文／楊金鳳，新竹竹東客家人，做護理師40年吂退休（海陸腔）
逐擺去食酒个時節斯會看著，著等靚靚新娘衫个新娘企在臺頂，新娘公斯會對厥丈人老講好聽个話，分佢兜安心，說佢會分新娘過幸福个日仔。亻厓長下在該想，麼个係幸福？其實幸福个意思在「心理學」上來講，係ㄧ種情緒快樂摎滿足个感覺。幸福个感覺乜係當主觀个，逐儕人對幸福个感覺斯無共樣。
幸福到底係麼个 ？有人試著戴大別莊，駛名牌車，逐日食山珍海味，又有兜人感覺長下出門尞斯係幸福。幸福其實無麼个道理，乜做得當簡單，幸福斯在亻厓俚脣頭，毋使用錢去買，像空氣共樣，大力嘬一口，淰淰个幸福黏時斯來到亻厓俚旁脣，愛用心去感覺，無你斯會毋知幸福斯在脣頭，儕儕斯希望得著幸福快樂个人生。
有一擺亻厓妹仔出國去韓國尞，親家且姆乜出門去別位尞，婿郎一儕人顧兩個細孲仔，大个兩歲零、細个正6個零月定定，所以暗晡時頭，亻厓斯會去摎婿郎𢯭手渡人，暗晡頭佢倆公婆通電話个時節，婿郎問妹仔買兜麼个 ？妹仔講買四領被，本來斯買三領，毋過又看著一領花色當靚，無買會睡毋忒，嗄又買加領，亻厓聽著心肝肚想，屋下還恁多領被，出國還在該買被?婿郎斯問亻厓妹仔講，買恁多領被，仰般帶得轉來!婿郎還問講，韓國流行「emis」个帽仔、「NewJeans」个衫有買無？當下亻厓斯試著這斯係幸福，嫁了人降兩個細人仔了，還恁好，想去哪尞、想愛做麼个、想愛買麼个？老公都同意、贊成，無加一句話。
想著頭擺，嫁人有細孲仔以後，斯係上班、下班、渡細人仔、煮三餐，哪有恁好還做得出門逛街去尞，想斯毋敢想哦!哪有像這下人，做人个心臼，還做得做自家想做个事情，自在做自家，時代變咧！亻厓俚做家娘个人，乜要跈等改變，亻厓个想法係摎心臼準妹仔惜，後生人倆公婆過著好，細人仔教著乖，過年過節轉來做人客，大家快樂過節毋係當好咩？逐儕人都有優點摎缺點，亻厓俚看優點斯好，毋好用膨鏡放大缺點來看。無法度改變別人，斯愛來改變自家。
所以亻厓這下乜試著當幸福，目前亻厓還上班吂退休，三個子女全部結婚乜有細孲仔，孫仔摎外孫加起來全部五個，想著這下社會現象，當多「三拋」（註）个想法，好得亻厓个細人仔無跈這種流行。
亻厓俚毋好有肉嫌無菜，摎人比無比止，應當珍惜自家个所有，過好自家个日仔，平安、健康、快樂斯係最幸福个。
（註）三拋世代（韓語：삼포세대）：華語，是2011年誕生的韓語造詞和網路俚語。意旨拋棄愛情、婚姻和生育的一代年輕人。
華語
每次去喝喜酒的時候就會看到，穿著漂亮新娘禮服的新娘站在臺上，新郎就會對岳父講好聽的話，讓他們安心，說他會給新娘過幸福的日子。我常常在想，什麼是幸福？其實幸福的意思在「心理學」上來說，是ㄧ種情緒快樂跟滿足的感覺。幸福的感覺也是很主觀的，每個人對幸福的感覺都不一樣。
幸福到底是什麼 ？有人覺得住大別墅，開名牌車，每天吃山珍海味，又有些人感覺常出去玩就是幸福。幸福其實沒什麼道理，也可以很簡單，幸福就在我們旁邊，不用錢去買，像空氣一樣，大力吸一口，滿滿的幸福馬上就來到我們旁邊，要用心去感覺，不然你就會不知道幸福就在身邊，每個人都希望得到幸福快樂的人生。
有一次我女兒出國去韓國玩，親家公親家母也去別處旅遊，女婿一個人顧兩個小孩，大的兩歲多、小的才6個多月大，所以晚上的時候，我就去幫女婿顧小孩，晚上他倆夫妻通電話的時候，女婿問女兒買了些什麼？女兒說買了四件被子，本來只買三件，可是又看到一件花色很漂亮，沒買會睡不著，結果又買了一件，我聽到後心裡想，家裡有那麼多被子，出國還在買被子 ？女婿還問女兒，買那麼多被子，怎麼帶得回來!女婿還問說，韓國流行「emis」的帽仔、「New jeans」衣服有買嗎？當下我就覺得這就是幸福，嫁了人還生兩個小孩了，還那麼好，想去哪玩、想要做什麼、想要買什麼？老公都同意、贊成，沒有第二句話。
想到以前，出嫁生了小孩以後，就是上班、下班、帶小孩、煮三餐，哪有那麼好，還可以出門逛街去玩，想都不用想！哪有像現在的人，做人的媳婦，還可以做自己想做的事情，自在做自己，時代變了！我們做婆婆的人，也要跟著改變，我的想法是把媳婦當女兒疼，年輕人倆夫妻過得好，小孩教得乖，過年過節回家當客人，大家快樂過節不是很好嗎？每個人都有優點和缺點，我們看優點就好，不要用放大鏡放大缺點來看。沒辦法改變別人，只能改變自己。
所以我現在也覺得很幸福，目前我還上班沒退休，三個子女也都結婚生子，內外孫總共有五個，想到現在的社會現象，很多「三拋」的想法，幸虧我的小孩沒有跟著流行。
我們不要人在福中不知福，人比人氣死人，應當珍惜自己的所有，過好自己的日子，平安、健康、快樂就是最幸福的。
