文／廖佳仁（海陸豐野客），中壢客人，楊梅富岡（伯公岡）出生，任教桃園市中壢區新街國民小學至今已屆35年，目前住在中壢。（腔頭：海陸腔）
七月半，做中元，祭義民爺（舊曆七月二十，新埔枋寮），拜萬善爺（舊曆七月十一，伯公岡），到底係祭天、祭神，亦係祭鬼？這隻問題別个人搞毋清楚無要緊，𫣆俚客人自家一定愛知。
因為逐年个舊曆七月份，七月初一開鬼門，係眾陰間个孤魂野鬼開始避暑个時節，該日个子時一到，鬼門斯愛準時開，係無，該兜好兄弟怕會忍毋核、耐毋得。之後，逐日斷烏後，斯會有人開始「拜門口」（註），「拜門口」定著愛在屋面前，門个外背，準備矮凳、面盆、水摎面帕，桌面頂擺上齋果、點心摎印有衫褲、梳仔…个黃紙加銀紙，點香祭拜好兄弟。街頭庄尾，家家戶戶，各自選定吉日，輪流拜祭，順續請人客，就係食辦桌，一直到七月尾，關鬼門為止。
較功夫个，還愛㓾豬羊，分好兄弟補一下，解解、過過佢兜个願，食肉味个願；較暗兜，正摎該豬羊架項个大豬公，切做一料一料个豬肉料，分分親戚朋友全做得一同食福。因為該兜大豬公都外背放盡久，驚會放臭風忒，就事先在該豬肉面頂、底下全部抹兜鹽，背尾，就變成好食个鹹豬肉，出名个客家鹹豬肉。
又做麼个一定愛等到斷烏以後正做得拜呢？大家試想看啊，該兜好兄弟自陰間來到陽世，最驚个係麼个？驚陽氣、驚日頭、驚紫外線，紫外線會㓾死生物組織，會分人發皮膚癌，好兄弟係分這兜射著、照著後又會變仰形？人死變鬼，鬼死又會變麼个東西？變隻屁啦！故所，𫣆俚祖先自古流傳下來个規矩就係定著愛等到日頭下山、斷烏以後，正做得開始來祭拜這兜好兄弟，恁樣，好兄弟正坐得安心來享用陽世人間个愛心，共下建築出一隻良善个世界。
這幾十年來，因為社會形式從農業行向工商業為主，出門上班食頭路个人也越來越多，戴个房屋樣式又變成以公寓大樓个社區為主，盡多社區自食飽晝後，到成點鐘就開始擺桌祭拜，在這當晝頭，日頭又光又烈，就算你擺到滿桌淰淰，當多當豐沛个祭品，你想該兜好兄弟又愛仰形正做得得著人間个好意呢？
故所，做中元、拜好兄弟、普渡，係愛分好兄弟享受人間淰淰个愛，該就愛多摎佢兜按算設想，愛等著斷烏以後正做得開始祭拜。㓾豬羊，比大豬公、比羊角，也係為著愛迎神賽會，原旦就係為著愛祭拜該兜好兄弟用个。雖然「義民爺」在𫣆俚兜客人个心肝肚，早早就升格做神明咧，毋過，佢兜本質上，還係算係好兄弟。
既然係好兄弟，大家就毋好，也做毋得去欺騙佢兜，用兜假个大豬公、塑膠个大豬公去祭拜，根本就係在該騙「鬼」！恁樣形係毋著个。難怪這下人世間个詐騙集團恁時行，原來揞目珠俚現代人連「鬼」都敢騙！
（註）拜門口：指一種在住家或公司、機關門口祭拜的儀式。
華語
七月半，做中元，祭義民爺（農曆七月二十，新埔枋寮），拜萬善爺（農曆七月十一，伯公岡），到底是祭天、祭神，還是祭鬼？這個問題別人搞不清楚不要緊，我們客家人自己一定要清楚。
因為每年的農曆七月份，七月初一開鬼門，是眾陰間的孤魂野鬼開始放暑假的時候，那一天的子時一到，鬼門就要準時打開，不然，那些好兄弟恐怕會忍不住、受不了。之後，每天天黑後，就會有人開始「拜門口」（註1），「拜門口」一定要在家門前，門的外面，準備矮凳、面盆、水與毛巾，桌面上擺上齋果、點心與印有衫褲、梳兒…圖樣的黃紙和銀紙錢，點香祭拜好兄弟。街頭庄尾，家家戶戶，各自選定吉日，輪流拜祭，順便請客，就是吃流水席，一直到七月底，鬼門關為止。
比較用心的，還要殺豬宰羊，給好兄弟補一下，解解、過過他們的癮，吃葷食肉味的癮；稍晚以後，才將那些豬羊架上的大豬公，切成一條一條的豬肉條，分給親戚朋友全都可以一同分享福氣。因為那些大豬公在外面放很久，怕會放臭餿掉，就事先在那豬肉上面、底下全部抹些鹽來防腐，後來，就變成好吃的鹹豬肉，出名的客家鹹豬肉。
又為什麼一定要等到天黑以後才可以拜祭呢？大家試著想想看，那些好兄弟自陰間來到陽世，最怕的是什麼？怕陽氣、怕太陽、怕紫外線，紫外線會殺死生物組織，會讓人得皮膚癌，好兄弟若被這些射到、照到後又會變怎樣呢？人死變鬼，鬼死又會變什麼東西？變一個屁啦！所以，我們祖先自古流傳下來的規矩就是一定要等到太陽下山、天黑以後，才可以開始來祭拜這些好兄弟，如此，好兄弟才可以安心來享用陽世人間的愛心，一起營造出一個善良的世界。
這幾十年來，因為社會形式從農業走向工商業為主，出門上班領薪水的人也越來越多，居住的房屋樣式又變成以公寓大樓的社區為主，很多社區自吃完午飯後，到一點鐘後就開始擺桌祭拜，都這日正當中，太陽又亮又強烈，就算你擺到滿桌滿滿，很多很豐富的祭品，你想那些好兄弟又要怎樣才感受得到人間的好意呢？
所以，做中元、拜好兄弟、普渡，是要讓好兄弟享受人間滿滿的愛，那就要多替他們盤算設想，要等到天黑以後才可以開始祭拜。殺豬宰羊，比大豬公、比羊角，也是為了要迎神賽會，原本就是為了要祭拜那些好兄弟用的。雖然「義民爺」在我們客家人的心裡面，早早就升格變成神了，不過，他們本質上，還是算是好兄弟。
既然是好兄弟，大家就不要，也不可以去欺騙他們，用些假的大豬公、塑膠的大豬公去祭拜，根本就是在那騙「鬼」！這樣是不對的。難怪現在人世間的詐騙集團如此流行，原來是因為我們現代人連「鬼」都敢騙！
