台電提出四接東徙案 學者愁慮討論過度集中在珊瑚
【羅盛滿／新竹竹東海陸腔】台電今晡日提出協和電廠个「四接東徙」方案。中山大學海洋生物科技暨資源學系榮譽講座教授方力行愁慮，這案仔討論焦點過度集中在珊瑚，佢打白講表示，北海岸並毋係珊瑚最適合生長个環境，顛倒更加適合有固碳作用个大型藻類發展。
台電規劃摎協和電廠4部燃油機組改做2部燃氣機組，還過規劃在外木山海岸填海造陸，建設分人喊做「四接」个天然氣接收站，但係因為外界愁慮當地珊瑚生態受到衝擊，因此台電今晡日提出「東徙方案」。
台電說明，填地方案原旦規劃填海面積係18.6公頃，填方量係350萬立方公尺，這擺个「東徙方案」，填海面積縮細到14.5公頃，填方量減做195萬立方公尺，還過經過調整，做得完全保留海扇摎潛堤區个珊瑚。
台電表示，協和電廠當年就係填海造陸興建，建廠過後為了抵擋海浪，設置人造潛堤，經過幾下十年發展，顛倒孕育摎保護生態个良好人造棲地，還過學者研究乜發現，高雄永安天然氣接收站，係西海岸沙質地形當中、唯一有恁多珊瑚生長个位所。
國圖南部分館暨聯合典藏中心決標 114年年底啟用
位在台南市新營區个國家圖書館南部分館暨聯合典藏中心新建工程案，已經完成評選決標作業，新建工程採購案會在7月中旬簽約，9月動土開工，預定民國114年年底完工啟用。
國家圖書館今晡日發布新聞稿指出，國家圖書館南部分館暨聯合典藏中心新建工程案，已經完成評選決標作業，由宏昇營造股份有限公司得標，這係政府推動全國性大型公共建設个一大步。
國圖南部分館暨聯合典藏中心係地泥下1棧、地泥上5棧个建築物，位在台南市新營區文高11用地，會規劃成國家圖書館南部分館摎國家聯合典藏中心兩隻區塊。
南部分館設立在保留80%以上樹仔栽種个閱讀公園肚，涵蓋智慧型自動化倉儲書庫（ASRS）、知識之徑（書山）、分齡分眾知識探索服務中心、還過台灣兒童摎青少年文學史料中心，係南台灣唯一國家級公共圖書館，未來會變做圖書資訊發展摎圖書館服務个創新育成中心。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7今
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
（Android連結：https://reurl.cc/8GWlXd）
（IOS連結：https://reurl.cc/O1pb59）
歡迎討論或留言給我們: