文／田淑芬，客語支援教師，新竹竹北人，這下戴台南市（海陸腔）
講著客家美食，𠊎个口水強強就會跌下來咧！想愛遽遽認識客家，對客家美食文化開始就無毋著！客家婦人家大體都會挨米打粄，順應節慶、時令發展出百百種个米食。尤其客家粄食盡有名、乜盡多種，𠊎最好食个就係「鹹粄圓」，這係𠊎細个時節摎阿姆學个第一種客家米食。
下背係鹹粄圓个做法，你兜做得試做看啊！無定著乜會創作出有自家味个鹹粄圓。
阿姆識講過做客家米食，有兜事頭愛先準備好勢，比論講愛先𤐙豬油摎烰紅蔥頭，烰好放冷个香蔥油裝在盎肚，煮麵、煠青菜隨時愛用都做得！係驚麻煩，這下市場肚乜買得著人家做个，已利便！
續下來開始炒料仔，放一息仔豬油，摎洗淨、浸水泡軟、泌燥水个蝦米、香 菇絲𤐙香，豬肉絲炒到金黃金黃，放兜紅菜頭絲炒炒仔，頭擺阿姆定著會用半肥靚个三層肉較香，這下𠊎俚驚食肥，用靚豬肉絲就好咧！包尾攪兜香蔥油、豆油無斯豆油膏摎白胡椒粉調味，阿姆識講少一項味道就無像客家味咧！早先浸香菇、蝦米个水乜莫打爽，這下放落去共下煮一下仔，有入味料仔就算好咧！
最尾準備一鑊滾水，摎燙熟个粄圓摎料仔放落去共下煮一下，還愛放韭菜摎艾菜，撮兜鹽摎香油調味，還過扡兜芹菜摎香菜菣香就完成咧！
細細隻、紅紅白白个粄圓在鑊肚沈落浮起斯像跳舞樣，柑紅色个紅菜頭絲、金黃色个紅蔥頭、豬肉絲，歸大把青青又營養个艾菜、芹菜摎香菜做一鑊，還有油亮油亮个湯，實在還餳人食哪，想著這舌嫲差點斯會跈等吞落去咧！
頭擺係冬節，無就係年三十、正月半，阿姆就會煮鹹。粄圓分歸家人食，毋過阿姆這下無方便煮咧，好得𠊎有學著佢个好手藝！這下有轉外家，屋家人若係想食，𠊎就會攝起衫袖準備，𠊎煮个毋單淨係簡單个鹹粄圓，還係一種解鄉愁、想阿姆个味道，乜係𠊎對屋下人永遠毋會斷个情感。
華語
說到客家美食，我的口水忍不住就會滴下來了！想要快一點認識客家，從客家美食文化開始就對了！客家婦人大多都會磨米製作粄食，順應節慶、時令發展出各式各樣的米食。客家粄食很有名、也很多種，我最喜歡吃的就是「鹹湯圓」，這是我小時候和媽媽學的第一種客家米食。
下面是鹹湯圓的做法，你們可以試試看！說不定也會創作出屬於自己味道的鹹湯圓。
媽媽曾說過做客家米食，有些工作要先準備好，比如說要先炸豬油和炸紅蔥頭，炸好放涼的油蔥裝在罐子裡，煮麵、燙青菜隨時要用都可以！要是怕麻煩，現在市場裡也買得到人家製作好的，挺方便的！
接下來開始炒配料，放一些豬油，把洗乾淨、浸水泡軟、瀝乾的蝦米、香菇絲炒香，豬肉絲炒到金黃焦香、再放些紅蘿蔔絲炒一炒，以前媽媽一定會用三層肉比較香，現在我們怕胖，用瘦豬肉絲就可以了！最後放一些油蔥、醬油或是醬油膏和白胡椒粉調味，媽媽曾說少一種味道就不像客家味了！剛才浸泡香菇、蝦米的水也不要浪費，放下去一起煮一會兒，有入味配料就算完成了！
最後準備一鍋熱水，把煮熟的湯圓和配料放下去一起煮一會兒，還要放韭菜和茼蒿，放少許鹽和香油調味道，還有放些芹菜和香菜提味就完成咧！
小小個、紅紅白白的湯圓在鍋裡像跳舞般載浮載沉，橘紅色的紅蘿蔔絲、金黃色的油蔥、豬肉絲，大把大把青綠又營養的茼蒿、芹菜和香菜放在一鍋，還有油亮油亮的湯，實在很吸引人，想到這舌頭差一點就跟著吞下去了！
前冬至、除夕和元宵節，媽媽都會煮鹹湯圓給全家人吃，不過媽媽現在不方便煮了，好家在我有學到她的好手藝！現在回娘家，家人若是想食，我就會捲起衣袖準備，我煮的不只是簡單的鹹湯圓，還是一種解鄉愁、想媽媽的味道，也是我對家人永遠不會斷的情感。
