文／李文煥，國中特教教師，苗栗縣客家人（四縣腔）
在小學一年生該央時，吾屋下徙到埔尾个新販仔屋（註1）戴，毋過屋背係一個當闊个豬寮。逐日就聽得著豬仔噯噯滾（註2）噭；鼻得著臭臭个屎味。附近仔無麼个人家屋，旦勢（註3）係田坵摎菜園定定。對吾屋下正手析略略仔行幾分鐘，有一個眷村，該係𠊎細時盡好去遶尞个所在。
眷村裡肚摎𠊎差毋多大个細人仔無多，有一個大𠊎兩歲个細妹仔，安到阿美仔，佢係𠊎盡好个細人伴，𠊎兩儕輒常湊等去搞家啦飯仔（註4）。有一擺眷村該兜公公（註5），湊𠊎歸家人過去打鬥四，兩張桌各省个菜排淰淰，大家食酒打嘴鼓就像一家人。包尾佢兜酒咈忒多，嗄搣射阿美仔摎𠊎準生趣。佢兜唱起華語歌：「阿美！阿美！幾時辦嫁妝，阿文急得快發狂，今天今天你要老實講，他是否有希望？」𠊎歸面仔繃紅，無結無煞噭講：「𠊎無愛啦！𠊎無愛啦！心肚想：『𠊎正無愛討面頰卵拶拶烏蠅屎个餔娘哪！」
一𥍉目，𠊎兩儕讀國中了，大𠊎兩屆个阿美仔，逐擺就講佢係學姊會好好照顧學弟，其實𠊎兜除忒討論課業以外，共樣還係盡有話講个細人伴仔。毋過人「無千日好，花無百日紅」，吂知阿美仔在國三下學期，突然間著著傷重（註6）个中耳炎，該央時个醫療還毋好，厥兩隻耳公無醫好嗄耳聾了！佢國中卒業以後，輒輒來吾屋下尞，𠊎在紙項寫字同佢溝通，雖然佢耳聾聽毋著，毋過還做得用怪怪个聲哨摎𠊎講話。
唉！運命麼人測得著？國中二年生下學期，嗄換𠊎擔著目珠个病，𠊎無法度寫字分阿美看了，佢講話乜緊來緊毋清楚，比手畫腳𠊎又看毋著！下後阿美去讀啟聰學校，𠊎囥在屋下親像「煠熟个鴨卵——無變」。在𠊎十八歲該年暑假，阿美突然間又來尋𠊎尞，𠊎當歡喜盡命牯用粗筆寫字畀看，佢乜食力个同𠊎講話，𠊎兜歸就（註7）當暢又做得尋轉細人伴。
但係，暑假過後，阿美就當久當久無來尋𠊎，𠊎心肚愐：「佢定著係去讀書交男朋友了！」下後𠊎正知，佢原來係因為耳聾，過大路無聽著喇叭聲，就恁仔分貨車撞消忒！電台又在放送「阿美！阿美！幾時辦嫁妝…」𠊎个阿美姊，你在天頂好無？這下係毋係聽得著阿文牯个聲音了？
註解：
（註1）販仔屋：音fan eˋvugˋ；連棟的水泥磚造樓房。
（註2）噯噯滾：音oiˋoiˋgunˋ；豬的叫聲。
（註3）旦勢：音danˋsii；大多、大致上。
（註4）家啦飯仔：音gaˊ laˊ fan eˋ；家家酒遊戲。
（註5）公公：音gungˇ gungˊ，眷村裡稱呼爺爺的叫法。
（註6）傷重：音songˊ dong；嚴重的意思。
（註7）歸就：音guiˊ qiu；全部、通通。
華語
在小學一年級的時候，我家搬到了埔尾的新房子，不過房子的後面有一個非常大的豬舍。每天都能聽到豬仔哼哼叫的聲音，聞到臭臭的糞便味。附近沒有什麼人家，四周全是田地和菜園。從我家向右走幾分鐘，有一個眷村，那是我小時候最喜歡去玩耍的地方。
眷村裡的孩子和我年紀差不多大，沒有很多人，其中有一個比我大兩歲的女孩，叫做阿美，她是我最好的玩伴。我們經常一起去對方家裡玩。有一次，眷村的爺爺們邀請我們全家去聚餐，兩桌子上擺滿了菜，大家喝酒聊天，就像一家人一樣。最後他們喝得有點多，便開始開阿美和我的玩笑。他們唱起了華語歌：「阿美！阿美！幾時辦嫁妝，阿文急得快發狂，今天今天你要老實講，他是否有希望？」我滿臉通紅，手足無措哭說：「我不要啦！我不要啦！」心裡想著：「我才不要討那個長有滿臉蒼蠅屎痣的老婆呢！」
一眨眼，我們都上了國中。比我大兩屆的阿美常常說她會好好照顧學弟，其實我們除了討論功課之外，還是有很多話題可以聊的好朋友。但是好景不常在，花無百日紅，沒想到阿美在國三下學期，突然患上了嚴重的中耳炎，當時的醫療技術還不夠好，她的兩隻耳朵沒能治好，結果就失聰了！她國中畢業後，經常來我家玩，我們用紙筆溝通，雖然她聽不見，但還是會用怪怪的聲音跟我說話。
唉！命運誰能預測？國二下學期，卻換我得了眼疾，無法再寫字給阿美看了，她說話也越來越不清楚，我也看不見她比手畫腳的樣子！後來阿美去讀啟聰學校，而我困在家裡，就像「煮熟的鴨蛋——無變」。在我十八歲那年的暑假，阿美突然又來找我玩，我非常高興，用粗筆寫字給她看，她也努力地跟我說話，我們又重新找回了童年的友誼。
但是，暑假過後，阿美就再也沒有來找我，我心裡猜測：「她大概是去讀書，交了男朋友吧！」後來我才知道，原來因為她耳聾，過馬路時沒聽到車的喇叭聲，就這樣被貨車撞死了！電台又在播放「阿美！阿美！幾時辦嫁妝…」，我的阿美姊，你在天上過得好嗎？現在你能聽到阿文的聲音了嗎？
