文／田淑芬，台南市客語支援教師，新竹竹北人，這下戴台南市（海陸腔）

「來！準備看𠊎發一隻ACE 球！」「啊！一隻反手拍，看𠊎摎球打出去捩到幾高，底線裡背得分，NICE BALL！」一球又一球个好球，球場脣个拍手聲大嫲牯聲、加油團盡命牯喊，這就係網球餳人个所在。

台灣个國球，五、六十年代定著係野球；這幾十年，國人乜開始注意着乒乓摎羽毛球；這幾年，台灣个網球一姊——謝淑薇在國際賽事創造出當多个好成績，

網球這隻運動乜開始分人接觸摎關心。網球係歐洲國家當時行个運動之一，進行个方式係用球拍摎球打着對方該析个場地，愛分對方接毋着球，無就係莫分對方打過來𠊎俚這析个場地裡肚，看起來簡單，其實無恁該，愛有當好个技術摎體力正做得做着。

𠊎个倈仔——阿廷牯，今年十一歲，國小一年生該下，有一擺下課在教室脣吊晃槓仔，一個網球教練行過來問佢：「愛來參加網球隊無？」佢放學轉來問𠊎做得去無？𠊎笑等講：「你瘦夾夾仔連打羽毛球都有問題，確定愛打網球？」這就係老古人講个：「敢去一擔樵，毋敢去屋下愁」，第二日佢去參加咧！正經係人講个「戇膽」啊！一開始佢對完全毋會打，尋毋着球來打，教練一日一日教，時常乜分教練刻臭頭，逐擺一練就三點零鐘，連冷天都歸身汗流脈落，常時乜有已重个體能訓練，有時這痠該痛，無就係手偏着、腳踣着，𠊎看着乜已毋盼得，佢較細个時節，有幾下擺噭等講：「奈毋何咧！無愛再過打咧！」一開始𠊎乜希望佢放忒莫打咧！這下𠊎毋會勸話佢，愛佢自家想清楚就好，毋過佢還係繼續逐日揹等球袋去球場，毋多知乜練四年零咧！看得出佢正經當好這隻運動，佢恁煞猛，𠊎摎𠊎頭家乜恬恬仔繼續支持。

不管哪種運動，技術上愛較進步，體力、心理乜愛越來越強，還愛緊保持對自我个要求，正經係「臺頂三分鐘，臺下十年功」啊！這下時代毋係像頭擺，頭腦簡單、讀書毋壁个人正會去行體育這條路，嶄蠻多个家長䟓䟓送細人仔去學各類體育項目，不管係泅水、直排輪、跆拳道、自行車、射箭…等等，您想得着个都有，就拿網球來講，一擺一般地區型个比賽至少有百零儕選手參加，加家長、教練个人數差毋多就會兩百儕人咧！係較挑戰个比賽乜有五、六百儕選手參加，恁多人看起來烏麻戰笪當鬧熱，這乜表示當多人重視這隻運動。

台灣好好發展出各類个運動，未來運動產業个發展定毋會幾差，學體育个細人仔，𠊎試着佢兜在練習摎比賽過程肚，會學着規則、規矩、服從、長幼倫理之外，身體有停動會較砸、有較好个自信心摎抗壓能力，過後人生堵着麼个困難，較毋會動啊着就放棄，這兜都係𠊎看着个好處！

華語：阿廷小將上場

「來！準備看我發一個ACE 球！」「啊！一計反手拍，看我把球旋得多高，

底線內得分，NICE BALL！」一球又一球的好球，球場邊的拍手聲超級大聲、加油團賣力喊叫，這就是網球誘人的地方。

台灣的國球，五、六十年代一定是棒球；這幾十年，國人也開始注意到桌球和羽毛球；這幾年，台灣的網球一姐-謝淑薇在國際賽事創造出很多的好成績，網球這項運動也開始被人接觸和關心。網球是歐洲國家很流行的運動之一，進行的方式是用球拍把球打到對手的場地，不讓對手接到球，或是不讓對手把球打過來我方的場地內，看起來簡單，其實不容易，要有很好的技術和體力才能辦到。

我的兒子——阿廷小將，今年十一歲，國小一年級時，有一次下課時在教室旁盪鞦韆，一位網球教練走過來問他：「要不要來參加網球隊？」他放學回來問我可以去嗎？我笑著說：「你瘦巴巴的連打羽毛球都有問題，確定要打網球？」這就是古人說的：「敢去就有所收獲，不敢去就在家裡發愁」，第二天他去參加了！

真的是人說的「無所畏懼」啊！一開始他從完全不會打，找不到球來打，教練一天天的教，也時常被教練罵到臭頭，每次訓練至少三個鐘頭，連冬天都滿身大汗，有時也會安排高強度的體能訓練，時常這裡痠那裡痛，不然就是手扭到、腳拐到，我看到也很捨不得，他年紀比較小的時候，有幾次哭著說：「承受不住了！不要再打球了！」一開始我也希望他放棄別打，現在我不會勸他，會希望他自己想清楚就好，不過他還是持續每天揹著球袋去球場，不知不覺也練了四年多！看得出來他真的喜好這項運動，他如此認真，我和先生也會默默的繼續支持他。

不管哪項運動，技術上要追求進步，體力、心理也要越來越強，還要一直保持對自我的要求，真的是「臺上三分鐘，臺下十年功」啊！現今時代不像以前認為是頭腦簡單、不會讀書的人才會去走體育這條路，蠻多的家長特地送孩子去學各類體育項目，不管是游泳、直排輪、跆拳道、自行車、射箭…等等，您想得到的都有，就以網球來說，一次一般地區型的比賽至少有百餘位選手參加，加上家長、教練的人數差不多就有兩百人參與！要是挑戰賽也有五、六百位選手參加，現場看起來人山人海非常熱鬧，這也表示很多人重視這項運動。

台灣好好發展各類運動，未來運動產業的發展肯定不差，學體育的孩子，我認為他們在練習和比賽過程中，會學到賽程規則、生活常規、服從、長幼有序之外，身體因運動也比較強壯、有較好的自信心和抗壓能力，往後人生遇到什麼困難，比較不容易放棄，這些都是我看到的好處！__