文／徐俊文，開南大學國際專修部華語老師（海陸腔）
放學後个臨暗仔，燒風還係像人焙肉个火炭樣，緊吹緊吹，熱到人佇毋著；斜斜个日頭分人个汗水，對額頭滴滴溚溚緊汀，𠊎心肝肚想：「恁熱个天，來食兜辣辣又無共樣个好咧！」𠊎拿起手機，查看下仔學校這片有麼个生趣又好食个。尋啊尋，看著一間印尼餐廳在內壢該片，評論像當好。𠊎心肝肚想：「欸，印尼菜，平常時無麼个會去食，來去試看下仔好咧！」
到了該間店仔，門一開，無涼涼个冷氣，嗄係一陣鹹香个燒臘味。𠊎看下壁頂个菜單，有炒飯、有炒麵，還有一樣特別熟面个字：「Kwetiau」。𠊎个心肝掣一下：「咦？『粿條』毋係泰國當多个華人菜乜？」再過看，還有「燒臘飯」、「Bakso」等等。Bakso，𠊎記得以前在台北車頭旁脣个印尼餐廳乜有食著過，係學老話个「肉麩」，毋過到南洋以後就變到肉圓，食起來有兜摎𫣆里新竹貢圓共樣恁承牙。恁樣愐想下來，印尼料理毋單單係東南亞个味道定定，𠊎兜華人个影響也毋會少。
𠊎行到櫃檯，講：「𠊎愛一份Kwetiau。」𠊎正愛拿錢出來个時節，後尾灶下頭家娘大聲喊：「Kwetiau無咧哦！」
𠊎愕琢一下，用客話應：「啊？無Kwetiau啊？」
「係啊。」頭家應講。𠊎正想著講：「你仰講客話？」
「你同𠊎講客，𠊎就同你應客啊」腔頭聽著熟識熟識，毋過毋係台灣个，還有兜香港惠陽腔个感覺。
𠊎著驚一下：「哇，你兜係客人喔？」頭家笑微微講：「係啊，𠊎係印尼山口洋來个，𠊎兜自然就講客話。」
Kwetiau食毋著，𠊎改點一盤叉燒麵。坐下來等出菜个時節，心乜慢慢恬靜下來。電扇風吹啊來，旁脣个氣味合等香料、豆油、魚露个香，𠊎詳細聽等灶下肚阿叔摎阿姨个聲，全係客話，斯係聲調有兜無共樣，毋過話个意思𠊎全聽得識。𠊎這滿正發現著，雖然店裡肚無幾多儕人，毋過當堵好都係講客个人，乜可能係因為大家知係客人開个店，就緊來緊多客人來食。
菜出揫以後，叉燒麵香氣滿鼻空，叉燒香中帶兜辣。𠊎緊食緊想，本來係想試食看啊印尼菜，嗄撞來一間南洋客人个飯店。雖然無食著𠊎想愛个Kwetiau，毋過𠊎拈走个，係一種特別个發現。原來𠊎个母語，毋單淨係在𠊎个家鄉，在南洋，在印尼，乜有人講、乜有人恁樣生活、乜有人恁樣煮食。𠊎坐在凳仔頂，食等有南洋同客家味个飯菜，聽等熟識又特別腔調个客話，𠊎肚屎淰咧，心肝肚乜淰淰，淰淰个，係一份在熟識个他鄉，堵著講差無多語言个人正有个幸福。
華語
放學後的傍晚，熱風還像烤肉用的炭火一樣，不停地吹著，把人烘得受不了；斜斜的太陽讓汗水從額頭一滴一滴地落下，我心裡想：「這麼熱的天，來吃點辣辣又特別的的東西好了！」我拿起手機，查查看學校這一帶有什麼有趣又好吃的東西。找啊找，看見內壢那邊有一家印尼餐廳，評價好像還不錯。我心裡想：「咦，印尼菜，平常也不太會去吃，不如就去試試看吧！」
到了那間店，一打開門，沒有冷氣的涼意，反而是一陣鹹香的燒臘味撲鼻而來。我看著牆上的菜單，有炒飯、有炒麵，還有一個我特別眼熟的詞：「Kwetiau」。我心頭一跳：「咦？『粿條』不是泰國那邊很多的那個華人料理嗎？」再看，還有「燒臘飯」、「Bakso」等等。Bakso，我記得以前在台北車站旁邊的印尼餐廳也吃過，是閩南話的「肉鬆」，不過到了南洋就變成肉丸，吃起來有點像我們新竹的貢丸，都是那種彈牙的口感。這麼一想，印尼料理不只是東南亞的味道而已，我們華人的影響其實也不少。
我走到櫃檯說：「我要一份Kwetiau。」正要掏錢的時候，後廚的老闆娘大聲喊：「Kwetiau賣完了喔！」
我愣了一下，用客語回應：「啊？沒有Kwetiau喔？」
「是啊。」老闆這麼答。我才想到：「你怎麼會說客語？」
「你用客語跟我說，我當然也用客語回應啊。」他的腔調聽起來很親切，不過不是台灣的腔，還帶有點香港惠陽腔的感覺。
我心裡一驚：「哇，你們是客家人喔？」老闆笑咪咪地說：「對啊，我是從印尼山口洋來的，我們自然就會說客語。」
沒吃到Kwetiau，我還是改點了一盤叉燒麵。坐下來等菜的時候，心情也慢慢平靜下來。電風扇吹來，四周瀰漫著香料、醬油、魚露混合的氣味，我細細聽著廚房裡叔叔阿姨的聲音，全都是客語，雖然語調有些不同，但他們講的意思我全都聽得懂。我這才發現，雖然店裡沒什麼人，不過來光顧的好像全都是說客語的，可能是因為大家知道這是客家人開的店，就會愈來愈多客家人光顧。
菜上齊後，叉燒麵香氣撲鼻，叉燒香中帶點辣。我一邊吃一邊想，本來是想來嘗印尼料理，沒想到卻走進了一家南洋的客家人餐館。雖然沒吃到我原本想要的Kwetiau，但我得到的，是一種特別的發現。原來我的母語，不只是在我的故鄉，在南洋、在印尼，也有人在講、有人這樣生活、有人這樣做菜。我坐在椅子上，吃著融合南洋與客家味的飯菜，聽著熟悉又帶有特別腔調的客語，肚子滿了，心也滿滿的。滿滿的，是在熟悉的異地裡，遇見說著相近語言的人才有的幸福。
