文／客語薪傳師，苗栗大湖人、這下戴桃園大溪（四縣腔）
在這落雨天个下晝，特別會想起阿姆，雖然過身離開𠊎兜已經十年吔～毋過還係記到清清楚楚，佢輒輒會講：「你頭擺細細个時節，險險送分阿二舅姆做倈仔。」續等又接等講：「好在無送分二舅姆哦！恁多兄弟，就你盡會讀書，盡會摎屋下𢯭手，好在正得。」想著這話，心肝肚就會毋盼得，黏時目汁濫泔（註1），阿姆仰會恁遽走呢?
因爭以前庄下个屋下，又係農業社會，大體个家庭都會降較多細人仔，人講：「人多好耕田，人少好過年」愛來𢯭手做事正毋使請人做事，還有因為傳宗接代个關係，逐隻家庭定著愛有降著倈仔，恁樣正做得傳香火摎阿公婆（註2）交代，故所盡多家庭為著愛降倈仔，結果嗄降當多隻妹仔，有兜降著有倈仔，愛降妹仔又降毋著，實在無恁該。
毋過這下係工業社會，無像頭擺農業个社會，一定愛降倈仔來𢯭手（註3）做事，在現代个社會，細倈仔也好細妹仔乜做得，有兜妹仔个頭路當好，賺个錢比倈仔賺還較多，故所有降細人仔就好了！尤其這下个社會，後生人个觀念摎𫣆兜無共樣，就驚細人仔大了，就毋聽爺哀（註4）个話，人講：「降子身無降子心。」
這下逐擺過年會轉去老屋，除忒轉去食團圓飯以外，還會買牲儀（註5）拜阿公婆，在年初二个時節，當然還會去轉妹家，毋過這係代表阿姆轉妹家，去吾二舅姆个屋下拜年，二舅姆九十零歲仔，身體還異健，逐年去拜年个時節，車仔駛到厥禾埕正停好，人還吂下車行落去，遠遠就聽著門口傳來个聲音：「係阿祥仔無？」聽著這親切个聲，心肝肚會想起，摎阿姆共下轉妹家个畫面，手擐（註6）等路嘴講：「恭喜發財，新年快樂！」
這下二舅姆行路毋自在，請一個移工照顧，喊移工去煎粄仔食，順續仔打嘴鼓，逐年就會講：「頭擺摎若姆講，你降恁多倈仔 ，看吊尾錘（註7）阿祥仔，做得分𠊎做倈仔無？𠊎降恁多妹仔來交換做得無？」毋過若姆逐擺就講：「降就降下來，就愛摎佢畜大來，無愛分人。」若姆就毋盼得你分人，毋過恁多兄弟，就你盡輒來看𠊎，恁樣乜像係吾倈仔共樣，𠊎實在當歡喜！
註釋
（註1）目汁濫泔：音mugˋ ziibˋ lamˇ gamˊ；淚流滿面的樣子。
（註2）阿公婆：音aˊ gungˊ poˇ；祖先。
（註3）𢯭手：音ten suˋ；幫忙。
（註4）爺哀：音iaˇ oiˊ；父母。
（註5）牲儀：音senˊ ngiˇ；牲禮、祭品。
（註6）擐：音kuan；提、以手懸空拿著。
（註7）吊尾錘：音diau miˊ cuiˇ；指排行最小的兒子。
華語
在這下雨天的下午，特別會想起媽媽，雖然過世離開我們已經十年了，不過還是記得清清楚楚，她常常會講：「你以前小小的時候，差一點就送給二舅媽當兒子了。」接著又繼續講：「好在沒有給二舅媽哦！那麼多兄弟，就你最會讀書，最會跟家裡幫忙，還好還好。」想到這個話，心裡就會捨不得，馬上就淚流滿面，媽媽怎麼會這麼快離開我呢？
以前鄉下的家裡，又是農業社會，大部份的家庭都會生較多小孩子，人說：「人多好耕田，人少好過年」要來幫忙做事才不用請人，還有因為傳宗接代的關係，每個家庭一定要有生到兒子，這樣才可以傳香火跟祖先有交代，所以很多家庭為了要生兒子，結果生了很多個女兒，有的生到有兒子，要生女兒又生不到，實在沒有那麼簡單。
不過現在是工業社會，不像以前農業的社會，一定要生兒子來幫忙做事，在現代的社會，兒子也好女兒也可以，有些女兒的工作很好，賺的錢比兒子多，所以有生小孩就好了！尤其現在的社會，年輕人的觀念跟我們不一樣，就怕小孩長大了，就不聽父母的話，人說：「生子身無生子心。」
現在每次過年會回去老家，除了回去吃團圓飯以外，還會買牲禮拜祖先，在年初二的時候，當然還會回娘家，不過這是代表媽媽回娘家，去我二舅媽的家裡拜年，二舅媽九十幾歲了，身體還很健在，每年去拜年的時候，車子開到她家庭院剛停好，人還沒下車走進去，遠遠就聽到屋裏傳來的聲音：「是阿祥嗎？」聽到這親切的聲音，心裡會想起跟媽媽一起回娘家的畫面，手提著禮物嘴巴說：「恭喜發財，新年快樂！」
現在二舅媽走路不自在，請一個移工照顧，請移工煎年糕吃，順便聊天，每年就會講：「以前跟你媽講，你生那麼多兒子 ，看最小的兒子阿祥，可以分給我當兒子嗎？我生那麼多女兒來交換可以嗎？」不過我媽媽每次就講：「生就生下來了，就要把他養大來，不要送給人做倈仔。」你媽媽就捨不得你送人，不過那麼多兄弟，就是你最常來看我，這樣也像是我兒子一樣，我實在很高興！
