文／邱鴻春，客語文薪傳師，桃園楊梅伯公岡客家人（海陸腔）
阿姆腰骨痛，前站仔開刀，目前休養恢復中，無才調去菜園知理，當然就無菜好賣，乜無法度做菜頭粄摎艾粄，當多老主顧在路頭路尾堵著，就會關心問，仰恁久無看著出來做生理，這就係伯公岡客家莊个人情味。
冬節前幾日，看佢硬硬無結無煞，手痎心撓撓就係想愛挼粄圓，往年連挼三暗晡，一暗晡20斤米，祖孫三代在廳下鬧熱煎煎，第二朝晨市場賣淨淨，買過儕相賽都阿腦好食，阿姆暢到尾仃仃，非常有成就感。
這日好點點嗄分佢想著，還有舊年揰罐仔个覆菜，怕有五、六十罐吂賣忒，想愛搭人賣又敗勢，記得識聽平平共下賣菜个賣菜伴仔講，有一個餐廳後生頭家，識來市場買過，見來就買嶄蠻多，就摎𠊎講係麼人个子弟，吂知𠊎斷真有熟事欸，就黏時發信息問佢：「有需要用著無？係有用著又做得歸下去个話，會比市價較便宜息仔分你。」這細阿哥頭家正經當「阿沙里」，等𠊎做閒看著信息，佢早就回𠊎講好，就約好下晝送到佢个農莊餐廳去，總下58罐，拿著錢交分阿姆，阿姆歡喜靂靂笑咪咪仔。
在轉來个路項，經過一片个蓮花田，這下愛講蓮根田正著，因為梗全部燥忒咧。第一擺看著這兜辛苦个農民，在這清冷个天時，在蓮根田採收蓮根，就將車仔停下來看詳細，順續翕幾張相片做紀錄，正知這下採收个方式，已經有用機器來𢯭手咧，就係用一台主機泵浦抽水，接等軟笐噴水，一手拿等軟笐摎噴水口沉落濫泥肚，一手摸哪位有蓮根，摸著有就摎濫泥噴走，正毋會濫泥黏等挷毋起來，就做得較輕鬆摎蓮根拿出水面，順續用笐水噴淨來，若係強挷還當會挷斷忒，就無賣相、價數就毋好咧。
記得舊年南桃園客青交流協會个年底聚會，係去一間莊園，莊園園主盡有頭腦，佢个蓮根田係晒燥个，分大家用砂鐐來挖蓮根，自家不但毋使辛苦採收，還做得分遊客來體驗，就像柑園開放分人摘柑仔共樣，大人細子搞到歡喜靂天，該擺係𠊎第一擺自家挖蓮根，乜係目前唯一个一擺，試著盡生趣盡好搞。
可見當多產業，全做得有新个創意來經營，也印證了行行出狀元這句老話，摎一項頭路、事業認真做好來，就當自然會行出一條自家个路。
華語
媽媽腰痛，前陣子開刀，目前休養恢復中，沒辦法去菜園管理，當然就沒有菜可以賣，也沒辦法做蘿蔔糕和艾草糕，很多老顧客在頭上遇到，就會關心問，怎麼那麼久無看到出來做生意，這就是伯公岡客家庄的人情味。
冬至前幾天，看他不知道怎麼辦才好，手癢癢心裡總想著要搓湯圓，往年連搓三個晚上，一個晚上20台斤米，祖孫三代在客廳下熱鬧滾滾，第二天早上市場賣光光，買過的人都稱讚好吃食，媽媽高興到尾巴都翹起來了，非常有成就感。
這天突然間卻給他想到，記得曾經聽一起旁邊賣菜的朋友說，有一個餐廳年輕老闆，曾來市場買過，每次來都買蠻多的，就和我說是某某人的孩子，沒想到我真的認識他，就馬上發信息問他有需要用到嗎？若有用到又可全部拿去的話，會比市價較便宜一些給你，這年輕老闆真的很乾脆，等我有空看到信息，他早就回我說好，就約好下午送到他的農莊餐廳去，總共58罐，拿到錢交給媽媽，媽媽非常高興的笑著。
在回來的路上，經過一片的蓮花田，現在要說蓮藕田才對，因為梗全部乾掉了。第一次看到這些辛苦的農民，在這寒冷的天氣，在蓮藕田採收蓮藕，就將車子停下來看仔細，順便拍幾張相片做紀錄，才知道現在採收的方式，已經有用機器來輔助了，就是用一台主機泵浦抽水，接著軟管噴水，一手拿等軟管把噴水口沉入爛泥巴裡，一手摸哪裡有蓮藕，摸到有就把泥巴噴走，才不會泥巴黏著拔不起來，就可以較輕鬆把蓮藕拿出水面，順便用水噴乾淨，若是硬挷起來很會拔斷掉，就沒有賣相、價格就不好了。
記得去年南桃園客青交流協會的年底聚會，是去一家莊園，莊園園主很有創意，他的蓮藕田是曬乾的，給大家用圓鍬來挖蓮藕，自己不但無用辛苦採收，還可以給遊客來體驗，就像橘子園開放給人採橘子一樣，大人小孩玩的歡天喜地，那次是我第一次自己挖蓮藕，也是目前唯一的一次，覺得很有趣很好玩。
由此可見，很多產業都可以有新的創意來經營，也印證了行行出狀元這句話，只要認真把一份工作、事業做好，就很自然能夠走出一條自己的路。
