北歐最大驕傲遊行瑞典登場 台灣性別平權受著大家關注
【羅盛滿／新竹竹東海陸腔】北歐規模最大个斯德哥爾摩驕傲遊行因為疫情停辦兩年，8月初6重新轉到瑞典首都街頭，各隻重要團體、企業摎政黨都共下來參加。台灣隊伍參加遊行，特別受著大自家个關注，分各界看著台灣試著當沙鼻个多元性別平權文化。
斯德哥爾摩驕傲週（Stockholm Pride）從8月初1開始為期1隻禮拜，今年以「係時節表態咧」（Dags att bekänna färg）為主題个驕傲週活動在8月初6个驕傲遊行（Pride Parade）當中達到最高峰。
在瑞典，驕傲大遊行除了係各隻性別族群做得自在展現自家个場合之外，乜係重要个政治表態場合，盡多重要組織、企業、工會都會行上街頭，支持多元性別族群，甚至包括軍隊、警察局、消防局、教會這兜一般分人認為對多元性別議題較無友善个組織都現身在遊行當中。
開始在1998年个斯德哥爾摩驕傲週係歸隻北歐規模最大个驕傲活動，活動宗旨係分各種性傾向个族群做得分人看著，還過創造大自家做得自由表達各隻性別族群文化个場域。
愛丁堡藝穗節臺灣季論壇 實體摎線上共下進行
今年係愛丁堡藝穗節75週年，駐英國代表處文化組策劃執行个愛丁堡藝穗節「臺灣季」論壇活動，會採取實體摎線上共下進行，聚焦跨界、細妹人還過永續這3隻主題，用台灣經驗摎其他國家交流。
駐英國代表處文化組組長陳斌全昨晡日在文化部發布个新聞稿當中表示，跈等頭過2年以來COVID-19疫情發展，「臺灣季」論壇反映表演藝術全球趨勢，還過藉等臺灣觀點凸顯咧國內表演藝術个競爭力。
陳斌全表示，今年論壇突破原有格局，除了繼續摎愛丁堡演出場館串連辦理之外，乜頭一擺摎藝穗節大會結盟合作，做得爭取著藝穗節大會个參與，就係對活動个肯定。另外，今年論壇活動會在8月15摎16分3場進行，除了論壇現場，也保留線上參加機制，免費報名，希望帶動還較廣泛个參與。
有興趣个鄉親朋友做得上網查詢「愛丁堡藝穗節臺灣季」，到論壇活動網站免費報名：https://reurl.cc/yMezDM。
天時資訊
氣象局今晡日針對大台北摎東半部發布高溫資訊。氣象專家吳德榮今晡日表示，輕度風搓木蘭推算韶早生成、無侵襲台灣个機會，但係受著風搓外圍水氣影響，東南部、恆春半島容易有局部陣雨，山區愛留意落大水个情形。
中央氣象局今晡日發布高溫資訊，天時當好又熱，今晡日當晝左右，台北市、新北市、宜蘭縣、台東縣所在，花蓮縣縱谷都係柑仔色燈號，有機會連續出現攝氏36度高溫。
吳德榮指出，最新中央氣象局「路徑潛勢預測圖」顯示，熱帶低壓向北北東轉北再過轉西北，呈現逆時鐘迴轉个行徑，係受著「季風環流」導引个特徵，今晡朝晨觀測資料顯示，東南部摎恆春半島受著佢外圍水氣影響，已經有回波帶來落水。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
（Android連結：https://reurl.cc/8GWlXd）
（IOS連結：https://reurl.cc/O1pb59）
歡迎討論或留言給我們: