文．圖／邱鴻春，客語文薪傳師，桃園楊梅伯公岡客家人（海陸腔）
委个拗筍菜
歸廂全草阿姆哀
挷好心肝就話開
頭擺人罵人講，冤枉正得，睡到日頭晒屎胐正䟘！這下人放尞日，睡到過晝自然醒係當正常个，做世大人儕也盡無奈，講咧後生人來，相賽無歡喜，破壞家庭氣氛，想想仔，最起碼無亂糝走，無去做毋好个事情，平常也有認真上班，恁樣就當好咧，做現代个爺哀愛知足。
這禮拜日堵好有閒無活動，朝晨在屋下摸該摸這，食下咖啡就過忒咧。食飽晝後，在廳下小可歇睏一下，差毋多三點邊，無張無時聽著樓頂有響氣，原來係倈仔在樓頂下來，正想著屋下還有人在，佢䟘來食晝，兩餐做一餐食。想想仔歸朝晨在屋下，無運動著也無啉著水，就想出去運動一下，順續補充水分促進代謝，就摎倈仔講，𠊎愛出去運動，來去菜園摎阿婆𢯭挷草，開玩笑問佢，你愛共下去無？黏時應𠊎——你自家去。
著好靴筒來到菜園，問阿姆有哪位愛𢯭挷草無？阿姆想就無想，馬上就講這廂，斯像早就等等𠊎來共樣，可見佢在菜園肚个生事有盡多。若婆正好，歸廂塞芃芃全係草，哪有看著菜，阿姆講，這係委个拗筍菜菜秧，較大兜正挖去其他菜廂打窟仔種，這站仔落水較勻，草生比菜秧較遽，正會分草包塞塞。
三點半來到菜園，雖然日頭無當咬人咧，毋過跍等挷草，還係悿又熱，該載左片這有一廂上筣个菜瓜廂，先挷這片析毋會晒著日頭，挷好正來換片析，就恁樣直直挷到五點半正挷好，帶來个一罐水堵好食淨淨，有達著來个目的。
因為草生比菜秧較大叢，在挷草當中，下把毋堵好會摎菜秧黏等挷起來，正摎佢種轉去，甚至還會摎蟲挷出來，阿姆喊𠊎摎蟲撚死，𠊎無摎佢撚死，就摎佢抨別位去定，還有發現盡多菜秧歸叢綿忒，明顯在頭下有分蟲仔食過，甚至有兜廂頂，還有一細片無忒去。歸叢好好个，菜葉乜分蟲仔咬到缺缺，看起來實在就無靚，可見種菜盡辛苦無簡單！
但係草个葉逐皮全恁靚，完全無像有分蟲食過个樣仔，看來這兜孤盲蟲仔，就係挑挑來舞射人个，抑係天公爺派來考驗𫣆俚人个？有煞猛做儕自然會得著自家想愛个，乜驗證了老話講个：人勤地獻寶，人懶地生草，無半點淆漦。
華語：長滿草的菜畦
播種甘藍菜
整畦全草真悲哀
拔好心裡樂開懷
以前人罵人說，冤枉喔，睡到太陽曬屁股才起床！現代人放假日，睡到下午自然醒是很正常的，做父母的也很無奈，講了年輕人，大家不開心，破壞家庭氣氛，想一想，最起碼沒亂跑，沒去做不好的事情，平常也有認真上班，這樣就好了，做為現代父母要知足。
這禮拜天剛好有空沒活動，早上在家裡東摸摸西摸摸，喝杯咖啡就過了。吃過午飯，在客廳稍微休息一下，差不多三點左右，突然聽到樓上有聲響，原來是兒子從樓上下來，才想到家裡還有人在，他起來午餐，兩餐當一餐吃。想說整個早上在家裡，沒運動也沒喝水，就想出去運動一下，順便補充水分促進新陳代謝，就跟兒子說，我要出去運動，去菜園幫阿婆拔草，開玩笑問他，你要一起去嗎？馬上回答我——你自己去。
穿好雨鞋來到菜園，問老媽有哪裡要幫忙拔草嗎？老媽想都沒想，馬上就說這畦，就像早就等著我來一樣，可見他菜園裡的工作有很多。你婆婆才好，整畦都長滿了草，哪有看到菜，老媽說，這是播種甘藍菜菜苗，準備長大一些，才挖去其他菜畦種，這陣子下雨較多，草長的比菜苗還快，才會給草包圍了。
三點半來到菜園，雖然太陽沒有很強烈了，不過蹲著拔草，還是累又熱，還好左邊這有一畦上了竹籬的絲瓜，先拔這側不會曬到太陽，拔好才來換另一側，就這樣一直拔到五點半才拔好，帶來的一罐水剛好都喝完，有達到來的目的。
因為草長的比菜苗還大棵，在拔草過程中，有時候會把菜苗黏著拔起來，再把它種回去，甚至還會把蟲拔出來，老媽要我把蟲捏死，我沒有把牠捏死，只把牠丟到別的地方去，還有發現很多菜苗整棵爛掉，明顯在根部有給蟲吃過，甚至在菜畦上，有些一小片就沒了。就算整棵好好的，菜葉也給蟲咬到很多缺口，看起來實在很醜，可見種菜很辛苦不簡單！
但是草的葉子每片都很完整，完全不像有蟲咬過的樣子，看來這些頑皮的蟲，就是故意來戲弄人的，或者是上天派來考驗我們的？有認真的人自然會得到自己想要的，也驗證了諺語講的：人勤地獻寶，人懶地長草，完全沒有半點謊言。
