文／黃筱婷，竹東客家人，這下戴竹東鎮（腔頭：海陸腔）

油桐樹仔總會在逐年四月到七月个時節打花，該下个客家莊總係做得看著滿山个油桐花，遠遠看啊去，一大片白雪雪个山，景色實在當靚；有閒大家斯來客家莊賞油桐花，白白个油桐花就像係落雪，所以油桐花乜分人安到「六月雪」。

𠊎還記得頭過在彰化做頭路个時節，若係放尞有時間，𠊎長透騎車仔去八卦山遶山花，欣賞大自然个好風光；八卦山在彰化市較高个位所，路脣種有各種个樹仔，乜有當多細路做得分人行路，在這位分人試著當鬆爽。

記得有一擺同事建議𠊎做得去福田社區裡肚賞油桐花，所以𠊎順等八卦山个路騎往下，差毋多經過半點鐘个時間，𠊎斯看著在左手片福田社區个牌仔了。

福田社區裡背盡出名个斯係在當多油桐樹仔底下个油桐花步道，在打花个時節，白白个油桐花跌到地泥下，像係漫天飛舞个雪花，靚到𠊎話講毋出；過無幾久，歸地泥斯係白白个油桐花，這搭仔靚靚个景色實在分人印象當深。

在福田社區做得欣賞當得人惜个六月雪，還做得欣賞杉仔樹、桑仔樹、樟樹摎楓樹這兜樹仔，若係天時當熱行到歸身汗，乜做得坐在樹影下尞涼，無定還做得看著鳥仔在樹頂唱一條歌仔。

除了有珍貴个樹林，福田社區還有蝶仔園區、植物園區摎蛄仔區，社區還用牌仔來紹介各種个動物摎植物，大家做得欣賞油桐花，乜做得看著摎城市完全無共樣个大自然風景樣貌。

逐年春天摎熱天个時節，這乜堵堵好係出去遶尞个好時節，臺灣客家莊山林壁角都做得看著白白个油桐花，𠊎試著這係當靚个光景。

福田社區肚鳥語花香，人在該位尞當舒爽，各位朋友平常有閒个時節，乜做得來彰化八卦山个福田社區行尞，欣賞油桐花開花个景色，大自家看著靚靚个「六月雪」，𠊎保證定著會分你兜个心情當快樂！

華語：討人喜歡的六月雪

油桐樹總會在每年四月到七月時開花，那個時候的客家莊總是可以見到滿山遍野的白色花朵，遠遠看過去，整片山都是白色，景色實在非常漂亮；有空大家就會來到客家莊欣賞油桐花的景色，白色的油桐花就像下雪一樣，因此油桐花又被人稱為「六月雪」。

我還記得從前在彰化就業的時候，如果放假有時間，我時常騎車到八卦山郊遊，欣賞大自然的好風光；八卦山在彰化市較高的位置，沿路種滿各種樹木，也有各種步道可以讓行人健走，在這裡讓人感覺到非常舒服。記得有一次同事建議我可以到福田園區欣賞油桐花，因此我便沿著八卦山的道路往下騎，差不多經過半小時的時間，我就看到在左側的福田社區標示牌了。

福田社區內最出名的就是在大片油桐樹林底下的油桐花步道，在花季的時候，白色的油桐花慢慢掉落地面，就像是滿天飛舞的雪花，美到讓我沒有辦法使用言語來形容；沒有多久，整個地面就是雪白的油桐花，這美麗動人的景色實在是讓人印象非常深刻。

在福田社區除了可以欣賞討人喜歡的六月雪，還可以觀賞杉木、桑樹、樟樹和楓樹等樹種，如果天氣很熱走到滿身大汗時，也可以坐在樹蔭底下乘涼，說不定還可以看到鳥兒在樹上唱首歌。

除了有珍貴的樹林，福田社區還有蝴蝶園區、植物園區和甲蟲區等，園區內還使用告示牌來介紹各種動物和植物，讓遊客除了賞桐之外，還可以看到與都會地區全然不同的大自然樣貌。

每年春天和夏天的時候，這也剛剛好是適合外出遊玩的好時節，臺灣客家莊的山區都可以看到白色的油桐花，我覺得這是最美麗的風光。

福田社區內鳥語花香，在那裡休息很舒服，各位朋友平常有空的時候，也可以到彰化八卦山的福田社區走走，仔細欣賞油桐花的開花景色，大家看到優美个「六月雪」，我保證一定會讓你們的心情很快樂！