文／黃筱婷，竹東客家人，這下戴竹東鎮（腔頭：海陸腔）

亻厓个阿爸做麼个事情都當認真，阿爸做得講係亻厓從細到大學習个模範，大自家阿腦佢係一個煞猛賢孝又當負責个人；前駁仔阿爸分人邀請擔任北埔社區大學个竹塹歷史先生，社區大學希望阿爸做得摎自家起廟盡多年个經驗，摎有興趣个鄉親來分享，分大自家做得還較知宮廟寶貴个傳統藝術。為著這擺个課程，阿爸當煞猛，準備咧盡久个時間，佢希望來上課个學生仔，都做得學著傳統宮廟建築个知識。

阿爸在山林壁角个莊頭出世，該位戴無幾多戶人家，乜無麼个車仔上下，該當時屋下个生活當窮苦，根本也無多餘个錢好食飯，阿爸逐日三餐就食番薯籤，平常阿爸就戴在儘採搭个牛欄邊脣，所以阿爸長透摎亻厓講佢自家係「牛子」，亻厓突然間了解無錢好使係當衰過个事情……。

阿爸係長子，屋下還有六隻老弟摎老妹，在阿爸盡細个時節，佢就愛跈等阿公共下到外背做頭路賺錢，分屋下个老弟老妹讀書；雖然生活當窮苦，毋過阿爸當堅耐，從來就毋識怪怨別人，還係當堅強過日仔。

為著愛賺著較多錢，亻厓手分擔屋下个所費，阿爸識摎阿公共下去暗摸叮咚个炭空裡背打炭；阿爸乜識自家一儕背等重鈂鈂个大桶仔，行過彎彎斡斡个山路，到街路賣枝仔冰，見擺阿爸行路轉屋該下都斷烏咧。

包尾阿爸跈等阿公學起廟，阿爸毋想一生人分人看毋起，佢當煞猛學；阿公摎阿爸起廟个技術當好，慢慢仔有盡多人䟓工來尋佢兜來起廟，在桃竹苗，還過花蓮玉里該位，有當多廟就係阿公摎阿爸共下起抑係修整个。

阿爸長透摎亻厓講：「做人定著愛曉得感恩，若係受著別儕个幫助，亻厓兜定著愛記得；亻厓兜答應別儕个事情乜愛盡力做，毋好推懶，恁樣正係對別儕摎對自家負責个表現。」前幾年阿爸決定轉到學校攻讀碩士，該當時佢六十五歲咧，所有學生仔佢歲數最大，但係佢乜係最認真个學生仔，無論起大風抑落大水，阿爸自從毋識缺席任何課程，連研究所个教授都輒常阿腦阿爸做得分大自家做模範，阿爸係最用功个學生仔，乜係亻厓學習个模範。

今這下阿爸七十歲咧，佢三不二時會講自家最感謝个人就係阿姆，若係無阿姆个支持，佢就無辦法做自家想愛做个事情；亻厓誠心希望亻厓爺哀逐日都愛開容笑面，保持好心情，最重要个係身體平安又康健。

華語

我的父親做什麼事都很認真，父親可以說是我從小到大的學習模範，大家都稱讚他是一個勤勞孝順又很負責任的人；前陣子父親被邀請擔任北埔社區大學的新竹歷史老師，社區大學希望父親能夠把自己建造傳統廟宇很多年的經驗，和有興趣的民眾一起分享，讓大家可以更加曉得廟宇寶貴的傳統藝術。為了這次的課程，父親努力準備了很久的時間，他希望來上課的學生，都能夠學習到傳統廟宇建築的基本知識。

父親在十分偏僻的村莊出生，那邊住沒幾戶人家，也沒什麼車子經過，那個時候家裡的生活很窮苦，根本也沒有多餘的錢可以吃飯，父親每天三餐吃的都是番薯籤，平常父親就住在隨意搭的牛棚旁邊，所以父親常常和我說他自己是「牛子」，我突然有些明白那種沒錢可以用的悲哀…

父親是長子，家裡還有六個弟弟和妹妹，在父親很小的時候，他就要跟著祖父一起到外面工作賺錢，給家中的弟弟妹妹讀書，雖然生活很窮苦，但是父親很堅強，從來不怨天尤人，還是很堅強的過日子。

為了要賺到比較多的錢，幫忙分擔家裡的經濟開銷，父親曾經跟祖父一起到光線不足的礦坑內採礦；父親也曾經自己一個人背著沉甸甸的的大桶子，走過彎彎曲曲的的山路，到街上賣冰棒，每次父親走路回家的時候，都已經天黑了。

後來父親跟著祖父學習建築傳統廟宇的技術，父親不想一輩子讓人瞧不起，他非常努力的學習各種廟宇建築的相關技藝；祖父和父親的建廟的技術很好，逐漸有許多人專門來找他們幫忙蓋廟，在桃竹苗這些地區，還有花蓮玉里那邊，有很多的廟宇就是祖父和父親一起建造或是整修的。

父親常常和我說：「做人一定要知道感恩，如果受著別人幫助我們，我們一定要記得；我們答應別人的事情也要盡力做，不要偷懶，這樣才是對別人和對自己負責任的表現。

前幾年父親決定回到學校攻讀碩士，那時候他已經六十五歲了，在所有的學生當中，我的父親年紀最大，但是他也是最認真的學生，無論颳大風或下大雨，父親都從未缺席任何的課程，連研究所的教授都常誇讚父親可以給大家做模範，父親是最用功的學生，父親是最用功的學生，也是我學習的好榜樣。

現在父親已經七十歲了，他時常會說自己最要感謝的人就是我的母親，如果沒有母親的支持，他就沒有辦法做自己想要做的事情；我誠心盼望父母每天都要眉開眼笑，保持好心情，最重要的是身體平安又健康。