【寫客文】關西个異國建築

文／黃筱婷，竹東客家人，這下戴竹東鎮（腔頭：海陸腔）

關西等有名个斯係流過莊頭个牛欄河了，在牛欄河有兩座當像虹个石拱橋，當生趣个係，這兩座石橋个名仔都係安到「東安橋」，毋過一座係原旦个橋仔，另外一座係新个橋仔。

原旦个東安橋係日本技師模仿日本皇宮內肚个橋梁起个，有超過九十年个歷史了，當多受著大家歡迎个電影都識在這位拍，這座老橋乜陪等盡多个老輩人度過當多个童年記憶；新个東安橋仔底下就係「牛欄河親水公園」，當多人在朝晨頭摎臨暗仔个時節到公園肚運動摎散步，有成時乜會看著有人在這位釣魚仔唷！

關西个街路項做得看著異國建築，第一間係日本時代斯起好个「關西分駐所」，斯係現下个關西警察分局，這位目前係三級古蹟，外觀看起來當秀氣，當得人惜。

第二間安到「樹德病院」，老輩人講這位係關西个第一間病院，乜係第一間用鐵精起个屋仔，病院个老主人係識去過日本讀醫學个醫生，所以這間病院有日本摎西洋个建築外表，目前樹德病院傳到第四代了，到這下還係有摎人看病，係當有歷史个一間病院了。

第三間係在關西老街脣項个「關西天主堂」，這間教堂个外壁係灰色摎白色个洗石仔，裡肚个彩色玻璃乜當值得欣賞，行入去教堂裡背會分人試著當恬靜。

突然間𠊎看著設計當特別个一間廟：「潮音禪寺」，裡背个師傅摎𠊎講這係全台灣唯一泰國建築个廟，廟項還有一座金色个觀音像，來到這位，𠊎有到泰國遊尞个感覺。最尾一間當特別个建築係「台紅茶業文化館」，這棟屋仔个設計當特別，看起來當無共樣；茶米頭擺在桃竹苗地區當好經濟作物，這間茶米工廠肚有盡多當有歷史做茶个傢伙頭，盡有保存个價值。

關西个物產豐富，河壩水長年透天當鮮又當足，尤其這位个「仙草」盡有名。關西實在係一隻光景當靚、空氣乜盡好个莊頭；觀賞恁靚个山水景色，分人試著心肝華華開。

華語：關西的異國建築

關西最有名的就是流過鎮上的牛欄河了，在牛欄河的上方有兩座很像天上彩虹的石拱橋，很有趣的是，這兩座石橋的名字都是「東安橋」，不過一座是舊橋，另外一座是新橋。

舊東安橋是由日本技師仿造日本皇宮內的橋梁所建造的古橋，已經有超過九十年的歷史了，許多受到大家歡迎的電影都曾經在這裡取景，這座古老的橋也陪著許多老一輩的人度過許多的童年記憶；新東安橋的下方則是「牛欄河親水公園」，許多人在早晨和傍晚的時候會到公園裡面運動和散步，有時候也會看到有人在這裡釣魚唷！

關西的街道上可以看到一些的異國建築，第一幢是日本時期便已經建造的「關西分駐所」，就是目前的關西警察局，這裡現在是三級古蹟，外觀看起來非常典雅，很討人喜歡。

第二幢叫做「樹德診所」，老一輩的人說這是關西的第一家醫院，也是第一家用鋼筋建造的房子，老屋主是曾經到日本攻讀醫學的醫生，所以這家診所的外觀有著日本與西洋的建築形式，目前樹德診所已經傳承四代了，並且到現在還有營業，可以說是非常具有歷史的一家診所了。

第三幢是在關西老街旁邊的「關西天主堂」，這座教堂是以灰色和白洗石子組合而成，內部的彩色玻璃非常值得欣賞，走進去教堂裡面會讓人感覺非常平靜。

突然間我看到設計相當特別的一座寺廟：「潮音禪寺」，裡面的師傅告訴我這是全臺灣唯一泰國風格的寺廟，寺廟內還有一座黃金色的觀音像，來到這裡我有到泰國旅遊的感覺。

最後一幢很特別的建築是「台紅茶業文化館」，這棟房子的設計很特別，看起來很不一樣；茶產業過去在桃竹苗地區可以說是相當好的經濟發展，這座茶廠裡面有許多歷史悠久的製茶器具，非常具有保存的價值。

關西的物產豐富，河水經年累月也都很清澈豐沛，尤其以「仙草」最為聞名，關西實在可以說是一個風景美麗、空氣也很新鮮的樸小鎮；觀賞這麼漂亮的山水風景，讓人感覺心胸開朗。