文／鍾孝昇，國小教師、中壢客家人，這下戴中壢（四縣腔）
十日个年假結束吔，大家又愛漸漸轉到平常个生活，因爭入年假時節，食了忒多肉氣，故所今晡日轉到山項，摘兜仔野菜，來煮幾項排毒料理，分胃腸「收心一下」。毋過，山肚恁多个植物，哪種正係這下最大出，乜最好食个野菜呢？無毋著，今晡日𠊎兜个主要目標，就係囥在山林壁角，天生天養个「昭和草」。
昭和草係菊科个植物，因為佢對環境个適應能力當強，當賤、當會生，故所在全台灣，滿奈仔个山林肚，長年透天都做得看得著佢。
行在山路項，昭和草這一搭、該一搭，儘採就看得著，特別係較濕个山溝肚，輒輒生到塞弄弄仔。愛仰般認昭和草呢？其實乜毋會難。昭和草个葉仔生著又長又圓，異像鴨卵，葉仔邊脣尖尖，又像鋸齒，中央還有紅色个葉脈，摎紅菜當相像，還過會開出頭犁犁、柑仔色个花，看詳細兜仔，你就會摎𠊎共樣，三不二時就尋著佢。
昭和草有盡多名仔，像山艾菜、飛行機菜、救荒草、滿天飛、神仙菜、山紅菜等等，可見佢有當多个古做得講。
聽講第二擺世界大戰該下，日本人長年在台灣作戰，為著愛解決糧食毋罅个情形，䟓工用飛行機在天頂掖昭和草个菜仁，因爭該下係日本昭和天皇个年代，故所就安著「昭和草」，又因為係用飛行機掖菜仁个，就摎佢安另外一隻「飛行機菜」个名。
當然，昭和草又安著「山艾菜」，就係因為佢盡有艾菜个羴味，食起來个口感乜同艾菜共樣。在寒天，艾菜價數當高該時節，還有人用佢代換艾菜，拿來做煮火鑊个材料，做得講係當好食又省錢个食材。
𠊎兜緊打嘴鼓緊摘，兩下半就摘了一大布袋个昭和草，阿姆就用這兜昭和草，做出當多好食个料理。佢講盡簡單个料理方式，就係用麻油、薑絲、蒜仔來炒昭和草，毋使放忒多調味料，火烈烈炒兩下仔，苦甘苦甘个昭和草就好食了。
除忒淨炒，阿姆講乜做得摎昭和草搵麵粉漿，落鑊來烰，做日本天婦羅。抑係切幼幼仔，剁兜仔豬肉來包水餃乜作得，就看你仰般發揮創意，來變化新个菜色了。
昭和草毋單淨做得拿來做菜食，還有食療个效果。佢有當多个纖維，食兜仔就會試著飽𩜰𩜰仔，分腸胃較好消化肉氣，改善秘結个情形，也就係𠊎摎佢多安一隻「收心菜」名个原因了。另外，昭和草係高鉀个青菜，高血壓个人食了後，作得調整血壓。毋過，腰仔功能毋好个人，要注意，毋食好忒多。
食了這盤个收心菜後，過年期間食到肚膕膕仔个肚屎，總算感覺較輕鬆了，心情乜試著較暢快。年假結束，新个一年就愛開始。老古人言講：「春有種，冬有望」，在新年頭，亻恩俚係講做得定定仔調整好身心，煞猛打拼，相信今年定著會有豐湧个收成。
華語
為期十天的年假結束了，大家又將回復到原來的生活中，由於過年期間吃了太多大魚大肉，因此今天我們回到山上，決定採些野菜，煮一些排毒料理，讓腸胃收心一下，而長於山間野外，天然的野菜–昭和草，就是我們今天的主要目標。
昭和草屬於菊科植物，由於它對環境的適應力強，能大量繁衍，在全台各地，幾乎都可以看到它的蹤影。
走在山路上，不時就可以看見昭和草長在各處，特別是在潮濕的山溝，很容易就找到它。昭和草的葉子呈長橢圓形，很像鴨蛋，葉緣則有不規則的鋸齒，葉脈暗紅色，與紅菜類似，加上會開出橘紅色，頭低低的花，仔細一點看，你就會和我一樣，三不五時發現它的身影。
昭和草有很多名稱，像山茼蒿、飛幾草、飢荒草、救荒草、滿天飛、神仙菜、山紅菜等，可見它有許多的故事可以講。
據說第二次世界大戰期間，日軍長期在臺灣作戰，為了解決因戰爭而缺乏食物的困境，特地以飛機在台灣上空撒播其種子，由於當時為日本昭和年代，因此得名「昭和草」。也因為是用飛機撒下種子的，所以又給它取了另外一個「飛機菜」的名字。
當然，既然昭和草又稱為「山茼蒿」，就是因為它具有一股很強的茼蒿味，而口感也很像茼蒿。在冬季茼蒿價位太高時，甚至有人用它取代茼蒿作為火鍋用菜，可說是既健康又美味、經濟的食材。
我們邊聊天邊摘，不一會就摘了一大袋的昭和草。母親就用這些昭和草做出許多美味的料理。她説最簡單的料理方式，就是用麻油、薑絲、大蒜清炒昭和草，不用太多調味料，大火快炒幾分鐘後，苦甘苦甘的昭和草就完成了。
除了清炒，母親説也可以將昭和草沾上麵粉糊，下鍋油炸，作成日式天婦羅，或是切碎後加入肉末來包水餃。昭和草可以作出的菜色十分多元，就看你如何發揮創意了。
而昭和草除食用外，也具有藥效喔。它富含豐富的膳食纖維，多吃可增加飽足感，可以促進腸胃蠕動，改善便秘情形，這也是我為什麼給它「收心菜」的原因了。此外，昭和草為高鉀蔬菜，高血壓的人食用有助於調節血壓。不過腎功能異常的人，要注意食用量，不可吃太多。
吃了這一盤的收心菜後，一整個過年期間吃得「大腹便便」的肚子，終於感覺比較輕鬆，人也覺得比較神清氣爽。年假即將結束，又是新的一年開始。古人云：「春有種，冬有望」，我們在開春之際，若能調整好身心狀態，按部就班，找回日常的生活作息，用積極樂觀的態度面對人生，相信這一整年，一定會有豐碩的收成。
