文／李文煥，國中特教教師，苗栗縣客家人（四縣腔）

一個熱𤐰𤐰仔（註2）个下晝頭，𠊎同幾個同事還有張教授共下開會，就在會議會煞棚个時節，有一個同事忽然間細聲講：「𠊎心肝頭當厄惻（註3），結公婆二十年个餔娘，好恬恬（註4）講愛離婚！」佢慍悴个聲哨分會議室黏時變到肅恬。佢接等講，餔娘表明想愛「自由」，無愛過分婚姻約束，毋想過分家庭牽連，想過清沙溜沙（註5）个日仔。

講起這兩公婆，係在讀大學時節就開始交往，兩個後生人相知相惜，出社會無幾久就牽手行入婚姻，共下面對生活个風雨。二十年來，兩儕人共下撐起一隻幸福个家庭，經過當多个艱辛同挑戰，一路里來都分人十分欣羨。吂知，一對子女正入大學定定，厥餔娘嗄轉風頭講：「𠊎想愛自家過日仔，無愛再同你䌈共下。」

同事講佢愐毋解，恁多年來，佢煞猛打拚做頭路，無放尞日、無寒暑假，耕田又耕埔，做到兩頭烏，輒輒噩夜寫文章、出莊兼差，千般悿、萬般苦乜齧等牙根過，佢恅著恁樣篤實付出，會換來穩定个生活同家庭幸福，無想著厥餔娘嗄決截講：「𠊎既經毋愛你了！」雖然這下還共下生活，毋過佢兩儕个互動就像平行線共樣，佢正經愐毋解講：「為麼个𠊎盡愛个餔娘會變到恁冷淡？」

張教授勸話講：「公婆相吵無隔夜，踢踢腳趾又講話。你兩公婆共下二十年，哪可能講斷情就斷？轉去枕頭墊高來愐看哪！因為有當多公婆在結婚後，互相期望對方理解自家个辛勞同付出，嗄毋記得去關心對方，維持戀愛个溫度。經營婚姻就像支理菜園共樣，定著愛逐日去淋水、挲草還過捉蟲仔，無斯當遽就會菜燥忒、草生塞了。

張教授續等講：「吾餔娘係外國人，正嫁來台灣該幾年，因為生活、風俗同語言个問題，兩隻細人仔都出世了，還係適應不良，𠊎逐日看佢額結結仔毋係辦法，故所就招佢坐下來參詳，包尾𠊎兩儕講好勢無離婚，分餔娘轉日本去生活，細人仔就一儕渡一隻，總愛佢過到歡喜較重要，人生个路還恁長，定定仔正來調整就好。人會算、天會斷，餔娘愛轉日本進前（註6），嗄忽然間著著當傷重个病，日合夜就係𠊎在該照顧，這件事情過後，餔娘總算了解婚姻个價值所在，兩公婆相扶持个感情，比麼个都較珍貴。」

𫣆人在婚姻裡肚，哪可能麼个就順自家个意，愛學會包容、取捨，愛情需要經營，婚姻更加係恁樣。老古人言：「敢擎獅頭，愛曉得弄。」同事這場危機無定著係轉機，希望佢做得在這會燥忒个菜園，尋著重新綻筍、成長个機緣。

（註1）支理：音ziiˊliˊ；用於形容管理菜園、農地，有梳理的意思。
（註2）熱𤐰𤐰仔：音ngied fog fog eˋ；形容天氣炎熱的樣子。
（註3）厄惻：音edˋzedˋ；形容心情鬱悶的樣子。
（註4）好恬恬：音hoˋdiamˊ diamˊ；好端端地；無緣無故。
（註5）清沙溜沙：音qinˊ saˊ liuˋ saˊ；形容輕鬆自在的樣子。
（註6）進前：音jin qienˇ；之前的意思。

華語

一個天氣炎熱的下午，我和幾個同事還有張教授一起開會，在會議即將結束的時候，有一個同事忽然小聲講：我心裡很鬱悶，結髮二十年的妻子，突然卻說要離婚！他憂鬱的聲音讓會議室馬上變得沈靜。他接著說，妻子表明想要「自由」，不要再被婚姻約束，不想再被家庭牽絆，想過自由自在的日子。

談起這兩夫妻，是在讀大學時候就開始交往，兩個年輕人相知相惜，出社會不多久就牽手步入婚姻，一起面對生活的風雨。二十年來，兩人共同經營一個幸福家庭，經過許多的艱辛與挑戰，一直以來都讓人十分羨慕。怎知，一對子女剛進入大學而已，他的妻子卻變了說：「我想要自己過日子，我不要再與你綑綁在一起。」

同事說他想不通，這麼多年來，他努力打拚工作，沒有週末假期、沒有寒暑假，過著披星戴月的生活，常常熬夜寫文章、到外縣市兼差，千般累、萬般苦也咬著牙過，我以為這樣篤實付出，會換來穩定的生活與家庭幸福，沒想到他的太太卻決然說：「我已經不愛你了！」雖然現在還一起生活，然而兩人的互動就像平行線一樣，他真的想不透說：「為什麼我最愛的老婆會變得這麼冷淡？」

張教授勸解說：「夫妻沒有隔夜仇，踢踢腳趾又講話。你兩夫妻一起二十年，哪可能講斷就斷？回去枕頭墊高思考看看！因為有很多夫妻在結婚後，互相期望對方理解自己的辛勞和付出，卻不記得去關心對方，維持戀愛的溫度。經營婚姻就像管理菜園一樣，一定要每日去澆灌除草還有除蟲，不然很快就會菜枯萎、長滿草了。

張教授接著說：「我的太太是外國人，剛嫁來台灣那幾年，因為生活、風俗與語言的問題，兩個小孩都出生了，還是適應不良，我每天看他眉頭深鎖不是辦法，所以就找他坐下來討論，最後兩人談好了不離婚，讓太太回日本去生活，小孩就一人照顧一個，總要他過得快樂比較重要，人生的路還很長，慢慢的再來調整就好。人算不如天算，太太要回日本之前，卻忽然得了嚴重的病，日以繼夜都是我在照顧，這件事情以後，太太總算了解婚姻的價值所在，兩夫妻互相扶持的感情，比什麼都來得珍貴。

我們在婚姻裡頭，哪可能什麼都心如意，要學會包容、取捨，愛情需要經營，婚姻更加如此。諺語說：「敢舉獅頭，要懂得舞。」同事這場危機說不定著是轉機，希望他能夠在這快要枯萎的菜園，找到重新萌芽、成長的契機。