香味，忽然間，一隻鳥仔停在水池脣啉水，水池裡肚个魚仔還恁清閒在水肚泅來泅去，阿姆𫟧院仔散步一圈又一圈。過無異久，阿姆摎看護雅妮，著等共款式柑仔色个衫出門。
係呀，今晡日又係拜四，97歲个阿姆愛到通明宮廟前上課。阿姆同𠊎講：樂齡活動安排在逐禮拜四，朝晨九點到十一點，當晝有便當帶歸來食，睡當晝過後，兩點到四點再過去上課，下晝乜有點心，二儕人一隻月正兩百個銀定定。
機會難得，陪等阿姆到廟前个廣場，這擺看著莊下个老人家，當多人來上課，正經係「食到老、學到老」。𠊎在脣頭也隨等指導先生做運動，除忒圓身个運動表現，乜分老人家用筆，摎「竹田美崙關懷據點」个字樣，塗上色目，變到靚靚个字。看著阿姆，無論係動態个活動，抑係靜態个畫圖，都做得跈等大家个腳步，心肝肚忍毋核為阿姆大力阿腦，仰恁慶！
回想，2022年，𠊎轉妹家該時，堵好「竹田鄉美崙社區關懷據點」開幕，該央時屏東縣長潘孟安先生這兜長官揭牌，潘縣長特別強調，社區關懷據點，主要提供老人家學習新知識个環境，分佢兜有快樂个晚年。
毋多知仔，原來阿姆這五年來，除忒人無鬆爽，出席率有百分之九十以上，𠊎為阿姆个學習精神試著盡沙鼻。先生个音樂結合拍仔動作，手腳達著每隻關節活動，還有桌遊動腦筋增智慧，DIY編中國結、鎖匙圈，廢物利用將屋下个空罐仔，加工後變做有用个盒仔，做得裝東西，還用扇仔做過年个裝飾造型，當有喜氣；乜用膨紗線做相框實用又當靚，阿姆節做康乃馨捧花，當然有看護雅妮个𢯭手。
竹田鄉美崙村關懷據點个活動，還包括逐日个量血壓、量體溫、訪視、電話關懷，不管係康健、抑係毋方便个老人家，都帶來活力。美崙村長同社區發展協會个成員，無私个共同付出，正經係老人家个福氣啊！𠊎愛美崙村。
華語
八月中旬回娘家。早上六點半，媽媽手推助行器在自己家的庭院散步。夏天的庭院，有玫瑰、九重葛、扶桑花互相爭豔開得很漂亮，空氣中也飄著桂花、七里香和樹蘭花的香味，忽然，一隻鳥停在水池旁喝水，水池中的魚還很悠閒在水裡游來游去，媽媽在院子散步一圈又一圈。過沒多久，媽媽和看護雅妮，穿著同一款式橘色的上衣出門。
是呀，今天又是星期四，97歲的媽媽要到通明宮廟前上課。媽媽跟我說：樂齡活動安排在每個星期四，早上九點到十一點，中午有便當帶回來吃，睡午覺過後，二點到四點再去上課，下午也有點心，二個人一個月才兩百塊而已。
機會難得，陪著媽媽到廟前的廣場，這次看到鄉下的老人家，很多人來上課，真的是「活到老、學到老」。我在一旁也隨著指導老師做運動，除了身體的運動表現，也給老人家用筆把「竹田美崙關懷據點」的字樣，塗上顏色，變成很漂亮的字。看到媽媽，無論是動態的活動，還是靜態的畫圖，都可以跟得上大家的腳步，心裡忍不住為媽媽大力稱讚，怎麼那麼棒！
回想，2022年，我回娘家的時候，剛好「竹田鄉美崙社區關懷據點」開幕，那時候屏東縣長潘孟安先生和長官們揭牌，潘縣長特別強調，社區關懷據點，主要提供長輩學習新知的環境，給他們有快樂的晚年。
不知不覺，原來媽媽這五年來，除了人不舒服，出席率有百分之九十以上，我為媽媽的學習精神感到很驕傲。老師的音樂結合拍子動作，手腳達到每個關節活動，還有桌遊動腦益智，DIY編中國結、鑰匙圈，廢物利用將家裡的空罐子，加工後變成有用的收納盒，還用扇子做過年的裝飾造型，很有喜氣；也用毛線做相框實用又漂亮，母親節做康乃馨捧花等等，當然有看護雅妮的幫忙。
竹田鄉美崙村關懷據點的活動，還包括每天的量血壓、量體溫、訪視、電話關懷，不管是健康、或者不方便的老人家，都帶來活力。美崙村長和社區發展協會的成員，無私的共同付出，真的是老人家的福氣啊！我愛美崙村。
