文／黃美貞，苗栗客家人，光復國小个小學先生， 這下戴臺北市（四縣腔）
在校長室脣項行過去，看著幾下隻花盆仔同花缽仔，有兜仔有種花，有兜仔連草仔都無生，看起來零零㪐㪐（註1），實在看毋過目。
學校肚有一棟特別个樓仔屋，主身係圓个，總共有四棧樓，係臺灣第一個細妹仔建築師設計个。校長室在二樓，中央係天井，做得採光。該隻廊仔通風好、日頭足，愛出入圓樓都會經過。恁好个位所，係有了幾盆仔靚靚个青色植物，來小可打扮一下，歸隻環境都會脫體（註2）無共樣。
𠊎尋出手落仔、砂撩同剪刀放在錫桶仔肚項，先整理舊花缽仔个花，燥忒个拈開、生忒高个剪減兜仔；還愛用鉛線仔、夾仔固定，分佢有好偎凴。半點鐘過後，欄杆仔脣項个風景全無共樣了，看起來淨淨俐俐。毋過，該兩隻空盆仔愛種麼个較好呢？
學校恁闊，總有適當个植物做得徙位，毋使䟓工去買，𢫦𢫦風（註3）想起溜滑梯該搭位仔有一頭老榕樹，榕樹頭下識影著一墩斜斜个山蘇，堵好徙來這位種。認真看該墩山蘇（註4），葉仔像大人个手想恁長，底下有多少仔燥樹杷、黃葉仔，用剪刀定定仔剪，根乜摎佢修修仔，無想著，該隻長型个花盆仔堵好合這山蘇，像開一盆青里里个花樣仔。
椰仔樹下乜有細頭个山蘇，石頭縫、樹根脣，手指公恁大个，特別得人惜，楔兜仔萬年青、再用細花盆加夾仔吊在廊仔下，加兜仔會递藤个龜背芋，風吹啊過來，搖搖擺擺，像一座空中花園。下課時節，先生同學生仔行過去，總會斡頭看一下仔這兜花花草草，這搭位仔，日頭、空氣同水分異充足，小可仔整理都生來榮榮，還開出細細蕊个花，講實在話，無好好來使用正係打爽。
現下，該隻轉角仔同廊仔變成一個細花園，山蘇暴新芽越勢好看、龜背芋个葉仔裂開來，向四圍伸懶筋，發財樹乜緊來緊壯旺，生加幾下支新筍，無想著一個轉念个開始，本旦狼狼犁犁（註5）个壁角會有恁好个一片風景，係想去想轉就無想著个。
有閒時節，衫袖仔攝起來，整理旁脣个環境，就像山蘇徙竇（註6），換一個天轉笠嫲花个好心情。
（註1）零零㪐㪐：音langˇ langˇ ludˋ ludˋ；形容稀疏散亂、不整齊的樣子。
（註2）脫體：音todˋ tiˋ；特別
（註3）𢫦𢫦風：音mag mag fungˊ；形容事情來得很突然。
（註4）山蘇：音sanˊ suˊ；山蘇為多年生常綠草本蕨類。生性強健，病蟲害少。
（註5）狼狼犁犁：音longˇ longˇ laiˇ laiˇ；形容物品散置、凌亂不堪的樣子。
（註6）徙竇：音saiˋ deu；搬家。
華語
在校長室旁邊走過去，看到幾個大小不一的花盆，有些種了花，有些是連根雜草都沒有的空盆，看起來稀稀疏疏，一片零亂，實在是很礙眼。
學校裡有一棟特別的樓房，主體是圓的，總共有四層樓，是臺灣第一個女建築師設計的。校長室在二樓，中間是天井，可以採光。那個通道通風好、陽光足，要出入圓樓都會經過。這麼好的地方，若是有了幾盆漂亮的綠色植物，來稍微裝扮一下，整個環境都會很不一樣。
我拿出手套、鏟子和剪刀，一起放在水桶裡面，先整理舊花盆的花，乾枯的挑出來、長太高的剪掉一些；還用鐵絲、夾子固定，讓它可以固定。半小時過後，欄杆旁的風景全都不一樣了，看起來乾乾淨淨。不過，那兩隻空盆要種什麼比較好呢？
學校這麼寬闊，總有適當的植物可以搬，不用特地去買，突然想起溜滑梯那邊，有一頭老榕樹，榕樹頭下曾見過一叢，歪歪斜斜的山蘇，剛好移來這邊種。認真看那叢山蘇，葉子像大人的手臂般長，根部有些乾枯的枝葉，用剪刀慢慢的剪，把根也修一修，沒想到，該個長型的花盆正好種山蘇，像一盆綠油油的花。
椰子樹下也有小棵的山蘇，石頭縫、樹根旁，大拇指大小的，特別可愛，插些萬年青、加些馬齒莧，再用小花盆加夾仔吊在走廊，風吹過來，搖搖擺擺，像一座空中花園。下課時，老師、同學走過去，總會轉頭看一下這些花花草草。說實在話，這個地方，太陽、空氣和水分很充足，稍做整理就長得茂盛，還開出小小朵的花，不好好來使用才真的叫浪費
現在，那個轉角和走廊變成一個小花園，山蘇發新芽煞是好看、龜背芋的葉子裂了開來，向四圍伸懶腰；發財樹越來越旺，又長出了新枝，沒想到一個轉念的開始，原本亂七八糟的角落會變成一片美景，是完全意想不到的收穫。
有空的時候，捲起衣袖，整理身旁的環境，就像山蘇搬家，換了一個轉圈灑花的好心情。
