2022客家小炒全國爭霸賽　全國熱力開炒

2022客家小炒全國爭霸賽　全國熱力開炒

客家委員會為了推廣客家美食摎協助帶動客庄社區經濟，因此持續推辦「2022客家小炒全國爭霸賽」，頭一場初賽在7月初9（拜六）在花蓮縣吉安鄉熱情開炒，由參賽店頭現場演繹自家獨家風味料理，詮釋「在地傳統風味客家炒肉」摎「創意風格客家炒肉」，考驗全國參賽者臨場發揮對客家炒肉个煮食技術，各區初賽个冠軍摎亞軍會落去攝影棚錄製節目，由客委會頭一擺摎東森電視台合作个「料理之王」特別節目進行準決賽摎總決賽，全國觀眾做得在9月中旬起勢，欣賞精彩个料理大對決!

蔡總統講：霹靂布袋戲係台灣漫威　持續推動傳承創新

總統府今晡日發布新聞稿指出，蔡總統昨晡日（7／5）上晝去到國家電影摎視聽文化中心參觀「咱　江湖再見」（亻恩俚　江湖再見）八音才子黃文擇紀念展。

總統蔡英文表示，非常感謝黃文擇用佢个聲音，共下建構出霹靂个世界。盡多人認為霹靂就係「台灣漫威」，透過動畫、電影、還過各種周邊商品个結合，做得為歸隻文化內容產業，帶來多元豐富內容；這幾年來，政府當重視乜當支持布袋戲个發展，會持續推動布袋戲个傳承摎創新，分台灣布袋戲一代一代傳下去，一代一代還較精彩，變做台灣人一代又一代共同个資產。

亞洲个地獄摎幽魂　Cosplay半夜場鬼月登場

台南市美術館2館「亞洲个地獄摎幽魂」開展過後人尖人，因應舊曆鬼月到來，宣布推出3場百鬼漫遊个Cosplay半夜專場，盼望以亞洲幽魂鬼怪為主題，吸血鬼、狼人這兜西方猛鬼先暫離。

南美館今晡日當晝在面書（facebook）宣布推出破地獄—「亞洲个地獄摎幽魂」之百鬼漫遊Cosplay半夜專場，分亞洲个幽魂鬼怪做盡走出來，共下中元普渡，再過共下倒轉地獄。

Cosplay場開設3場，時間都在暗晡9點到12點，「破地獄之頭過身就過」在鬼門開隔日7月30舉行、「破地獄之猛鬼流水席」在中元節隔日8月13辦理；「破地獄之重回三途川」會在鬼門關隔日8月27登場。

台南市美術館摎法國凱布朗利博物館（musee du qu ai Branly-Jacques Chirac,Paris）合作的「亞洲个地獄摎幽魂」特展，在6月25到10月16在台南市美術館2館2樓展覽室E-H展出。