歐洲議會副議長來到台灣
【羅盛滿／新竹竹東海陸腔】歐洲議會副議長畢爾（Nicola Beer）今晡日坐飛行機來到台灣訪問，在上晝7點54分降落在桃園機場，外交部由政務次長田中光代表接機。畢爾發表談話表示，這擺係以歐洲議會副議長个官方身分正式訪問台灣，畢爾也摎田中光表示，台灣民主自由个成就、乜就係歐洲个成就，歐洲毋會漠視中國施加分台灣个壓力，會黏時伸出援手，台灣毋會係下一隻香港，台灣个民主自由就係華人世界个典範。
外交部指出，畢爾頭一擺訪問台灣，會深入了解台灣民主發展，關切台海和平穩定，還過探索尋求台灣摎歐洲在高科技供應鏈韌性合作个潛能。畢爾來台訪問做得深化台灣摎歐盟在各隻領域个實質夥伴合作，共下捍衛以規則為基礎个國際秩序，還過維護區域和平穩定个決心。
美國摎日本韶早共下召開疫情大流行全球行動計畫虛擬部長級會議
米國摎日本會在韶早召開疫情大流行全球行動計畫虛擬部長級會議，為疫情發展制定下一步全球計畫。傳出台灣無受著邀請。
米國國務院今晡日表示，部長級會議乜會邀請部分國家參與，還有其他合作國家乜發揮重要作用。在公共衛生、全球衛生方面，世界有當多做得摎台灣學習个位所。米國會持續摎台灣政府接觸，維持一貫个非官方關係，還過在公共衛生摎全球衛生方面向前邁進。
交通部長講：考慮解除禁團令
因為COVID-19疫情，從109年3月19日半夜12點勢，中央流行疫情指揮中心請旅行業暫停組團赴國外旅遊，還過接待來台灣个觀光團體入境，「禁團令」持續到今已經2年又4隻月。
總統蔡英文日前表示，跈等生活回到正常，政府會把扼振興經濟个機會，詳細評估開放个時程表，重新爭取國際旅客來台灣。交通部長王國材今晡日表示，已經請觀光局提案，在適當時機解除旅行社組團出國抑係來台灣的「禁團令」，希望業界趕等悠遊國旅期間摎好个旅遊品質做出來，未來做得連結國際觀光。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
（Android連結：https://reurl.cc/8GWlXd）
（IOS連結：https://reurl.cc/O1pb59）
歡迎討論或留言給我們: