文／邱秀坊，客語薪傳師，係屏東客家人，63年搬到新北市，這下戴板橋（南四縣腔）
𠊎最懷念个人就係阿爸，阿爸係食月給个公務人員，一生清廉，做事情蓋煞猛，當分人阿腦。還記得阿爸个頭路，在屏東縣政府地政科，係有關土地測量、地籍異動、不動產登記等有關个土地業務。記得有一擺，有一個生理人，愛拜託阿爸有關土地个事情，送一盒水果，水果裡肚庰等一大包个錢，阿爸看著，黏時送錢還人，阿爸講：這錢𠊎毋會收，但係你拜託个事情，𠊎定著會盡量辦好，生理人當感謝阿爸。
阿爸不時同𠊎等講，毋好貪別人个錢，你拿著別人个錢，心肝肚乜毋會安定，感謝阿爸分𠊎等細人个時節，對錢有正確个觀念，毋係自家个東西做毋得拿。
𠊎蓋多謝阿爸在男女無平等个時代，尤其係歇在蓋南个屏東，乜分細妹人有讀書个機會，故所𠊎六個兄弟姊妹，阿爸全當關心𠊎等个生活教育，特別做一張長長个桌仔，阿爸每一暗晡陪𠊎等共下讀書，阿爸講：「讀書愛專心，有讀書正有前途，愛趕少年認真讀書，正可以尋得好頭路」。
故所𠊎等讀書，從小學、國中、專科、大學、研究所，好得有阿爸个鼓勵。畢業以後，出來尋頭路，毋會餓著自家，結婚後家庭和樂萬事興，大家乜當感謝阿爸个栽培。
還記得細細个時節，阿爸送𠊎一支口琴，有時間就教𠊎歕歌曲、聽唱盤个音樂來練習，長時間个接觸，對音樂方面當有興趣，尤其係對樂器方面，現下會搞古箏、細竹廉琴、鋼琴，每隻禮拜參加台北客家鄉音竹樂團，同台北客家鄉音合唱團上課，每年都有表演个機會，到今有三、四年了！
下隻月个十一月十七號 ，「2024第七屆陳雙雄客家紀念音樂會」，乜會去表演，阿爸在天頂知得，一定乜會感著驕傲摎歡喜。阿爸蓋知生活个樂趣，但係對自家要求乜盡高，對𠊎等細人仔總係「大做樣細學樣」，愛家庭、愛阿姆，故所八十七年當選模範父親，阿爸得著這份殊榮，正經係「實至名歸」。
「爺娘想子長江水，賢孝爺娘趕眼時，有爺有哀金銀寶，無爺無哀路邊草」。雖然阿爸既經過身十五年咧，相信阿爸在天頂，有保佑阿姆身體康健，繼續照顧𠊎等，阿爸永遠在𠊎等心肚，𠊎等對你个思念無止盡，分𠊎等敬仰你。
華語
我最懷念的人就是爸爸，爸爸是領月薪的公務人員，一生清廉，做事情很努力，大家一直誇獎。還記得爸爸的工作，在屏東縣政府地政科，是有關於土地測量、地籍異動、不動產登記等有關土地業務。記得有一次，有一個生意人，要拜託爸爸有關土地的事情，送一盒水果，水果裡面藏著一大包的錢，爸爸看到，馬上送錢還他，爸爸說：這個錢我不會收，但是你拜託的事情，我一定會盡量辦好，生意人很感謝爸爸。
爸爸時常跟我們說，不要貪別人的錢，你拿到別人的錢，心裡也不會安定，感謝爸爸給我們在小孩子的時候，對錢有正確的觀念，不是自己的東西不要拿。
我很感謝爸爸在男女不平等的時代，尤其是我們住在南部的屏東，也給女生有讀書的機會，所以我們六個兄弟姊妹，爸爸都很關心我們的生活教育，特別做一張長長的書桌，爸爸每天晚上陪我們一起讀書，爸爸說：「讀書要專心，有讀書才有前途，要趁少年認真讀書，才可以找到好工作」。
所以我們讀書，從小學、國中、專科、大學、研究所，幸好有爸爸的鼓勵。畢業以後，出來找工作，不會餓到自己，結婚後家庭和樂萬事興，大家也很感謝爸爸的栽培。
還記得小孩子的時候，爸爸送我一支口琴，有時間就教我吹歌曲、聽唱盤的音樂來練習，耳濡目染，對音樂方面很有興趣，尤其是對樂器方面，現在會玩古箏、細竹廉琴、鋼琴，每個星期參加台北客家鄉音竹樂團，和台北客家鄉音合唱團上課，每年都有表演的機會，到現在已有三、四年了！
下個月的十一月十七日 ，「2024第七屆陳雙雄客家紀念音樂會」，也會去表演，爸爸在天之靈，一定也會感到驕傲和歡喜。爸爸很懂生活的樂趣，但也自我要求很嚴謹，對我們小孩子總是「身教重於言教」，愛家庭、愛媽媽，所以八十七年當選模範父親，爸爸得到這份榮譽，真的是「實至名歸」。
「父母愛子女如滔滔長江水，孝順父母一定要即時，有父母呵護如金銀般寶貝，父母不在時好比路邊草」。雖然爸爸已經過世十五年了，相信爸爸在天上，有保佑媽媽身體健康，繼續照顧我們，爸爸永遠活在我們心中，我們對您的思念是無止盡的，我們敬仰您。
